Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 27
Азором, марямак! Иля чатьмоне!
Давидэнь псалмась.
1Азоро, мон тердян Тонь.
Тон – монь кевпандом.
Иля чатьмоне монь марто!
Бути Тон кармат чатьмонеме,
мон тееван калмос совицянь кондямокс.
2Марик монь озномань вайгелем,
зярдо мон тердян Тонь лездамо,
зярдо мон кепсян кедень Тонь озкудонть сехте иневаньксэнть*а ёнов.
3Илямак ёмавто монь зыяновтнень
ды авидечинь теицятнень марто вейсэ.
Сынь эсь малавиксэст марто кортыть сэтьмечиде,
а вана эсь седейсэст кирдить кеж.
4Макст тенст эсь тевест коряс, зыяност коряс,
макст тенст кедьсэст теевть тевтнень коряс.
макст тенст Тевест питнензэ коряс!
5Сень кисэ, мекс сынь а явить мель Азоронь тевтненень
ды Сонзэ кедьсэ теезь тевтненень,
Сон тапасынзе-правтсынзе сынст
ды одс а стявтсынзе.
6Шназь улезэ Азорось,
эдь Сон маринзе монь озноматнень.
7Азорось – монь вием ды ваксаром:
Сонзэ лангс кемсь-нежедсь монь седеем,
ды Сон лездась монень.
Тень кувалт кенярды монь седеем,
ды мон шнан Сонзэ эсень моросон.
8Азорось – раськензэ виезэ,
Сон вадевтензэ*б туртов идиця ды кисэнзэ аштиця.
9Идик Эсь раськеть ды чанстить Тонь ломантнень.
Вант эйсэст ревень стаданть ладсо,
кандт-кирдть сынст кедеть лангсо пингеде пингес!
*а 27:2 Пазонь озкудосонть ульнесть кавто пелькст: ”иневанькс” ды ”сехте иневанькс”. Сехте иневанькс пельксэнтень совсесь ансяк весть иезэнзэ ськамонзо озатяньпрявтось (первосвященник).
*б 27:8 вадевть – помазанник
Глава 27
