Выбрать язык
Книги Ветхого Завета
Книги Нового Завета
с русским текстом1Винась нарьгиця, пуресь аксунгавтыця.
Превтеме эрьвась, кие сындест пупордякшни.*а
2Инязоронь кежтне теке левень урнома,
кие сонзэ ацирьгавты, кадык пели эрямонзо кисэ.
3Паро тевесь – аштемс аладямотнень эйстэ веёно,
а вана эрьва превтемесь капши сюлмавомс эйзэст.
4Нузяксось шкастонзо а соки,
секс нуема шкасто вешни ды мезеяк а муи.
5Ломанень седеень арсематне теке домка-сэрей ведть,
а вана чарькодицясь сынст амолясынзе.
6Ламот пряст шныть кемевиксчисэст.*б
Муеви-арась видечисэ эриця ломань?
7Видечисэсь эри-ашти ваньксчисэ,
тень кисэ уцяскавт эйкакшонзояк-нуцьканзояк.
8Инязорось, судиянь ине эзем лангсо аштезь,
вановтсонзо понжавтсы весе зыяновонть.
9Киненьгак ёвтави-арась: «Мон ванськавтыя седеем,
мон олякстоминь эсень пежеттнень эйстэ.»?
10Инешкипазонтень нулгодьксэвть манчиця онкстамопельтне:
гирятне, конат рамамсто стакат, миемстэ шождат.
11Ломанесь тунь одсто уш содави тевензэ коряс:
ваньксстэ-аволь, видестэ-аволь вети сон эсь прянзо.
12Мариця пиленть ды неиця сельменть –
теньгак ды тонаньгак теинзе Инешкипазось.
13Вечкат удома-нувсема – сы теть арасьчи,
сельметь кирдят панжадо – кармат ярсамо пешкедемазот.
14«Берянь, берянь», – сялды рамицясь.
Зярдо туи, ушоды рамавкссонзо прянь шнамо.
15Ули сырне ды эрьва кодат мазый кевть,
ансяк сындест седе питнейть превей валтнэ.
16Саик сень оршамопелензэ, кие макссь вал а содавикс ломанень долконзо кисэ:
ванст те оршамопеленть икелев пандомакс лиятнень туртов.*в
17Манчема вельде саезь кшись пек тантей,
ансяк мейле сон кургосот тееви чуварокс.
18Мельтне-арсематне кемекставить вейсэ толковамсто,
кунсолок превс путомат войнань-тюремань ветямсто.
19Кие сравтни берянь кулят, се панжи салавачитькак.
Иля уле ояксчисэ сень марто, кие келейстэ автни кургонзо.
20Кие сюды тиринь тетянзо-аванзо,
тонань эрямонь толозо лепами дюм чоподас.
21Капшазь саезь-нельгезь сюпавчись
мейле а велявты теть чанстямокс-парокс.
22Зыянонть кисэ иля бажа тонськак пандомс зыянсо:
максык прят Инешкипазонтень, ды Сон теть лезды.
23Инешкипазонтень нулгодьксэвть манчиця гирятне,
Сонензэ берянь тев – авиде онкстамопельтне.
24Инешкипазось вети ломаненть эськельксэнзэ,
эдь кияк а содасы-а чарькодьсы эсь кинзэ.
25Инешкипазонтень алтамонь максомадо икеле
парсте арсик – илязат карма янксеме.
26Превей инязорось понжавтсынзе зыянонь теицятнень
ды юты лангаст пивсэма чарысэ.
27Ломанень оймесь – Инешкипазонть пельде валдомтыця:
сон пачк невтьсы, мезе седейсэнть.
28Кемевикс вечкемась ды видечись ванстыть инязоронть.
Кемевиксчисэнть кирдеви сонзэ инязорксчизэ.
29Од ломантнень каштангавты виест,
сыретнень мазылгавты шержейчист.
30Аржотне*г ды румовкстнэ ванськавтыть зыянонть эйстэ,
вачкодькстнэ кандыть лезэ ломанень потмоёжонтень.
*а 20.1 Эли: кие эйзэст правты.
*б 20.6 Синод. ютавтовкссонть: Ламот шныть ломаненть седеймарямонзо кисэ.
*в 20.16 Евреень вейке текстсэ – "лиятнень туртов", лия текстсэ – "лиянть нинзэ туртов".
*г 20.30 аржо – рана, рубец.
Глава 20