Выбрать язык
Книги Ветхого Завета
Книги Нового Завета
с русским текстом
1Пек превей цёрась кунсолы тетянзо превс путоматнень,
визькстэмесь-згилицясь а мари мурнематнень.
2Ломанесь пешкели кортамонзо тантей кенерькстнэде,
коень колсицятне бажить зыянс.
3Кие онкстни-пекстни кургонзо, се вансты эрямонзо,
кие келейстэ автни кургонзо, се понги кажос.
4Нузяксось покш мельсэ учи, ансяк стяко,
а вана важодемань вечкицясь оймева пештяви.
5Видечисэнтень вельть а вечкевить манчемань валтнэ,
пазтомось вана чопавтсь визьксчамас ды покордамос.
6Ваньксчисэ эрицянть вансты видечись,
пежетевенть ёмавты койтемечись.
7Вейкесь невти прянзо сюпавокс, куш сонзэ мезезэяк арась.
Лиясь невти прянзо кажовокс, куш сонзэ ули покш сюпавчизэ.
8Сюпавось ванстасы эрямонзо сюпавчисэнзэ,
арасьчисэ эрицянть кияк а тандавтнияк.
9Видечисэнть валдось эрьгелезь сияжды,
пазтомотнень штатолост апак учо мади.
[Манчиця ойметне азгондить пежеттнесэ,
видечисэтне седеймарицят ды вечкицят.]
10Прянь верьга кандыцядонть лисить ансяк сёвномат,
пек превей се, кие кунсолы превс путомат.
11Шождасто сазь сюпавчись сравтневи,
ямксонь-ямкс таштазесь ламолгады.
12Кувать а топавтовиця учомась – седейсэредькс,
топавтозь бажамось – эрямонь чувто.
13Кие мезекскак а путы тонавтоманть, се эстензэ теи зыян,
кинень питнейть кармавтоматне, сенень максови казне.
14[Манчиця цёранть туртов мейсэяк парось а неяви,
а вана превей уренть тевензэ молить вадрясто, кизэяк виде.]*а
15Превеень тонавтоматне – эрямонь лисьмапря,
сынь ванстыть куломань кундамкатнеде.
16Шумбра превтне ломанентень кандыть мелень путома,
койтеметнень кист пек стака, казямо.*б
17Эрьва превеесь тевензэ топавты чарькодьксчи марто,
чаволась весень икелев тарги превтемечинзэ.
18Кулянь беряньстэ кандыцясь понги зыянс,
кемевикс кучовицясь канды идема.
19Кие мельс а саи превс путоматнень,
сень учи кажовчи ды визьксчама,
кие кунсолы мурнематнень, сенень ули инексчи.
20Топавтозь мелесь-бажамось вечкеви ойментень,
чаволантень пек стака явовомс зыянонть эйстэ.
21Пек превеенть марто малавгалемась превейгавтанзат,
превтементь марто якамось зыянс пачтятанзат.
22Пежетевенть мельга панси зыян,
видечисэнтень пандови паросо.
23Паро ломаненть сюпавчизэ кадови эйкакшонстэнь-нуцьканстэнь,
пежетевенть таштазесь туи видечисэнтень.
24Ламо сюро чачокшны кажовонть паксясояк,
ансяк авидечись нельгсы сонзэ норовонть.*в
25Кие жали илевензэ, се а вечксы эйкакшонзо;
кие вечксы, се вишкинестэ саезь казямосто путы эйсэнзэ превс.
26Видечисэсь ярсы пешкедемазонзо,
пазтомотне кадовить вачодо.
*а 13.14 14-це валрисьмесь евреень Библиясонть арась. Сон саезь славянонь текстстэнть.
*б 13.16 Грекень кезэрень ютавтовкссонть стихенть омбоце пельксэсь: койтеметнень кист вети куломас-ёмамос.
*в 13.24 Синод. ютавтовкссонть: кой-конат вана ёмить авидечиде.
Глава 13