Выбрать язык
Книги Ветхого Завета
Книги Нового Завета
с русским текстом1Инязоронь седеесь – Инешкипазонть кедьсэ,
теке чувозь латкова чудиця ведесь:
ков мелезэ, тов Сон пурдасы-велявтсыяк.
2Ломанентень эсензэ кизэ свал маряви видекс,
ансяк Инешкипазось онкстни-варчтни седейтнень.
3Видечинть ды судонть видестэ топавтомась
Инешкипазонть мельс тукшны анокстояк пек.
4Пазтомотнень обуцянь ёнксост: прянь верьга
кандыцянь вановт ды покшкавтницянь седей.
Неть пежеттне сынст валдомтыцяст.
5Важодемань вечкицянть мелензэ-превензэ ветить сюпавчис,
курок сюпалгадомо бажицясь понги арасьчис.
6Кие сюпавчинзэ ламолгавты манчезь-кенгелезь,
се панси варма мельга ды вешни куломанть.
7Пазтомотнень ёмавтсынзе эсест нарьгамост,
эдь сынь потасть видечинть эйстэ.
8Зыянонь теицянть кинзэ чирть-мурт,
ваньксчисэ эрицянть тевензэ видеть.
9Машнетиця ни марто паро кудосо эрямодонть
седе паро эрямс лато ужосо.
10Пазтомонть оймезэ свал бажи зыянс,
ялгазояк а муи сонзэ пельде седеймарямо.
11Пандовтык визькстэменть-нарьгицянть чумонзо – чаволаськак сови превс,
превс путык превеенть – сон седеяк сюпалгавтсынзе содамочинзэ.
12Видечинь Пазось ванкшны-неи зыяновтнень кудост
ды правты сынст кажос-ёмамос.*а
13Кие потли пилензэ арасьчисэ рангицядонть,
се сонськак карми рангомо ды а ули марязь.
14Салавань казнесь мадсти кеж,
кекшезь максовксось оймавты ацирьгадома.
15Судонть видестэ топавтомась – те кеняркс видечисэнтень
ды тандавкс зыянонь теицянтень.
16Кие кадызе превейчинь кинть,
се курок понги кулозтнень промксос.
17Кие вечки эльнема-эрьгелема, се кажовгады,
кие вечки вина ды тантейстэ ярсамо, се а сюпалгады.
18Чумонь пандовтомас понги зыяновось – аволь видечисэсь,
понги ёжовось-кенгелицясь – аволь ванькс оймесь.
19Машнетиця ды кежев ни марто эрямодонть
седе паро эрямс тунь ськамот чаво таркасо.
20Превеенть кудосо свал ули сюпавчи ды таштавкс,
чаволась весементь ютавты-ёмавты.
21Кие бажи видечис ды кемевикс вечкемас,
се муи эрямо, видечи ды инексчи.
22Превеесь сайсы виев ушмантнэнь ошосткак,
калавтсы ошпандосткак,
конань лангс сынь кемсть-нежедсть.
23Кие сускозь кирди келензэ,
се кажодо вансты оймензэ.
24Прянь верьга кандыця зыянов ломанесь –
визькстэме-нарьгиця сонензэ лем, –
сонзэ покшкавтнемань тевензэ а онкстявицят, а онкставицят.
25Нузяксонть куловтсызь сонзэ бажамонзо,
эдь сонзэ кедтнень арась мелест важодемс.
26Истямось чиде чис пек бажи ансяк мелензэ топавтомантень,
а вана видечисэсь явши важовсто, апак жаля.
27Пазтомонть кандовксось-аноксось – нулгодьксчи.
Седеяк пек, зярдо сон максови зыяндо арсезь.
28Кенгелиця неицясь-яволявтыцясь кулы-ёми,
а вана виде неицянть-яволявтыцянть свал кармить кунсоломо.*б
29Пазтомось невтьсы чаманзо визькстэмекс,
видечисэсь вана кеместэ юты эсензэ киява.
30Кие Инешкипазонть каршо, сенень а лездыть покш превейчись,
чарькодьксчись ды превс путомаськак.
31Айгоронть анокстыть тюремань чинтень,
ансяк изнямось – Инешкипазонть пельде.
*а 21.12 Евреень текстсэ "Видечисэсь" валсонть сеедьстэ невтеви Пазонть лангс. Синод. ютавтовкссонть: Видечисэсь ваны зыяновтнень кудост ды неи, кода сынь прыть кажос-ёмамос.
*б 21.28 Эли: меельце валось сень, кона весементь маризе.
Глава 21