Выбрать язык
Книги Ветхого Завета
Книги Нового Завета
с русским текстом
1Кодамо алкуксонь пек превеесь?
Кинь саты чарькодьксчизэ толковамс уликсэнть смустензэ?
Покш превейчись валдомты ломаненть чаманзо,
чевтемти казямо чачонзо.
2Мон кортан: топавтт инязоронть кармавтовксонзо
ды валонть, конаньсэ пежедькстыть Пазонть икеле.*а
3Иля капша явомо инязоронть эйстэ
ды иля аште берянь арсевксэнть ёно.
Эдь инязоронть вийсэ теемс весементь, мезе мелезэ.
4Инязоронть валонзо экшсэ прявтвиесь.
Кияк а мереви тензэ: «Тон мезе теят?».
5Инязоронть кармавтоманзо топавтыцясь
а понги кодамояк кажос-зыянс.
Пек превеень седеесь соды
тевень топавтомань шкантькак, лувонтькак.
6Эдь эрьва тевенть ули эсензэ шказо ды лувозо.
Ансяк ломаненть лепшти пек покш зыян:
7сон а соды, мезе карми икелепелев,
ды кода те карми – кие тензэ ёвты теде?
8Ломанесь аволь прявт эрямонь лексеманть*б лангсо –
а вийсэнзэ кирдемс сонзэ.
Кияк аволь прявт эсензэ куломань чинть лангсояк.
Кода ушманось а оргодеви покш тюремадонть,
истя пазтомонтькак а идесы пазтомочизэ.
9Весе тень мон неия чипаенть ало теевиця эрьва тевенть ваномсто. Ды вана ломанесь прявтокс улемстэ лепшти лия ломаненть, теи тензэ зыян.
10Сестэ мон неинь, кода мелень путозь калмасть пазтомотнень, конат икеле сакшность Пазонь кудонтень ды одов тукшность иневанькс таркастонть. Се ошсонть, косо сынь теизь берянь тевест, стувтылизь тень ды мик инелгавтнесть пазтомотнень. Теяк – смусттеме!*в
11Зярдо берянь тевтнень кисэ чумось пандови аволь сеске, сестэ тень кувалма ломантне а пелить теемс эрьва кодамо зыян.12Эрси истя: пежетевесь сядоксть теи зыян, ялатеке кувать эри. Ансяк мон содан: паро ули Паздонть пелицятненень, кить топавтыть Сонзэ мелензэ.13А вана пазтомонтень паро а ули. Пазонть мельде а пелицянть пингезэ аволь кувака, теке сулей.
14Моданть лангсо ули истямояк смусттеме тев: видечисэтнень марто эрси се, мезенть тевест кис максомаль пазтомотненень. А вана пазтомотнень марто эрси се, мезе тевест кисэ максомаль видечисэтненень. Тень неезь ансяк мереват: теяк – смусттеме!
15Секс мон шнан-инелгавтан кенярксонть-эрьгелеманть. Эдь ломанентень чипаенть ало арась мезеяк лия седе паро, кода ярсамс, симемс ды эрьгелемс. Ды кенярксось карми мартонзо важодеманзо перть эрямонзо весе читнестэ, конатнень Пазось максынзе тензэ чипаенть ало.
16Седеем алтыя покш превейчинть чарькодемантень ды моданть лангсо весе теевицянть ваномантень – ломанесь тевтнень топавтомсто а соды а чинь оймамо, а вень удома.17Сестэ мон неинь чипаенть ало Пазонть теевиця весе тевензэ ды карминь содамо: сынь ломанентень педе-пев а чарькодевикст. Зяро ломанесь а важодевель сынст тонавтнемаст лангсо, ялатеке сынь сонензэ кадовить а чарькодевиксэкс. Ды бути конаськак пек превейтнестэ меревель: сон весементь содасы – сонензэяк ялатеке те а чарькодевикс.
*а 8.2 Эли: инязоронтень Пазонть пежедькстамонзо кисэ.
*б 8.8 Эли: варманть.
*в 8.10 Те валрисьменть аволь вейке чарькодемазо.
Глава 8