Выбрать язык
Книги Ветхого Завета
Книги Нового Завета
с русским текстом1Марятадо? Покш Превейчись азоравакс терди!
Кунсолодо! Превейчинь вайгелесь кайсети!
2Сон ашти кепежа таркасо,
ки чиресэ, ки улосо.
3Ошонь ортатнень лангсо сон терди,
ошс совамо таркасонть ранги-сеери:
4– Тынк, ломанть, мон тердян,
весеменень тыненк монь тердемам!
5Эрямонь а чарькодицят, тонадодо чарькодьксчинтень!
Превтеметь-чаволат, пурнадо превть!
6Кунсолодо! Мон ёвтаса сехте эрявиксэнть,
монь кургсто лисить видечинь валтнэ.
7Монь келем пачти видечи,
кенгелемась – турвазон нулгодьксэв.
8Видеть весе монь кортамотне,
сынст эйсэ арась ёжовчи ды манчема.
9Сынь весе панжадот превеентень,
чарькодевикст содамочинь муицянтень.
10Сиядо питнеекс ловодо монь превс путоматнень,
сырнеде эрявиксэкс – содамочитнень.
11Эдь покш превейчись весемеде питней кевдеяк питней,
тонеть мельстуицятнень эйстэ мезеяк сонзэ ваксс а ладяви.
12Мон – Покш превейчись, мон эрян чарькодьксчинть марто вейсэ,
мон тонадынь содамочинтень ды паро превсэ арсемантень.
13Инешкипаздонть пелемась –
те зыянонь а вечкема.
Монень вельть а вечкевить покшкавтнемась
ды прянь верьга кандомась,
зыянонь теемась ды кенгелиця кургось.
14Монь кедьсэ – превс путомась, монь кедьсэ – тевсэ изнямось.
Мон – чарькодемась, ды монь марто виесь.
15Монь вийсэ инязортнэ кирдить азорксчинть,
монь вельде прявттнэ аравтнить виде койть.
16Монь вийсэ азорксчист топавтыть покштне,
чирязтнэ ды модалангсо весе судиятне.*а
17Кие вечксамам монь, сень монгак вечкса,
ды кие пек вешни монь – мусамам.
18Мон явшан сюпавчи ды инексчи,
свалшкань питнейчи ды видечи.*б
19Монь казнень весемеде паро сырнедеяк парт,
мондень лезэсь весемеде вадря сиядояк покш.
20Мон якан чумовтомочинь киява,
кеместэ эскелян видестэ судямонь янтнэва:
21эсь вечкицятнень мон казян паро казнесэ,
сынст мацтост-утомост пештян пародо.
[Эрьва чинь тевтнеде пачтямсто мон а стувтса
ледстямс кезэрень пингестэ лисезентькак].
22Инешкипазось монь раштымим
Эсензэ тевтнень ушодксокс,
Эсензэ весе теевкстнэде икеле,
мик шкатнедеяк икеле.
23Мон теезян-аравтозян шкатнень ушодовомсто,
мирэнть-масторонть теемадо икеле васенцекс.
24Мон чачинь, зярдо арасельть иневедтнеяк,
зярдо арасельть ведень ливтиця лисьмапрятнеяк.
25Мон чачинь, зярдо арасельть стявтозь пандтнэ,
зярдо оштё эзть ульне губорькстнэяк.
26Мон чачинь, зярдо Сон эзинзе тее моданть, паксятнень
ды васенце коморо модачелькентькак.*в
27Мон ульнинь тосо, зярдо Сон анокстась-аравтсь менеленть,
зярдо тешкстась менеленть ды иневеденть ютксо кирьксэнть,
28зярдо Сон вере кемекстась пельтнень,
зярдо виевгавтсь мода потсто чавиця лисьмапрятнень,
29зярдо Сон путсь иневедентень пень тешкс –
иляст лисне ведтне явозь тенст таркадонть васов, –
зярдо Сон аравтсь моданть юронзо.
30Мон ульнинь Сонзэ вакссо ёроков артыцякс-вачкицякс,
ульнинь Тензэ эрьва чинь кенярксокс
ды апак лотксе эрьгелинь-киштинь икелензэ.
31Сонзэ мирэнть-масторонть коряс эрьгелинь
ды ломантнень кисэ пек кеняркшнынь.
32– Эно, эйкакшт, кунсолодо монь!
Эдь уцяскавт сеть, кить молить монь кияванть.
33Кунсолодо превс путоматнень ды ультядо пек превеекс –
илядо пота эйстэст.
34Уцяскав ломанесь, кона кунсолы монь,
чистэ чис учи монь ортатнень лангсо,
кенкшем лангс ваны сельмензэ апак сайне!
35Эдь кие монь муимим, се муизе эрямонть,
ды Инешкипазось сенень путы паро мель.
36Монь каршо молицясь канды зыян ойменстэнь,
монь лангс кежень кирдицясь вечксы куломанть.
*а 8.16 эли: ды весе виде судиятне.
*б 8.18 видечи – те валонть те таркасо ули лия чарькодемазояк: уликсчи, сюпавчи.
*в 8.26 модачельке – пыль.
Глава 8