Выбрать язык
Книги Ветхого Завета
Книги Нового Завета
с русским текстом1Кучик кшить иневедьга –
ламо чинь ютазь сон таго сы теть.*а
2Явшек, мезеть ули, сисемтненень эли мик кавксотненень.*б
Эдь тон а содат, кодамо кажо, паряк, сы масторозот.
3Пельтне, зярдо пешкедить-стакалгадыть,
валыть моданть лангс пиземе.
Чувтось пры куш лембе ёнксов, куш якшамо ёнксов –
ков пры, тоско кадовияк.
4Кие вельть ваны варманть пувамонзо мельга – се зярдояк а види,
кие вельть ваны пельтнень лангс – се зярдояк а нуи.
5Кода а содасыть варманть кинзэ
ды сень, кода теевить ловажатне пешксесэ аванть потсо –
истя тонеть а содавикст
Весеменьтеиця Пазонть тевензэяк.
6Валске марто листь видеме,
чокшнеяк иля оймсевте кедеть.
Эдь тон а содат, те эли тона тевесь ули лезэв,
эли кавонест вейкетьстэ кармить вадрят.
7Валдось вечкевикс,
сельметненень паро неемс чипаенть.
8Кувака пингень печтиця ломанеськак
кадык кенярды-эрьгели эрямонзо перть.
Ансяк домкасто арсезэ чопода читнедеяк,
эдь эйстэст кармить ламо.
Весе, мезесь карми мейле – смусттеме.
9Кецнек-эрьгелек, од цёра, зярс одат!
Кадык од шкастот седееть пешкели кенярксто.
Мольть, ков тердить преветь-бажамот
ды ков ваныть-невтить сельметь.
Ансяк содак: весе тень кисэ
Пазось кевксттянзат-судятанзат.
10Панть ацирьгадоманть-ризнэманть седееть эйстэ,
тулкадть зыяновонть-пиштеманть рунгот эйстэ.
Эдь вишка шкась ды од порась – смусттеметь.
*а 11.1 Те валрисьменть смустезэ: Путыть ярмакот иневедь лангсо микшнемас – лезэвтеме а кадоват. Эли: Тейть паро лиянень – тонетькак велявты паросо.
*б 11.2 Те валрисьменть лия смустезэ: Явнык, мезеть ули, сисемев эли мик кавксов.
Глава 11