Выбрать язык
Книги Ветхого Завета
Книги Нового Завета
с русским текстом1Весементь эсь шказо. Менеленть ало эрьва мезенть ули шказо:
2шка чачомс ды шка куломс,
шка озавтнемс ды шка таргсемс ундокснэк,
3шка маштнемс ды шка менстямс ормадо,
шка калавтнемс ды шка стявтомс кудо,
4шка авардемс ды шка пейдемс,
шка мелявтомс-лайшемс ды шка киштемс-морамс,
5шка ёртнемс кевть ды шка пурнамс кевть,
шка кутморямс ды шка тукшномс кутморямотнеде,
6шка вешнемс ды шка ёмавтнемс,
шка ванстомс ды шка ёртнемс,
7шка сезнемс ды шка стакшномс,
шка чатьмонемс ды шка кортамс,
8шка вечкемс ды шка сельмсэяк а неемс,
шка покш тюремантень ды шка сэтьмечинтень.
9Кодамо лезэ ломанентень
стака важодеманзо эйстэ?
10Ванкшныя мон те тевенть,
конань Пазось максызе ломантненень
теньсэ сынст шкаст пештямонть туртов.
11Пазось эсь шкасто весементь теизе мазыйдеяк мазыекс.
Сон путызе ломантнень седейс пингеде пингень шканть чарькодемантькак,
куш ломанентень тунь а чарькодевикст Пазонь тевтне, ушодкстост саезь пезэст.
12Карминь содамо: ломантнень туртов эрямост перть арась мезеяк лия седе паро, кода кенярдомс-эрьгелемс ды теемс паро тевть*а.13Ды зярдо ломанесь ярсы-сими ды васьки*б пародонть весе важодеманзо пингстэ – те сонензэ Пазонь пельде казне.
14Карминь содамо: весе, мезе теи Пазось, карми эрямо пингеде пингес. Сонзэ теезентень а мезе поладомс ды эйстэнзэ а мезе саемс. Пазось теи истя – ломантне пелевельть Сондензэ.15Мезе ней ули, се ульнесь икелеяк, ды мезе карми улеме, сеяк уш ульнесь – Пазось одов вешнесы-велявтсы ютазенть.*в
16Оштё чипаенть ало мон неия
видестэ судямонь тарканть –
ансяк тосояк коень коламот,
неия видечинь топавтомань тарканть –
ансяк тосояк пазтомочи.
17Мон меринь эстень: «Пазось карми судямо кавонест –
видечисэнтькак, пазтомонтькак.
Эдь Сон аравтсь шка эрьва мезентень
ды суд эрьва тевентень».
18Эстень меринь ломантнень коряс: «Пазось эйсэст варчни – кадык тенст карми неявомо: сынь сынсь – теке ракшат.19Эдь ломантнень уцяскаст ды ракшатнень таликаст – вейкине: вейкетьстэ кулыть нетнеяк, тонатнеяк. Эрямост-ойместкак сынст вейке. Ломантне ракшатнеде мейсэяк а седе парт. Алкукскак, весемесь – смусттеме!20Весе сынь туить вейке таркав: весемесь теевсь модачелькестэ, ды весемесь одов велявты модачелькекс.
21Кияк а соды, кепедевить-арась ломантнень оймест верев, ды валгить-арась ракшатнень оймест алов, модас».
22Сестэ мон чарькодия: ломаненть туртов арась мезеяк седе вадря, кода улемс мельспаросо тевензэ кувалма. Истямо сонзэ уцясказо-таликазо. Эдь кияк сонзэ одов а ветясы варштамо сень лангс, мезе карми сондензэ мейле.
*а 3.12 Те тарканть ули лия чарькодемазояк: кода эрьгелемс ды эсь пряст васькавтнемс.
*б 3.13 васькамс – наслаждаться.
*в 3.15 Эли: "Пазось пандовтсы ютазенть кедьстэ".
Глава 3