Выбрать язык
Книги Ветхого Завета
Книги Нового Завета
с русским текстом1Превей нись кудо стявты,
чаволась эсензэ кедьсэ калавтсы.
2Инешкипаздонть пелицясь моли виде киява.
Кие Инешкипазонть мезекскак а лови, сень кинзэ чирть-мурт.
3Превтементь валтнэ – локшо сонзэ прянь верьга кандомантень.
Пек превейтнень валтнэ – сынст ванстыцят.
4Косо арасть букат, тосо андома очкотне чавот;
виев букатнень марто чачи сюрось.
5Виде неицясь-яволявтыцясь а манчи,
аволь видесь лексияк кенгелемасо.
6Визькстэмесь-згилицясь вешни покш превейчи, ансяк а муи;
чарькодицянтень содамочись шождасто панжови.
7Чаволанть эйстэ кирдевть веёно –
сонзэ пельде превей валт а учовить.
8Чарькодицянть покш превейчизэ – эсензэ кинть содамосонть,
чаволатнень превтемечист – эсь прянть манчемасонть.
9Превтеметне ансяк пеедькшнить пежетест лангсо,
а вана видечисэтненень максови Пазонть паро мелезэ.
10Ансяк седеесь соды ломаненть ризксэнзэ,
лия марто а явовить сонзэ кеняркстнэяк.
11Койтеметнень кудост кажовгады-калады,
видечисэтнень эрямо таркаст касы-кепети.
12Ламо китне неявить ломанентень видекс,
куш сынь ветить-пачтить куломас.
13Эрси, пейдемстэяк седеесь карми сэредеме,
эрьгелемадо мейлеяк сакшны ризкс.
14Виде кинь кадыцянтень пандови тевензэ коряс,
паро ломанентеньгак, нама, максови теезензэ туро.
15Эрямонь а содыцясь кеми эрьва валонтень,
чарькодицясь эрьва эскельксэнзэ арсесы.
16Пек превеесь пелезь айги зыянонть эйстэ веёнов,
превтемесь ацирьгали ды тейни апелицякс.
17Курок пизякалицясь тейни превтеме тевть,
салава сускицянтькак пек а вечксызь.
18Чаволатненень уцяскакс максови превтемечи,
чарькодицятненень – содамочинь каштаз.
19Зыяновтненень сави сюконямс паро ломантнень икеле,
пазтомотнеяк аштить видечисэтнень ортаст икеле.
20Эрси, кажовонть а вечксызь натой малавиксэнзэяк,
а вана сюпавонть ламо ялганзо-оянзо.
21Кие безарди малавикстэнзэ, се теи пежетть,
кие путы седеймарямо кажовнень, се уцяскав!
22Зыянонь арсицятне свал ильведькшныть.
[Зыянонь теицятне а содыть алкуксонь вечкема ды видечи.]
Алкуксонь вечкемась ды видечись – паронь арсицятнень марто.
23Эрьва важодемадонть ули лезэ,
чаво валтнэ кандыть ансяк арасьчи.
24Превейтнень каштазост – сюпавчист,
чаволатнень мазылгавтыцяст – превтемечист.*а
25Видестэ кортыця неицясь-кемекстыцясь иди ойметь,
кенгелицясь лексияк зыянов кенгелемасо.
26Инешкипаздо пелемась – те кеме седейнежедькс,
Сон – кекшема тарка Эсензэ эйкакшонзо туртов.*б
27Инешкипаздо пелемась – те эрямонь лисьмапря,
сон вансты куломань кундамкатнеде.
28Инязоронь инексчись ламо ломаньсэнзэ,
прявтонтень кажо, зярдо ломантне аламолгадыть.
29Коронь кирдиця ломаненть превензэ ламо.
Пизякалицясь невти превтемечинзэ.
30Седеесь сэтьме – рунгоськак шумбра-паро,
сельмень сявадомадо ловажатнеяк наксадыть.
31Кие лепшти арасьчисэнть, се покорды сонзэ Теицянть.
Кие путы седеймарямо кажовнень, се шны-инелгавты Пазонть.
32Пазтомось пры-ёми эсензэ зыяндонть,
видечисэсь куломстонзояк муи кекшема тарка.*в
33Покш превейчись эри чарькодицянь седейсэ.
Эно, чаволатнень ютксояк сон невти прянзо.*г
34Видечись раськенть теи инекс,
пежетесь сонзэ вети визьксчамас.
35Инязорось путы паро мель ёроков важонтень.
Сонзэ виев кежесь – визьксчамас совавтыця цёлаконтень.
*а 14.24 Синод. ютавтовкссонть: чаволатнень превтемечист улияк (кадовияк) превтемечикс.
*б 14.26 Эли: Инешкипаздо пелемась – те кеме седейнежедькс, кекшема тарка эйкакшот туртовгак.
*в 14.32 Эли: видечисэсь ваньксчисэнзэ муи кекшема тарка.
*г 14.33 Эли: Чаволатнень потмоёжосо сон а эрси.
Глава 14