Библия на финно-угорских языках

•   
• Главная
• Библия
• Библейские рассказы
• Аудио
• Загрузки
• Контакты

Библия

Выбрать язык vienankarjalakšilivviksevepsän kelelмокшексэрзякскоми кыв вылынкоми-пермяцкöй кыв вылынмарлакырык марлаудмурт кылынмāньси лāтӈылханты ясаӈан

Книги Ветхого Завета про «Библия»содержаниеКнига РуфьПсалтирьПритчиЕкклесиастПесни ПеснейИона

Книги Нового Завета Выбрать книгупро «Од Вейсэньлув»содержаниесловариОт МатфеяОт МаркаОт ЛукиОт ИоаннаДеянияИакова1-e Петра2-e Петра1-e Иоанна2-e Иоанна3-e ИоаннаИудаК Римлянам1-е Коринфянам2-е КоринфянамК ГалатамК ЕфесянамК ФилиппийцамК Колоссянам1-е Фессалоникийцам2-е Фессалоникийцам1-е Тимофею2-е ТимофеюК ТитуК ФилимонуК ЕвреямОткровение

ПСАЛТИРЬ

ОЗНОМАМОРОТ

Глава 39

Пайстомось шны Азоронть лезксэнть кисэ

1Моравтомань ветицянтень. Давидэнь псалмась.

2Цидярдозь мон кеминь-нежединь Азоронть лангс,
   ды Сон велявтсь монь ёнов
   ды маризе монь авардемам-рангомам.
3Сон таргимим монь куломань-ёмамонь латкосто,
   илэв чеядавкссто*а,
   путынзе пильгень кеме таркас
   ды виевгавтынзе эскельксэнь.
4Сон макссь монень морамс од моро –
   шнамоморо минек Пазонтень.
   Ламот несызь Пазонть тевензэ ды пелезевить
   ды кармить кемеме-нежедеме Азоронть лангс.
5Уцяскав се, кие кеми-нежеди Азоронть лангс,
   кие а пшкали лезкс мельга прянь верьга кандыцятнень
   ды кенгелемас ваязтнень туртов.

6Азоро, монь Пазом!
   Тон пек ламо теить минек туртов.
   Тонь тамашатне*б ды арсематне певтеметь.
   Лия Тонь кондямо арась!
   Ули мелем ёвтнемс ды кортамс Тонь тевтнеде,
   сындест пек ламо – а лововитькак.
7Тонь арасель мелеть саемс анокст ды кандовкст,
   а вана монь пилень Тон панжить△.
   Тон эзить веше пултавкст ды казнеть пежетень кисэ.
8Сестэ мон меринь:
   «Вана мон сан, кода сёрмадозь мондень
   тапарксонь кондямо книгасонть.
9Пазом, мон кенярдозь топавтан Тонь мелеть,
   ды Тонь коесь седейсэнь».
10Мон пачтинь-ёвтнинь Тонь видечидеть ине промкссо,
   мон эзия пекстне кургом.
   Тон, Азоро, теде содат.
11Тонь видечинть седейсэнь эзия сёпо,
   ёвтнинь Тонь кемевиксчидеть ды идемадот.
   Эзия кекше Тонь седеймарямот
   ды алкуксчить ине промксонть икеле.

12Азоро, иляк сае Эсеть седеймарямот монь кедьстэ.
   Тонь вечкемась ды видечись кадык ванстыть монь свал.
13Эдь мон пирязян алововикс зыянсо.
   Лепштимизь монь пежеттне, секс мезеяк тень а неяви.
   Неть пежеттнеде прячердень ламо,
   ды смелчиськак монь кадымим.
14Азоро, путт паро мельть ды идемак монь.
   Азоро, капшак лездамо монень!

15Кадык визделгадыть ды улить совавтозь визьксчамас весе,
   кить вешнить кулома монь ойментень!
   Кадык потыть удалов ды улить покордазь весе,
   кить арсить монень зыян.
16Кадык талакадыть-таймазкадыть
   эсест визькстэст сетне, конат кортыть монень:
   «Паро, паро! Истя тензэ эрявияк».
17Кадык кеняркшныть ды эрьгелить Тонь кисэ весе,
   кить вешнить Эйсэть.
   Кадык весе, кить кемить-нежедить Тонь максовт идеманть лангс,
   свал кортыть: «Азорось ине!»

18Мон кажован ды пурныцян.
   Тон, Азоро, ялатеке мелявтат монь кисэ.
   Тон монь лездыцям ды идицям.
   Пазом, иля таргсе шканть!

Шнамо

*а 39:3 чеядавкс – болото

*б 39:6 тамаша, тамашат – чудо, чудеса, чудесные дела

 Глава 39