Выбрать язык
Книги Ветхого Завета
Книги Нового Завета
с русским текстом1Ионанень, Амафиень цёранстэнь, ульнесь Инешкипазонть валозо:2«Нейке сыргак, мольть Ниневияв, ине ошонтень, ды весень икеле кортак каршонзо. Эдь Мон карминь содамо беряньдеяк берянь тевдензэ».3Ансяк Иона арсесь оргодемс Инешкипаздонть иневедень трокс васоло Фарсисэв. Сон сась иневеденть чирес Иоппияв, мусь Фарсисэв сыргиця иневенч, пандызе ускоманзо кисэ питненть ды кузсь иневенчентень мартост Фарсисэв уеме – Инешкипазонть чачо икельде оргодеме.
4Ансяк Инешкипазось кепедсь иневеденть лангсо виев варма, ды веденть лангсо кепететсь истямо кежей давол, конадонть иневенчесь аноколь каладомс.5Укшныцятне вельть пелезевсть, эрьвась лезкс мельга ознозь пшкадсь эсензэ пазонтень. Иневенченть шождалгавтоманть кисэ ушодсть ёртнеме лангстонзо сталмотнень. А вана Иона теде икеле уш валгсь иневенченть потмарс, мадсь ды сеске кеместэ матедевсь.6Сась тензэ иневенчень прявтось ды мерсь: «Мекс удат?! Стяк, пшкадть эсеть пазонтень! Паряк, сон яви лангозонок мель, ды минь а маштовтанок».
7Седе мейле, кода Иона сась ваксозост, укшныцятне кортасть эсь ютковаст: «Эно, каятано жеребей ды содасынек, кинь кисэ стардымизь те покштояк покш кажось». Сынь каясть жеребей, ды прась жеребеесь Иона лангс.8Сестэ мерсть тензэ: «Ёвтык миненек: кинь кисэ стардымизь те покштояк покш кажось? Кодамо тев топавтат ды косто сат тон? Косо тонь масторот ды кодамо раськестэ тон?»9Иона мерсь тенст: «Мон евреян ды сюконян Инешкипазонтень, менелень Пазонтень, кона теизе иневеденть ды моданть».10Сон ёвтась тенст Инешкипазонть эйстэ оргодемадонзо, мейсэ тандавтынзе ломантнень ине пелемасо. Сынь мерсть тензэ: «Мезе тон теить!».11Ды кевкстизь: «Мезе миненек теема мартот иневеденть сэтьмелгавтомга?». Эдь иневеденть кумболдомазо седеяк виевгалесь.12Сон мерсь тенст: «Саемизь ды ёртомизь иневедентень – сестэ тынк туртов иневедесь сэтьмелгады. Эдь содан – монь кисэ каявсь лангозонк те виев даволось».
13Тень таркас неть ломантне ушодсть виевстэ миледеме, бажасть мода чирес пачкодеме. Ансяк те сыненст эзь топавтово-тееве: иневедесь яла азаргалесь каршост.14Сестэ сынь рангозевсть Инешкипазонтень ды мерсть: «Ознотано Тонеть, Инешкипаз: илямизь максо маштовомс те ломаненть оймензэ саеманть кисэ! Илямизь чумондо чумовтомонть верензэ валоманть кисэ! Эдь Тон, Инешкипаз, теик тень Эсь мелеть коряс».15Сынь саизь Ионань ды ёртызь иневедьс. Ды иневедесь энгамсь азаргалемадо.16Тень неезь, неть ломантне тандадсть Инешкипаздонть ине пелемасо. Теде мейле сынь кандсть Инешкипазонтень аноксокс ракша*а ды алтасть-пежедькстасть Тензэ.
*а 1:16 анокс – жертва
Глава 1