Выбрать язык
Книги Ветхого Завета
Книги Нового Завета
с русским текстом1Мон меринь седеень туртов: «Эно, варчнетян тонь кеняркссо-эрьгелемасо*а, витик мелеть паронть-уцясканть эйсэ». Ансяк теяк – смусттеме!2Ракамодонть мон меринь: «Чаволачи!», ды эрьгелемадонть: «Кодамо эйстэнзэ лезэсь?»3Сестэ мон снартынь ливчакавтомс эсь прям винасо, истя каямс прям чаволачис ды, теке шкастонть, ванстомс покш превейчинть. Мон снартынь неемс, мейсэ парось ломантнень туртов, мезе тенст теема менеленть ало нурька эрямост перть.
4Мон топавтынь ине тевть: стявтынь эсень туртов кудот, озавтынь винаумарь пиреть,5мазылгавтынь-паролгавтынь эсень туртов садпиреть ды вирьпулот, козонь озавтынь умарьчувтот-мезть.6Вирьпулотнесэ касыця чувтотнень валномс мон теинь ведень кирдема таркат.7Раминь уреть ды уреават, ульнесть эсень кудосо чачозь уреньгак. Покш ды вишка ракшангак таштавсть пек седе ламо весе сетнень коряс, кить эрясть Иерусалимсэ мондень икеле.8Пурнынь эстень сия ды сырне, питней кевть-мезть инязортнэнь ды масторонь эрямо ёнкстнэнь пельде. Раминь морсицят – цёрат ды тейтерьават. Монь ульнесть эрьва цёраломанень кенярдовтыцят-ёжонь витицяткак – ламодояк ламо нить-наложницат*б. Весемесь – ёжом витеманть туртов.
9Истя мон теевинь весемеде инекс ды сюпавокс сетнень коряс, кить эрясть Иерусалимсэ мондень икеле. Теке марто покш превейчимгак кадновсь мартон.10Мезе лангс а праволь вановтом – эзинь карда прям мездеяк, седеем эзинь кирде кодамояк кенярксто-эрьгелемадо. Виде, седеем кеняркшнось весе тевень кувалма. Те ульнеськак монень пандомакс-уцяскакс весе важодемам кисэ.11Ансяк зярдо мон варштынь эсень кедьсэ теезенть лангс ды важодеман вельде теезенть лангс, чарькодинь: весемесь ульнесь смусттемекс, варма мельга пансемакс. Мезенть эйстэяк арась лезэ чипаенть ало!
12Сестэ мон ушодынь ванкшномо покш превейчинть, превтемечинть ды чаволачинть. Мезе вийсэнзэ теемс инязордонть мейле полавтомонзо сыцясь? Ансяк сень, мезе уш теезель.13Мон неия: покш превейчись чаволачиденть седе лезэв истя, кода валдось чоподадонть седе лезэв.
14Пек превеенть сельмензэ – парсте неицят,
а вана чаволась кадновкшны тунь чоподасо.
Ансяк чарькодинь: сынст кавонест учи вейке пе.15Сестэ меринь эстень: «Моньгак, кода чаволанть, учи теке песь. Мезекс сестэ мон теевинь превейдеяк превеекс?». Ды мон меринь эстень: теяк – смусттеме.16Алкукс, кода пек превеентькак, истя чаволантькак, а кармить кувать ледстнеме. Аламо шкань ютазь весемесь ули стувтозь. Мезе иля тее, пек превееськак кулы чаволанть ладсо!17Сестэ мон карминь пек а вечкеме мик сонсензэ эрямонть. Эдь монень кармасть оймень сэредстицякс чипаенть ало теевиця тевтне. Эдь весе – смусттеме, варма мельга пансема!
18Мон карминь пек а вечкеме весе стака важодемам, конань виень маштомс теинь-топавтынь чипаенть ало. Эдь весе таштазенть сави кадомс мондень мейле сыцянтень.19Ды кие соды: ули сон пек превеекс эли чаволакс? Ялатеке сон карми азорокс весе монь ули-паром лангсо, конанть мон таштыя чипаенть ало стакасто важодезь ды покш превейчи вельде. Теяк – смусттеме!20Сестэ монь седеем тунь ёмавтызе кемеманть чипаенть ало весе стака важодемадон.21Эдь эрси истя: пек превейстэ, чарькодьксчисэ ды ёроковсто важодиця ломанентень весементь сави кадомс сенень, кие эзь важоде тень лангсо. Теяк – смусттеме ды ойменть туртов ине апаркстома!
22Сестэ эно мезе максыть ломанентень весе стака важодеманзо ды седеень бажамонзо, конатнень кисэ сон виень маштомс важоди чипаенть ало? – Мезеяк!23Эдь весе сонзэ чинзэ – ризкст-мелявкст, важодевксэнзэ – ацирьгадома. Мик веть седеезэ а соды оймамо. Теяк – смусттеме!
24Ломаненть туртов седе паро мезеяк арась симемадонть-ярсамодонть башка ды эсензэ важодевкстнэде кенярдомадонть башка. Мон чарькодия: теяк Пазонть пельде казне.25Эдь кие ярсави ды кие кенярдови, а максындерясы тень сонензэ Пазось?!26Пазонь мелень коряс эрицянтень Сон максы седеяк покш превейчи, содамочи ды кеняркс. А вана пежетевентень тевекс Сон макссы сюпавчинь таштамонь-пурнамонь мелявксонть. Ансяк те весемесь мейле максови Пазонь мелень коряс эрицянтень. Теяк – смусттеме, варма мельга пансема!
*а 2.1 эрьгелемс – весёлгалемс.
*б 2.8 Синод. ютавтовкссонть: эрьва кодат седямопельть.
Глава 2