Выбрать язык
Книги Ветхого Завета
Книги Нового Завета
с русским текстом1Виень путозь весе тень ванкшномсто мон чарькодия: видечисэ эрицяськак, пек превей ломанеськак, сынст тевесткак – Пазонть кедьсэть. Ды кияк а соды, мезэ учи эйсэнзэ икелепелев: вечкема эли авечкема.
2Эрьванть марто лисни текесь. Вейке пе учи видечисэтнень ды пазтомотнень, паронь теицятнень ды [зыянонь теицятнень,] ванькстнэнь ды аванькстнэнь, аноксонь кандтницятнень ды аноксонь а кандтницятнень. Те учи кода паронь теицятнень, истя пежетевтнень, кода пежедькстыцятнень, истя пежедькстамодо пелицятнень.
3Вана те улияк кажо чипаенть ало весе теевицянть марто: весень учи вейке пе. Эрямонь перть ломантнень седеест пешксеть зыяндо ды превтемечиде. Мейле ломанесь туи кулозтненень.
4А вана кие оштё эрицятнень ютксо, тонань зярс ули седейнежезэ. Кода кортави, эриця кискакс улемась седе паро кулозь левекс улемадонть!
5Эдь эрийтне содыть: сынь кулыть. Кулозтне вана мезеяк уш а содыть. Сыненст уш а пандови паро тевест кисэ, ды эйсэст мик а ледстнитькак.
6Умок уш ютасть сынст вечкемаст, авечкемаст, сельмень сявадомаст. Ды сынст зярдояк а ули таликаст чипаенть ало теевицянть эйстэ мейсэяк.
7Секс седейкеняркс марто сэвть кшисэть, паро ёжомарямосо симть винасот, эдь Пазось умок паро мельсэ ваны неть теветь лангс.8Кадык тонь оршамопелеть свал улить ашот-валдот ды кадык тантейстэ качадыця ваднемапелесь зярдояк а прядови прячерьстэть.9Кецнек эрямонтень вечкевикс нить марто смусттеме эрямостот весе читнень перть, конатнень Пазось максынзе теть казнекс чипаенть ало эрямстот, – весе смусттеме читнень перть, эдь те тонь уцяскат-таликат чипаенть ало весе стака важодемат кисэ.
10Теить-топавт весементь, козонь сатыть кедьвиеть. Эдь тоначисэ, ков туят, арасть а тевть, а арсемат, а содамочить, а покш превейчи.
11Тагояк мон ванынь ды неия чипаенть ало:
эрязасто чиемась аволь свал максови шожда пильгетненень,
изнямось – аволь маралятненень,*а
кшись – аволь пек превейтненень,
сюпавчись – аволь чарькодицятненень,
пароськак аволь свал максови содыцятненень.
Весементь лангсо прявтокс аштить шкась ды уцяскась.
12Ломанесь а содасы эсь туемань шканзо:
кода калтнэ понгонить куловтыця алтымас,
кода нармунтне кундсевить пистеньс,
истя ломантненьгак куломась старды кажонь шкастонть,
зярдо сон апак учо пры лангозост.
13Оно оштё кодамо покш превейчинь невтема мон неинь чипаенть ало ды ловия сонзэ инекс.14Ульнесь а покш ошке, эйсэнзэ эрицятнедеяк аволь ламольть. Сыргась каршонзо виев инязор, пиризе сонзэ ды перьканзо стявтсь сэрей пирявкс.15Ансяк ошсонть муевсь кажовсто эриця пек превей ломань. Сон покш превейчисэнзэ идизе ошонть. Ялатеке мейле кияк эзь ледстнеяк те кажовсто эрицядонть.
16Сестэ мон меринь: покш превейчись вийденть вадря.
Ансяк кажовонть покш превейчинзэ мезекскак а ловить
ды сонзэ валонзо а кунсолыть.
17Пек превейтнень сэтьместэ ёвтазь превс путомаст кунсоломась седе паро
чаволатнень прявтонть рангоманзо кунсоломадонть.
18Покш превейчись покш тюремань кедьёнкстнэде паро.
Ансяк вейке пежетевеськак вийсэнзэ ёмавтомс ламо паро.
*а 9.11 мараля – богатырь.
Глава 9