Выбрать язык
Книги Ветхого Завета
Книги Нового Завета
с русским текстом
Пек превей цёрась – кеняркс тетянстэнь,
превтеме цёрась – седей сянгоркс аванстэнь.
2Аволь видечисэ таштазь сюпавчись лезэ а канды –
куломадонть иди ансяк видечисэ эрямось.
3Инешкипазось видечисэ эрицянть вачодо а кадсы,
пазтомо эрицянть мелензэ Сон а топавтсы.
4Нузякс кедесь канды кажовчи,
парсте важодиця кедесь – сюпавчи.
5Кастозенть кизна пурныцясь – вельть чарькодиця,
нуема шкасто удыцясь – визьксчамас совиця.
6Видечисэнть пря лангс путозь чанстямо-баславамо,
пазтомонть кургосонзо кекшезь (м:лепштямо-?)нарьгамо.
7Видечисэсь чанстязь-баславазь мельсэ кирдеви,
пазтомонть лемезэяк ёми-наксады.
8Превеенть седейсэ ванстовить кармавтовкстнэ,
превтементь кургозо пачтясы зыянс.
9Кие моли виде киява, се яки апак пеле,
кие вешни чирть-мурт янт, се ули кундазь.
10Ёжовсто сельмень кончтнемась теи мельсапаро,
превтементь кургозо пачтясы зыянс.*а
11Видечисэнть кургозо – эрямонь лисьмапря,
пазтомонть кургосонзо кекшезь (м:лепштямо-?)нарьгамо.
12Пек авечкемась кирвазти сёвномат-аладямот,
а вана вечкемась вельтясынзе весе пежеттнень.
13Превеенть кургосонзо эри покш превейчи,
чаволанть рунгонтень эряви илев.
14Пек превейтне ванстыть-кекшить содамочист,
превтементь кортамонзо пачтить ёмамос.
15Сюпавонтень ули-парозо – теке кемекстазь ошозо,
кажовонтень арасьчизэ – сонзэ кажозо.
16Видечисэнть важодевксэнзэ – эрямонть туртов,
пазтомонть изнявксонзо – пежетенть туртов.
17Кие кунсолы превс путоманть, сень эрямонь кизэ паро.
Кие мельс а саи мурнеманть, се туеви-кадови кистэнзэ.
18Кие кекши кежензэ, сень кургозо кенгелицянь.
Кие сравтни берянь кулят, се превтеме.
19Ламонь кортыцясь пежеть вакска а ютави,
кинь вана онкстяви-пекстави кургозо – се теи превейстэ.
20Видечисэнть кортамозо сиядо питней,
пазтомонть арсемазо тунь питневтеме.
21Видечисэнть валсонзо ламот пешкедить,
превтеметне превень а сатомадост сынськак кулыть.
22Ансяк Инешкипазонть чанстямось сюпалгавты
ды а канды мартонзо ризкст-мелявкст.*б
23Чаволанть налксемазо – зыянов тевень теемась,
чарькодицянть кенярксозо – покш превейчись.
24Мезде пели пазтомось, се сонензэ улияк,
видечисэнтень максови мелензэ коряс.
25Юты давол, ды пазтомось косояк уш а ули,
видечисэсь вана кадови пингеде пингень юр лангсо.
26Нузяксось тевс кучицянстэнь
теке кургонтень уксусось,
теке сельметненень качамось.
27Инешкипаздонть пелемась ламолгавты эрямо читнень,
пазтомонть иензэ ловозь-нурькалгавтозь.
28Видечисэнть учомазо прядови кеняркссо,
а вана пазтомонть седейнежедьксэзэ ёми.
29Инешкипазонть кись ваньксчисэнтень – кеме кекшема тарка,*в
зыянонь теицянтень – пелема-ёмамо тарка.
30Видечисэсь таркасонзо пингеде пингес а чатазеви,
пазтомось моданть лангсо кувать а кирдеви.
31Видечисэнть кургосто чуди покш превейчи,
ядсо пургсиця келесь ули керязь.
32Видечисэнть кургозо соды ансяк паро валонть,
пазтомонть кургозо тыц пешксе визьксэв кенгелемасо.
*а 10.10 Грекень кезэрень ды славянонь ютавтовкстнэсэ стихенть омбоце пельксэсь истя: апак сёпо мурницясь ладявты.
*б 10.22 Эли: Ансяк Инешкипазонть чанстямось сюпалгавтанзат, эсь вийсэть тень ваксс мезеяк а путови.
*в 10.29 Евреень текстсэнть: Инешкипазось – ваньксчисэ эрицянтень кеме кекшема тарка.
Глава 10