Выбрать язык
Книги Ветхого Завета
Книги Нового Завета
с русским текстом1Кие эри эсь мелензэ коряс ды эсензэ кисэ,
се стясь весе превеенть каршо.
2Чаволась сонсь а вечки содамочить,
ялатеке невтневель эсензэ превензэ.
3Зыяновонть марто сы безардема,
покордамонть мельга моли визьксчама.
4Ломанень кургсто лисиця валтнэ – домка-сэрей ведть,
покш превейчинь лисьмапрясь – виев чудикерькс.
5Берянь савтомс зыянонь теицянтень
ды судсо а лездамс чумовтомонтень.
6Чаволань келесь вети сёвномас,
валонзо пачтить эсензэ чавомас.
7Чаволанть келезэ – сонзэ ёмамозо,
кургозо – алтыма*а ойменстэнь.
8[Нузяксонть правтсы пелемазо,
ды тандалиця ойметне кадовить вачодо.]*б
9Кенгелицянь валтнэ – теке тантей ярсамопель:
сынь домкасто совить ломаненть потс.
10Нузякс-цёлак важодицясь –
те калавтыцянть-яжицянть ялаксозо.
11Инешкипазонть лемесь – кемедеяк кеме пирявтконякс.*в
Видечисэсь тозонь чии – ды сон идезь.
12Сюпавонтень уличись – теке кемекстазь ошозо,
кона сонензэ маряви ванстыця сэрей пирявксокс.
13Прамонть икеле моли прянь верьга кандомась,
инексчинть икеле моли сэтьме обуцясь.
14Кие максы каршо вал педе-пев апак кунсоло,
се превтеме ды сови визьксчамас.
15Виев оймесь цидярдсынзе сэредематнень-орматнень.
А вана кие цидярдсы лавшомозь ойменть?*г
16Чарькодицянь седеесь ташты содамочить,
пек превеень пилеськак вешни содамочить.
17Казнетне-кандовкстнэ келейгавтсызь ломаненть кинзэ
ды пачтясызь сонзэ чирязтнэнень-прявттнэнень.
18Судямо тевсэнть васня маряви видекс се, кие васенцекс корты.
Те зярс мартонзо пелькстыцясь а ушоды весементь ванкшномо.
19Жеребеесь лоткавты пелькстамотнень
ды путы пе виевтнень ютксо карадо-каршо аштемантень.
20Покордавозь ялаксось кеме ошто а изнявикс,
сёвноматне явить ломантнень – теке ошпандонь*д ортасо тулотне.
21Мазый кортамосонзо ломанесь пешти пекензэ:
мезе максови тензэ келензэ-валонзо кисэ, теньсэ пешкедияк.
22Эрямось ды куломась – келенть азорксчинзэ алот.
Кить маштыть келенть онкстямо-кирдеме,
сеть марясызь сонзэ кенерькстнэнь танстест.
23Кие мусь [вадря] ни, се мусь парочи,
ды Инешкипазось макссь тензэ чансть.
[Кие паньсы вадря нинзэ, се паньсы уцясканзо.
Ускурявиця тейтерьавас салава яксицясь
превтеме ды визькстэме.]
24Арасьчисэсь веши энялдозь,
сюпавось корты казямосто.
25Кинь ламо ялганзо, се паро илязо учне.*е
Виде, ялгась лиясто ялакстояк кемевикс ды вечкиця.
*а 18.7 алтыма – сеть.
*б 18.8 8-це валрисьмесь евреень Библиясонть арась.
*в 18.11 пирявтконякс – башня.
*г 18.15 Синод. ютавтовкссонть: А вана кие кемекстасы лавшомозь ойменть?
*д 18.20 ошпандо – крепость.
*е 18.25 Синод. ютавтовкссонть: Кинень эрявить ялгат, сенень сонстензэяк улема ялгань вечкицякс.
Глава 18