Выбрать язык
Книги Ветхого Завета
Книги Нового Завета
с русским текстом1– Цёрам! Марить монь превс путоматнень,
панжить пилеть монь превей валтнэнень.
2Сестэ тонь карми улеме чарькодьксчить
ды эрявикс валтнэнь ёвтамс содамочить.
[Иля кунсоло берянь обуця тейтерьаванть.]
3Эдь медьсэ вадезь лиянь нинть турванзо,
елейде чевтеть-соланят сонзэ валонзо.
4Мейле сон тееви сэпей нартемксэкс,
керятанзат кавто ёндонь пшти торокс.
5Пильгензэ ветить куломас,
эскельксэнзэ пачтить тоначис.
6Содамс эрямонь виде кинть арась мелезэ,
чирть-мурт янонзо сон а редияк.*а
7Секс, цёрам, кунсоломак монь
ды монь ёвтавт валтнэде иля пота.
8Лиянь нинть эйстэ кирдевть веёно,
кенкшезэнзэяк иля малавгале!
9Лиякс нардевчить*б максови яттнэнень,
эрямонь иеть – седеймарямонь а содыцятненень.
10Тонь вийсэть пештявить лиятне,
теевксэтькак туить ломанень лезэс.
11Ды кувсезеват меельце пелев,
зярдо лавшочись тунь пес пачтятанзат.
12Сестэ тон укстат: «Мекс монень эзть вечкеве превс путоматне,
мекс молинь мурнеманть-тонавтоманть каршо?
13Мекс эзинь кунсоло монь тонавтыцятнень вайгелест,
мекс пекстынь пилень превс путыцятнень валост эйстэ?
14Оштё эскелькс, ды мон бу правлинь визьксчамас весе ломантнень икеле,
пачкодевлинь ёмамос весень сельме икеле!».
15Симть ведь эсеть кедьгестэ,
амоляк ведь эсеть лисьмасто.
16Мезекс тонь лисьмапрятненень валновомс куринкань кувалма,
тонь чудикерькстнэнень – куншкакурова?
17Кадык сынь улить ансяк тонь,
иля явше эйсэст лиянень!
18Улезэ чанстязь-баславазь тонь лисьмапрясь,
кандозо теть кеняркс од шкасто саезь нить.
19Сон тонеть теке вечкевикс сёкань,*в
мазыйне, теке пандонь сея.
Кадык тонь свал кенярдовтыть лембе мештензэ,
кадык свал чаракавты прят сонзэ вечкемась.
20Цёрам! Мезекс тонеть превстэ лиснемс лиянь тейтерьаванть коряс
ды вадяшамс аволь эсеть нинть мештензэ?
21Эдь Инешкипазонть сельме икелеть ломанень китне,
Сон онкстни весе сонзэ янонзо.
22Зыяновонть кундасызь эсензэ теевть зыянтнэ,
сонзэ, теке пикссэ, керчасызь пежеттне.
23Сон кулы превс а путовтомадонзо,
ёми-кадови покш превтемечидензэ.
*а 5.6 Те тарканть евреень кельсэ ули лия чарькодемазояк: Саевлить мель чарькодемс сонзэ эрямонь кинзэ – янонзо чирть-мурт, ды тон сынст а кармат содамо.
*б 5.9 нардевчить – Синод. ютавтовкссонть: шумбрачить.
*в 5.19 сёкань – олень, лань.
Глава 5