Выбрать язык
Книги Ветхого Завета
Книги Нового Завета
с русским текстом1Сэтьмечисэ сэвезь кши кочомось седе паро
аладямсто аноксонь сывельде тыц пештязь кудодонть.
2Ёроков уресь кедь-коморсо кирди азоронзо азгондиця цёранть
ды явсынзе азоронть сюпавчинзэ сонзэ цёратнень марто.*а
3Сиянть солавтомс – тигелесь,*б сырненть туртов – каштомось.
Седейтнень жо ваны-варчтни Инешкипазось.
4Зыянонь теицясь кунсолы апаро кортамот,
кенгелицясь мари куловтыця валт.
5Кие пеедькшни арасьчисэ эрицянть лангсо, се покорды сонзэ Теицянть.
Кие кенярды лиянь кажонтень, се а кадови чумонзо апак пандовто
[, а вана седеймарицянтень путови седеймарямо].
6Сыретнень каштазост – цёраст цёратне;
эйкакштнень прянь шнамост – тетяст-аваст.
[Кемевиксэнть уличизэ – весе масторлангось,
аволь кемевиксэнть мезезэяк арась].
7А ладить аптюконтень инелгавтнемань кортамотне.
Седеяк а ладить вадря ёндо содавиксэнтень кенгелемань валтнэ.
8Салавань казнесь максыцянстэнь неяви питней кевекс:
мартонзо ков илязо пшкаде, весемесь лиси валанясто.
9Кие вешни вечкема, се стувтсы лиянь пежетенть,
кие одс ледстни эйстэнзэ, се ёмавтсы ялганзо.
10Чарькодицянть туртов мурнемась седе виев
чаволанть туртов сядо вачкодькстнэде.
11Кежень сыргавтыцясь бажи ансяк зыянс,
секс лоткавтомонзо кучови кулянь кандыця, кона а соды седеймарямо.*в
12Седе паро вастомс авака овто, кона ёмавтынзе левксэнзэ,
чаволанть превтемечинзэ марто вастовоманть таркас.
13Кие паронть кисэ панды зыянсо,
сень кудосто зыянось а туи.
14Сёвномань ушодксось теке чудикерьксэнть чадыведекс теевемась:
секс оймавтык прят сонзэ виевгадомадо икеле.
15Инешкипазонтень нулгодьксэвть кавонест:
кие чумовтомокс лови зыянонь теицянть
ды кие чумокс лови чумовтомонть.
16Чаволантень ярмактне а мезекс:
превейчинь рамамс сонзэ ялатеке арасть превензэ.
[Кие теи лиятнеде сэрейстэ кудонзо, се вешни тапавома-кулома,
кие пря кайси тонавтнемадонть, се пры-ваи кажос.]
17Ялгась-оясь вечктянзат свал,
ялаксоськак чачозь кажосо лездыцякс.*г
18Превтеме се, кие саи эсензэ лангс лиянь долконзо
ды максы вал эсь малавиксэнзэ (/м:лия ломаненть/ лиянть?) кисэ.
19Кие вечки сёвномат, се вечки пежеть.
Кие лиятнеде сэрейстэ кепеди ортанзо, се эстензэ вешни прамо.
20Ёжов седеесь а муи уцяска,
кенгелиця келеськак понги зыянс.
21Кие раштась чавола, се видьмензэ максызе эстензэ ризксэкс:
аптюкось тетянстэнь кеняркс а канды.
22Кенярксов седеесь сехте паро шумбралгавтыця,
нусманя оймесь – рунгонь костиця.
23Пазтомось саи салавань казне
ды коласы виде судямонть.
24Чарькодицясь сельмензэ икеле кирди покш превейчинть,
чаволанть сельмензэ кайсетить моданть весе петнес.
25Превтеме цёрась – мельсапаро тетянстэнь
ды покордамо тиринь аванстэнь.
26Берянь тев – пандовтомс чумовтомонть кедьстэ,
видечинь коламо – чавомс вадря ёндо содавиксэнть.*д
27Превеесь ёвты валонзо арсезь,
чарькодицясь кортамсто а капши.
28Превтемеськак чатьмонемстэнзэ маряви пек превеекс,
зярс кургонзо а панжсы – ловсызь чарькодицякс.
*а 17.2 Синод. ютавтовкссонть: ды явсынзе азоронть парочинзэ лелятнень-ялакстнэнь марто.
*б 17.3 тигель – солавтома кедьге.
*в 17.11 Синод. ютавтовкссонть: кежей ангел. Евреень кельсэ "кулянь кандыця" валонть вейке смустезэ "ангел".
*г 17.17 Синод. ютавтовкссонть: ды ялакс ладсо сы лездамо кажонь шкасто.
*д 17.26 Синод. ютавтовкссонть: Берянь тев – чумондомс видечисэнть ды чавомс вадря ёндо содавиксэнть видечинть кисэ.
Глава 17