Выбрать язык
Книги Ветхого Завета
Книги Нового Завета
с русским текстом1Улемс кажовокс ды эрямс ваньксчисэ седе паро
[сюпав] кенгелиця кургокс ды текень пес чаволакс улемадонть.
2Эрязкалемась а лезды содамочивтеме.*а
Вельть капшицясь веёнов чалгавкшны, пупордякшны.
3Ломаненть кинзэ лангсто кадовты превтемечизэ,
седеезэ ялатеке Инешкипазонть лангс кежиявтни.
4Сюпавчись ламолгавты ломаненть ялганзо,
кажовонть эйстэ оятне туить.
5Манчиця неицясь-яволявтыцясь а кадови чумонзо апак пандовто,
кенгелицянтень прязо ялатеке а идеви.
6Ламот савтнить покш прявттнэнень,
ды эрьвась (–?) ялга казнень максый ломанентень.
7Кажовонть а вечксызь весе ялаксонзо,
седеяк пек эйстэнзэ васолгалить ялганзо:
снартни мартост кортамс – стяко.
8Кие пурны превть, се вечксы эсь оймензэ,
кие вансты чарькодьксчинть, сенень максови уцяска.
9Манчиця неицясь-яволявтыцясь а кадови чумонзо апак пандовто,
ды кенгелицясь ёми-кулы.
10Чаволантень а лади эрямс сюпавчисэ,
седеяк пек урентень – улемс азорокс чирязтнэнь лангсо.
11Паро превтне кирдить ломаненть куроксто кежиявтоманть эйстэ,
ды сонзэ туртов инексчи – лиянь чумонь нолдамось.
12Инязоронь кежесь – теке левень урнома,
мелень путомазо – луганар лангсо ведьбайгетне.
13Превтеме цёрась – седей сянгоркс тетянстэнь.
Машнетиця-сёвныця нись – теке кудо латосо варя.
14Кудось ды ули-парось кадовить тетят-ават пельде,
превей-ёроков нись казеви Инешкипазонть пельде.
15Нузяксчись вети удомас-нувсемас,
важодемань а вечкицясь карми кирдеме вачочи.
16Кармавтовксонь топавтыцясь вансты эсь оймензэ,
эрямонь кидензэ а мелявтыцясь кулы-ёми.
17Кие (м:седеймарязь?) теи паро кажовонтень, се максы долкс Инешкипазонтень,
ды Инешкипазось тень велявтсы тензэ ламонькирда.
18Цёрат превс путт казямосто, зярс ули эйзэнзэ кемемачи –
тон эдь а бажат сонзэ куловтомс-ёмавтомс.*б
19Кежейгалицясь кадык марясы чумонзо пандовтоманть:
эдь бути сонзэ идесак ней, тонеть сави тень тейнемс мейлеяк.
20Кунсолок превс путомат, иля безарде мурнемадо –
истя шкань ютазь тееват пек превеекс.
21Ломаненть седейсэ кирдевить ламо мельть-арсемат,
а вана эйстэст топавтовить ансяк Инешкипазонть аравтовкстнэ.
22Ломаньсэнть питнеекс ловови кемевиксчись,
кажовсто эрицясь кенгелицядонть вадря.
23Инешкипаздо пелемась канды эрямо:
мелеть витезь кармат удомо,
ды зыянось а пры тонь лангс.*в
24Нузяксось нолдасы кедензэ ваканс,
а вана кургозонзо кандомс арась мелезэ.
25Вачкодик визькстэменть-нарьгицянть – чаволаськак сови превс,
мурник чарькодицянть – сон седеяк превии.
26Тетянзо покордыцясь ды кудосто аванзо паницясь –
визькстэме ды тюнгольксэнь цёра.
27Цёрам! Лоткат превс путоматнень кунсоломадо –
туеват содамочинь кистэнть.*г
28Апаро ойме неицясь-яволявтыцясь нарьги-пеедькшни видестэ судямонть лангсо,
пазтомось покш мельсэ нильни авидечинть.
29Судямотне анокстазь визькстэметненень-нарьгицятненень,
локшосо керямотне – чаволань кутьмерентень.
*а 19.2 Синод. ютавтовкссонть: Ойментень аволь вадря содамочивтеме.
*б 19.18 Эли: – ансяк вант, иляк машто сонзэ. Синод. ютавтовкссонть: ды иля ацирьгале сонзэ пижнемадо.
*в 19.23 Синод. ютавтовкссонть: ...кинь эйсэ сон ули, сень мелезэ свал ули витезь, ды зыянось а пры сонзэ лангс.
*г 19.27 Евреень текстсэнть: содамочинь валтнэде.
Глава 19