Выбрать язык
Книги Ветхого Завета
Книги Нового Завета
с русским текстом1Паро лемесь седе вадря тантейстэ качадыця питней ваднемапельденть.
Куломань чись чачомань чиденть седе паро.
2Лайшема кудос совамось
каванямо кудос совамодонть седе паро.
Эдь вейке пе учи эрьванть –
кие эри, кадык кирди тень мельсэнзэ.
3Ризнэмась ракамодонть паро.
Эдь нусманя чачодонть седе паролгады седеесь.
4Пек превеень седеесь – лайшема кудосонть,
чаволань седеесь – тувталтомо эрьгелемань кудосонть.
5Пек превеень сялдоматнень кунсоломась седе паро
чаволань морамонть кунсоломадонть.
6Кода чакш ало цятордыть кодорксонь палыця тарадтнэ,
истя раки превтемесь-чаволась.
Теяк – тунь смусттеме!
7Лиятнень лепштямось, кедьстэст нельгемась пек превеентькак теи чаволакс,
салавань казнетне кольстить-салыть седеенть.
8Тевенть прядомазо ушодомадонзо седе вадря.
Коронь кирдемась покшкавтнемадонть седе паро.
9Иля капша оймеват-седейгат кежейгалеме,
эдь покш кежесь тейни пизэ чаволатнень седейс.
10Иля кевкстне: «Мекс икелень шкатне ульнесть неенсетнеде седе парт?».
Те кевкстемась аволь покш превейчиде.
11Покш превейчись паро,
сон тетянь-авань пельде кадовозь сюпавчинть кондямо
ды канды лезэ чипаенть валдосо эрицятненень.
12Эдь покш превейчись вансты-лезды,
кода ярмактнеяк.
Ды ялатеке покш превейчись ков седе лезэв:
сон иди азоронзо эрямонть.
13Домкасто арсезевть Пазонть тевензэ лангсо: арази киненьгак витеви се, мезенть Сон теизе кичкерекс?14Паро шкатнестэ васькак валдо уцяскасот. Берянь шкатнестэ арсевтик: теньгак, тонаньгак теинзе Пазось – ломанесь илязо чарькоде, мезе карми туемадонзо мейле.*а
15Эсень смусттеме эрямонь читнестэ монень савсь неемс эрьва мезе. Эрси, видечисэсь шкадонзо икеле кулы-ёми эсь видечисэнзэ, а вана пазтомось кувать эри эсензэ пазтомочисэнзэ.16Иля уле вельть видечисэкс ды иля невте прят вельть превеекс. Мезекс тонеть теньсэ ёмавтомс прят?17Вельть иляк кая прят пежетьс-пазтомочис ды иля уле превтемекс. Мезекс теть куломс шкадот икеле?18Седе паро мельсэть кирдемс вейкенть, а стувтнемс омбоцентькак. Эдь кие пели Паздонть, се мени весе неть ильведевкстнэде.
19Покш превейчись теи пек превеенть
мик ошонь кемень прявттнэде виевекс.
20Моданть лангсо арась видечисэ эриця истямо вейкеяк ломань,
конась бу теевель ансяк паро ды тунь а соваволь пежетьс.
21Эрьва марязь валонть иляк нолда седейс –
лиякс марясыть уреть пельде тондеть ёвтневиця берянь валтнэнь.
22Эдь седееть соды: тонськак аволь весть
беряньстэ кортыть лиятнеде.
23Весень тень мон варчния покш превейчи вельде. Меринь эстень: «Карман пек превеекс». Ансяк покш превейчись ульнесь эйстэнь пек васоло!24Эдь весе уликсэнть смустезэ – васоло ды кекшезь домкадояк домкачис. Кие сонзэ мусы-чарькодьсы?
25Сестэ мон алтыя седеем покш превейчинть ды содамочинть смустест седеяк домкасто чарькодемантень, тонавтнемантень ды муемантень. Карминь содамо ансяк тень: пазтомочись – те чаволачи, чарькодьксчинь арасьчись – превтемечи.
26Мон карминь содамо: куломадонть сэпей се тейтерьавась, кона теке алтыма; конань седеезэ – пистень, ды кедензэ – тертть. Пазонтень вечкевиксэсь идеви-оргодеви эйстэнзэ, пежетевенть сон кундасы.*б
27Оно мезе мон карминь содамо, мельга-мельцек весе уликсэнть смустензэ тонавтнезь-варчнезь, – мерсь Тонавтыцясь.
28Мезе оштё пек вешнесь оймем ды эзь муе? Мон муинь тёжасто ансяк вейке алкуксонь цёраломань, а вана алкуксонь тейтерьава тёжасто эзинь муе вейкеяк.*в29Карминь содамо ансяк сень: Пазось теизе ломаненть видечисэ эрицякс, а вана тонась сыргась эрьва кодат чирь-мур китнень вешнеме.
*а 7.14 Синод. ютавтовкссонть: ломанесь илязо мереве Сонзэ каршо мезеяк.
*б 7.26 Вант Валвелякстнэ 5:3 ды 22:14.
*в 7.28 Соломон инязоронть ульнесть тёжа нинзэ ды наложницанзо, конат велявтызь седеензэ Пазонть эйстэ. Те стихесь, паряк, невти эрямосонзо тень эйстэ лисезь ризксэнть. Вант Инязортнэнь 3-це книгаст 11.3.
Глава 7