Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. «Цёраэйкакшонь кулома» морамолувонть коряс. Давидэнь псалмась.
2Азоро, шнан Тонь весе седейсэнь,
ёвтнян-пачтян весе Тонь дивань тевтнеде.
3Эрьгелян ды кенярдан Тонь кисэ,
моросо шнан Тонь леметь, Верепаз.
4Зярдо Тон невтьсак прят монь душмантнэнень,
сестэ сынь велявтыть-потыть мекев, прыть ды ёмить.
5Тон теик судонть монь лезэс ды тевсэнь аштить монь кисэ.
Виде Судия! Тон озыть инеэземеть*а лангс.
6Тон пек кежиявтыть лия раськетнень лангс,
маштыть-ёмавтыть зыяновтнень.
Леместкак нардыть ломанень мельстэ пингеде пингес.
7Душмантнэ изнязь педе-пес,
Тон яжить-калавтыть ошосткак.
Сындест ледстямояк эзь кадово.
8А вана Азорось эри-ашти пингеде пингес,
судонь теемань кисэ путызе Сон инеэземензэ.
9Сон суди весе менельтнень-мастортнэнь видечинь коряс,
теи суд раськетнень лангсо Эсь видечинзэ коряс.
10Азорось лепштязтненень кемекстазь кекшема тарка,
стака шкасто тенст кекшема тарка.
11Тонь лангс кемить-нежедить Тонь содыцятне.
Тон, Азоро, а стувтнят Тонь тердицятнень.
12Морадо Азоронтень, Сионсо эрицянтень!
Пачтядо-ёвтнеде раськетнень юткова Сонзэ тевтнеде!
13Сон, верень валоманть кисэ пандыцясь,
кирди мельсэнзэ лепштязтнень,
а стувтни сынст авардемаст-рангомаст.
14Азоро, ульть монень седеймарицякс.
Варштак пиштеман лангс, конатнень тень теизь монь авечкицятне.
Тон саят монь куломань ортатнень вакссто.
15Ды мон карман пачтямо Тонь паро тевтнеде
Иерусалимень ортатнень лангсо пурнавицятненень.
Карман кеняркшномо Тонь пельде идеманть кисэ.
16Лия раськень ломантне прасть латконтень,
конань сынсь чувизь,
пильгест тапавсть-кершавсть килькшентень-пистенентень*б,
конань сынсь кекшизь.
17Азорось яволявтызе прянзо, тейсь виде суд, –
ды зыяновтне тапавсть эсь тевезэст.
18Кадык туить тоначис зыяновтне
ды весе раськетне, конат стувтызь Пазонть.
19Эдь Пазось аволь свалшкас стувтсы лепштязенть,
ды аволь пингеде пингес ёми арасьчисэтнень седейнежедьксэст*в.
20Азоро, стяк!
Кадык ломанесь а тейни прянзо виевекс,
кадык судявить раськетне Тонь чачот икеле!
21Азоро, тандавтыть сынст!
Кадык кармить содамо раськетне:
сынь ансяк ломанть.
22Азоро, мекс Тон истя васоло,
мекс кекшнят Эсь прят стака шкане?
23Эсь каштанчинзэ кувалма зыяновось лепшти арасьчисэнть.
Кадык понгить истятнэ сеть ёжовгалематнес, конатнень сынсь арсизь.
24Зыяновось каштангали визькстэмечисэнзэ,
сюпавчинь мельга правтыцясь шны прясонзо.
25Эсь каштанчисэнзэ зыяновось арси Азордонть:
«А кевкстьсамизь».
Мельсэнзэ-превсэнзэ ансяк вейке:
«Паз арась».
26Эрьва шкане сонзэ тевтне-валтнэ аванькст.
Пазом, Тонь судтнэ-аравтовкстнэ сонзэ туртов васолот.
Сон а неи-а мари эсензэ душманонзо.
27Сон корты эсь пачканзо: «Мон зярдояк а чатазеван,
а тееви тень зыян».
28Кургозо пештязь сюдомасо, кенгелемасо ды тандавтнемасо.
Кельсэнзэ-валсонзо зыян ды ёмамочи.
29Сон кекшезь ашти кардаз удало,
салава маштни-чавны чумовтомот,
сельмензэ ванкшныть вийтементь мельга.
30Вансты-учи эйсэст кекшема таркасо, теке лев цитёрькс пулосо.
Сон кекшезь вансты-учи вийтементь,
каподьсы сонзэ ды усксы эсензэ кундамкатнес-килькштнес.
31Сон комадо салава учи,
ды пайстомотне прыть сонзэ кенжензэ алов.
32Зыяновось корты эсь пачканзо:
«Пазось стувтсь теде, кекшизе чачонзо,
Сон а несы тень зярдояк».
33Азоро, Пазом, стяк, венстик кедеть,
[овсе] илить стувто [Тонь] лепштязтнень!
34Мекс зыяновось прянзо велявты Пазонть эйстэ?
Сон корты эсь пачканзо: «Сон а кевкстьсамизь».
35Тон неят покордамонть ды зыянонть,
Тон пандат тень кисэ Эсеть кедьсэ.
Тонеть максы эсь прянзо кажовось.
Урозонтень Тон лездыця.
36Маштык-тапик зыяновонть ды кежеенть виест истя:
челькеяк*г илязо кадово сынст нулгодькс тевтнеде.
37Азорось ули инязорокс пингеде пингес.
Лия раськетне ёмить Сонзэ масторстонть.
38Азоро! Тон марясыть сэтьметнень мелест-бажамост.
Кемекстыть сынст седеест! Кунсолыть сынст!
39Тон кармат мелявтомо лепштязтнень ды урозтнэнь кисэ
ды теят суд сынст лезэс.
Сестэ моданть лангсо вейкеяк ломань зярдояк а карми тандалеме.
*а 9:5 инеэзем – престол, трон
*б 9:16 пистень – силок
*в 9:19 седейнежедькс – надежда
*г 9:36 чельке – тесэ: след
Глава 9