Выбрать язык
Книги Ветхого Завета
Книги Нового Завета
с русским текстомДавидэнь псалмась. Инязорокс вадемадо икеле.
1Азорось – монь валдом ды монь идемам:
киде монень пелемс?
Азорось – монь кеме кекшема таркам:
кинень монь тандавтнемс?
2Бути зыянонь теицятне кармить молеме монь лангс
рунгом раздеме-сэвеме,
неть душмантнэ ды каршон аштицятне
сынсь пупордить ды прыть.
3Бути монь перька сти ушмо,
седеем а пелезеви.
Бути сыргавтыть каршозон тюрема,
сестэяк пильге лангсто а правтован.
4Мон вейкенть вешан Азоронть пельде,
текенень ансяк бажан:
эрямс-аштемс монень Азоронть кудосо весе эрямом перть,
ваномс Азоронть мазычинзэ лангс
ды озномс Тензэ [иневанькс] озкудосонзо.
5Сон стака чистэнь кекшсамам Эсь коцткудозонзо,
ванстасамам Эсь кудонзо салава таркасонть,
кепедьсамам кевень пандопряс.
6Сестэ прям кепедеви перькан аштиця душмантнэде верев,
ды мон кенярдозь кандан Сонензэ анокст коцткудозонзо.
Карман морамо ды седямо Азоронтень.
7Азоро, марик монь тердема вайгелем,
кунсоломак монь, ульть седеймарицякс монень.
8Мон ледстнян Тонь валот:
«Вешнеде Монь чачом».
Азоро, карман вешнеме Тонь.
9Иляк кекше чачот монь эйстэ.
Кеждязь иляк пане Тонь уреть!
Тон ульнить монень лездыцякс.
Пазом, монь Идицям,
иля велявто монь эйстэ, илямак кадо монь!
10Кадык тетям-авамгак кадсамизь,
а вана Азорось карми мелявтомо кисэнь.
11Азоро, тонавтомак монь Тонь кинтень
ды ветямак монь виде ян ланга,
эдь душмантнэде монь каршо ламо.
12Илямак максо монь нарьгамс душманон туртов,
эдь монь каршо стясть кенгелиця неицят-яволявтыцят*а,
конат лексить кежсэ.
13Ялатеке мон кеман:
модалангсо эрямсто неса Азоронть паронзо.
14Кемть-нежедть Азоронть лангс!
Ульть виевекс ды апелицякс, ды кемть Азоронть лангс!
Шнамо
*а 26:12 неиця-яволявтыця – свидетель
Глава 26