Выбрать язык
Книги Ветхого Завета
Книги Нового Завета
с русским текстом1Инешкипазонтень нулгодьксэвть манчиця онкстамотне,
Сонзэ мельс тукшныть виде онкстамотне.
2Прянь верьга кандоманть мельга сы визьксчамась.
Сэтьмечинть марто сы покш превейчись.
[Видечисэ эрицясь куломадонзо мейле кады седейризкс,
пазтомонть куломась-ёмамось эрси апак учонь ды кенярксов.]
3Виде ойметнень вети ваньксчист,
салава сускицятнень ёмавты ёжовчист.
4Сюпавчись а лезды Пазонь (м:кирви?)кежень чистэнть*а,
куломадонть иди ансяк видечисэ эрямось.
5Ваньксчисэнть видечизэ валакавты кинзэ,
пазтомось пры-ёми эсь зыяновчидензэ.
6Виде ойметнень идесынзе видечист,
акемевикстнэ улить кундазь эсест берянь мельтнесэ.*б
7Пазтомонть куломанзо марто ёми седейнежедьксэзэяк,
койтеме ломаненть ёми учомазояк.
8Видечисэсь ули идезь кажодонть –
тарказонзо кажос понги пазтомось.
9Пазтомо эрицясь*в кортамосонзо ёмавты малавиксэнзэ,
видечисэтне идевить чарькодьксчисэст.
10Видечисэтненень паро – весе ошось эрьгели,
ёмасть-кулость пазтомотне – таго покш кенярксчи.
11Видечисэтнень чанстямосо ошось кепедеви,
пазтомотнень кортамотнесэ сон калавтови.
12Чаволась покорды малавиксэнзэ,
а вана чарькодицясь чатьмони.
13Берянь кулянь сравтницясь панжи салавачить,
кемевикс ломанесь машты тевенть сёпомо.
14Раськесь превс путомавтомо пры-ёми,
ламо превс путыцятнень марто сон эри-изни.
15Эстензэ зыян теи се, кие максы кемевтема вал лиянь долконзо кисэ.
Кие а капши валонь максомо, се ютави мелявкстнэнь вакска.
16Мельстуиця чачо марто нись ташты инексчи [мирденстэнь,
видечинь а вечкиця нись – сонсь визьксчамась.
Нузякстнэ эрить нужасо],
важодиця цёратне таштыть сюпавчи.*г
17Паронь теицясь паро неи,
казямо обуцясь эстензэ зыян теи.
18Пазтомонтень максови манчиця пандовкс,
видечинь видицянтень – алкуксонь казне.
19Видечинтень свал бажицясь муи эрямо,
зыянонть мельга пансицясь вешни кулома.
20Инешкипазонтень нулгодьксэвть ёжов ломантне.
Сонзэ мельс тукшныть виде киява молицятне.
21Кемть: зыяновось а кадови чумонзо апак пандовто (/м:зыяновонть чумозо а кадови апак пандовто?),
видечисэтнень буесь-раськесь идеви.
22Кода тувонь нерентень лади сырнень пинкскесь,
истя чавола тейтерьавантень – мазычись.
23Видечисэтнень учомаст пандови паросо,
пазтомотнень седейнежедьксэст – Пазонть виев (м:кирви?)кежсэ.
24Вейкесь важовсто явши – седеяк сюпалгады;
лиясь мезеяк а венсти – ялатеке кажовгады.
25Кие сюпавсто явши, сонськак сюпавчисэ ули,
кие лиянь симди, сонськак симдезь ули.
26Кие вачо шкасто сёпи сюро, сень сюдосызь,
сюронь микшницянтень – чанстязь сюконить.
27Кие бажи парос – се вешни Пазонть пельде мелень путома,
кие вешни зыян, сенень сон сыяк.
28Кие кеми-нежеди эсь сюпавчинзэ лангс, се пужи-певери,
видечисэтне пиже чувтокс касыть-келейгадыть.
29Кие эсь кудонзо лангс терди кажо, се кадови латовтомо.*д
Превтемесь тееви урекс превей седеентень.
30Видечинь видьменть эйстэ касы эрямонь чувто,
пек превеесь тарги эсензэ ёнов ломанень седейть.*е
31Бути видечисэнтень уш модалангсо максови тевензэ кисэ,
сестэ седеяк пандови пазтомонтень ды пежетевентень!
*а 11.4 Пазонь кежень чись – те чи, зярдо Пазось кучи кодамояк кажо (вачочи, ятт ды седе тов) весе раськентень а кунсоломанзо кисэ кежень пандомга.
*б 11.6 Тесэ ютавтынек евреень оригиналонть коряс. Грекень кезэрень ютавтовкссонть "берянь мельтнесэ" таркас ютавтозь "эсест ёмамосост". Синод.: Коень колсицятне улить кундазь коень колсемасост.
*в 11.9 Пазтомо эрицясь – Синод. лицемер – чачонзо полавтниця.
*г 11.16 Эли: казямо лувсо эрицятне таштыть ансяк сюпавчи.
*д 11.29 Эли: Кие эсь кудосонзо кирвазтни аладямот, се кадови мезевтемеяк.
*е 11.30 Эли: койтемечись нельги ломань ойметь.
Глава 11