Выбрать язык
Книги Ветхого Завета
Книги Нового Завета
с русским текстом1– Эйкакшон, кунсолодо тетянк превс путоматнень,
яводо покш мель чарькодьксчинтень тонавтнемазонк.
2Эдь мон максан тенк паро тонавтома.
Илядо безарде монь кармавтовкстнэде.
3Зярдо мон ульнинь тетянь цёрынекс,
авань вельть вечкевикс, вейкине эйдинекс,
4тетям тонавтсь монь ды кортась тень:
«Кадык тонь седейсэть кирдевить монь валон,
топавт кармавтовксон, ды эрямот ули уцяскав.
5Таштак покш превейчи, пурнак-сэрняк чарькодьксчи
ды иля стувтне монь валтнэде, иля пурдакшно сынст эйстэ.
6Иляк кадно покш превейчинть, ды сон карми тонь ванстомо.
Вечкть сонзэ, ды сон карми тонь кисэ аштеме.
7Покш превейчись – весемеде ине. Пурнак-сэрняк покш превейчи,
ды весе ули-парот вийсэ таштак чарькодьксчи.
8Ловик сонзэ питнеекс, ды сонгак кепедтянзат тонь.
Вейсэндявт мартонзо, ды сонгак инелгавтанзат тонь,
9путы прязот пек мазый каштаз,
максы теть сияждыця венець».
10– Цёрам, кунсолок ды путыть превезэть монь валон –
ды кувалгады эрямот.
11Мон невтян теть ки покш превейчинтень,
ветян эйсэть виде киява.
12Зярдо кармат эзганзо молеме, а ули теть кодамояк пирявкс,
ды зярдо туят чиезь, сестэяк а пупордят.
13Кеместэ кирдть превс путоматнень, иля пота эйстэст,
ванст сынст, эдь сынь – тонь эрямот.
14Иля чалга пазтомотнень кист лангс,
иля яксе зыяновтнень киява.
15Кадык те кинть, иля яка сонзэ эзга,
пурдак сонзэ лангсто ды ютак ваксканзо!
16Эдь зыяновтне а матедевить семс, зярс а теить зыян;
сынст штаты удомаст, бути киньгак а пачтясызь прамос.
17Эдь сынь ярсыть койтемечиденть кода кшиде
ды симить саламодонть-нельгемадонть (/м:лепштямодонть-нарьгамодонть?) кода винадо.
18А вана видечисэтнень кист – теке маней валскень зорясь,
конась яла седе валдоми ды валдоми – чинь куншкань кондямокс.
19Пазтомотнень кист вана – теке чопода отьмась:
сынь а содыть, мезес пупордить.
20– Цёрам! Явт покш мель монь валтнэнень,
панжить пилеть монь кортамотненень.
21Илить ёмсевте сынст сельметь икельде,
ванстыть сынст седей потмакссот.
22Эдь сынь максыть эрямо сенень, кие мусынзе,
ды кандыть шумбрачи сонзэ рунгонть туртов.
23Весе ванстовиксэть эйстэ сехте пек ванстт ойметь-седееть,
эдь сонзэ эйстэ лисить весе эрямонь лисьмапрятне.
24Кургот пекстык кенгелемадонть
ды турват юткова иля нолда манчиця валтнэнь.
25Кадык тонь сельметь ваныть видьстэ,
кадык вановтот каяви икелев.
26Арсик тонь молема янот,
кадык тонь китне улить кемевикст.
27Иля пурда а витев, а кершев.
Веёно кирдевть зыянонть эйстэ.
[28Эдь виде китнень мельга ваны Инешкипазось,
зыяновтнень китне – чирть-мурт.
29Инешкипазось видекс тейсынзе тонь кить,
ды якамоткак ладясынзе сэтьме лувсо.]
Глава 4