Выбрать язык
Книги Ветхого Завета
Книги Нового Завета
с русским текстом1– Цёрам! Саить превс монь валон,
оймесэть ванстыть монь кармавтоман.
[Цёрам! Ловт Инешкипазонть ды кемекстават,
Сондензэ башка кидеяк иля пеле.]
2Кирдть монь кармавтовксон, ды эрямот ули уцяскав,
ванстт монь тонавтоматнень сельме эрьгедеть пек.
3Кандтнить сынст сурксонь таркас,
кирдть сынст седейсэть-оймесэть.
4Покш превейчинть лемдик эсеть сазорокс,
чарькодьксчинть ловик малавикс раськекс.
5Сестэ тон ванстоват лиянь нинть эйстэ,
валаня кельне тейтерьавадонть.
6Весть ульнесь истя: мон аштинь кудосо,
ванынь вальмань пельцянь пачк.*а
7Ушосто ламо од цёратнень ютксто неия,
тунь однэтнень вакссто редия
вейкенть, весемеде превтементь.
8Сон ютась ошкужонть трокс киулонтень
ды эскелязевсь вейке тейтерьаванть кудонтень.
9Чиськак валгокшнось, чокшнеськак новолекшнесь,
уш пек чопода векс велявтокшнось.
10Ды вана каршозонзо лиссь тейтерьавась,
усксевицякс оршазь, визьксэв мель марто.
11Сон мейсэяк акирдевикс ды визьксэнь а содыця тейтерьава.
Сон а соды оймамо, а аштевкшни кудосо.
12Эрси эли куринкасо, эли ошкужосо,
эли вансты-учи кудоужосо.
13Сон каподизе-кундызе од цёранть, палсизе
ды визькстэме чачосо кортазевсь:
14«Мон течи кандынь Пазонтень ладямонь анокс –
топавтыя алтамом, ды кадовсь ламо сывелем.
15Секс лисинь каршозот,
вешнинь тонь ды муитинь.
16Анокстыя удома таркам, ацыя ванькс ацамосо,
вельтия Египетэнь лияназонь мазый коцтсо.
17Алксом-прялксом пургсинь
миррасо, алоэсэ ды корицасо.*б
18Совак, карматано вечкезь налксеме-кольнеме,
валскес вечкемасонть пряс пешкелеме.
19Монь мирдем арась кудосо,
сон тусь васоло килангов.
20Ярмакт сайсь мартонзо сатышка,
секс кудов велявты ансяк пешксе ковонь чистэ».*в
21Ламо чевте валсо сон манизе цёранть,
соланя кортамосонзо тапардызе сонзэ.
22Од цёрась сеске тусь мельганзо,
кода букась печкема таркав, [кода пинесь содомас, ]
кода сёканесь моли чувозь латконтень,
23косо налось юты пачканзо, –
кода пистеньс ливти нармунесь,
сень апак сода: те пачтясы куломас.
24– Секс, цёрам, кунсоломак монь
ды монь ёвтавт валтнэде иля пота.
25Илязо маняво седееть ускурявицянь китненень,
иля кадновкшно сонзэ янтнэва.
26Эдь ламонь сон правтсь пильге лангсто,
а лововикс ламо ломанть ёмавтсь.
27Сонзэ кудозо пачти тоначинь отьмас,
сонзэ кизэ валги чопода калмос.
*а 7.6 вальмань пельця – вальмань решётка.
*б 7.17 Мирра (смирна) – тантей чинень чувтоой Аравиясто/ (/тб:Аравиясто тантейстэ качадыця пичеой?). Алоэ – чувто, конасто чуди тантей чине ой. Сон нолдави тевс кода ваднемапель, касы Индокитайсэ, ансяк те аволь цеця-кактус.
*в 7.20 пешксе ковонь чистэ – кавтошка недлянь ютазь.
Глава 7