Выбрать язык
Книги Ветхого Завета
Книги Нового Завета
с русским текстом1Кие вечки содамочить, се вечки превс путомаяк.
Кинень пек а вечкеви мурнемась-тонавтомась – се тунь превтеме.
2Паро ломанентень Инешкипазось путы паро мель,
а вана салава сускицянть Сон ловсы чумокс.
3Зыянонть вельде моданть лангсо кияк а кирдеви,
видечисэтне вана нолдасть кеме ундокст.
4Паронь теиця нись – мирдензэ туртов каштаз,
визьксчамас ветицясь – теке калмс паниця орма.
5Видечисэсь арси видестэ судямодо,
пазтомось – зыяндо-манчемадо.
6Пазтомонть валонзо пачтить верень валомас,
видечисэтнень валост – оймест идицят.
7Пазтомось ёми-сявори – мезеяк мельганзо а кадови,
а вана видечисэнть кудораськезэ кеместэ кирдеви.
8Ломаненть шныть превензэ коряс,
превиямо а бажицядонть безардить.
9Сюпавокс тейнеманть ды кши сускомовтомо эрямонть таркас
седе паро улемс сельмс а эцницякс ды тонстеть трямс прят*а.
10Видечисэсь мелявты ракшанзо уцяскаст коряскак,
а вана пазтомонть седеезэ калгодо.
11Кие соки-види моданзо, сень пекезэ ули пешксе.
Кие панси чаво бажамотнень мельга,*б се превтеме.
[Кинень вечкеви ютавтомс шканть винадо симнезь,
се кудонзо кады инексчивтеме.]
12Пазтомось бажи эстензэ скирдямс зыяновтнень саевксэнть эйстэ,
а вана видечисэтнень ундоксост максыть паро касовкст.
13Зыяновось кундави пежетев валсонзо,
видечисэсь вана лисеви кажотнестэ.
[Сэтьместэ ваныцянтень путыть седеймарямо,
орта лангсо пелькстыцясь лепштясынзе лиятнень.]
14Ломанесь пешкели кортамонзо паро кенерькстнэде,
кедьсэ теевксэнзэ велявтыть эстензэ казнекс.
15Превтемесь свал лови эсь кинзэ видекс,
пек превеесь кунсолы превс путомат.
16Превтемесь сеске невтьсы кежензэ,
превеесь сёпсы, мельтеме кадсы покордамонть.
17Ванькс ойме ломаненть валонзо видеть,
кенгелиця неицянть-яволявтыцянть – манчицят.
18Чаво валонь ёвтыцясь кери теке торосо,
пек превеень кортамось шумбралгавты.
19Видечинь валтнэ кадовить пингеде пингес,
кенгелематне – ансяк нурька шкас.
20Зыянонь арсицятнень седейсэ манчема,
сэтьмелувонь ладицятнень – кеняркс.
21Видечисэнтень а ули кодамояк берянь,
зыяновтненень – веень стакачить.
22Инешкипазонтень нулгодьксэвть кенгелицятне,
Сонензэ вечкевить видечисэ эрицятне.*в
23Превеесь кекши эсь содамочинзэ,
чаволась лангс тарги превтемечинзэ.
24Важодемань вечкицясь тееви прявтокс,
нузяксось карми важодеме сонзэ кедь ало.
25Седейризксэсь лепшти ломаненть,
паро валось эрьгелевти сонзэ.
26Видечисэсь невти ки малавиксэнстэнь,
пазтомонть кинзэ кадовтыцят-тапавтыцят.
27Нузяксонтень а кундави идем ракшаськак,
важодицясь ташты ламо сюпавчи.
28Чумовтомочинть килангсо – эрямось,
сонзэ янонть лангсо кулома арась.*г
*а 12.9 Эли: ...улемс сельмс а эцницякс ды кирдемс эсеть важо.
*б 12.11 Синод. ютавтовкссонть: Кие моли важодемань а вечкицятненьмельга.
*в 12.22 Синод. ютавтовкссонть: видечинь ёвтыцятне; евр. ды славянской тексттнэсэ: видечинь теицятне.
*г 12.28 Кезэрень грекень ютавтовкссонть: Чумовтомочинть килангось вети эрямос, чирь-мур янтнэ – куломас.
Глава 12