Выбрать язык
Книги Ветхого Завета
Книги Нового Завета
с русским текстом1Ионань иневедьс ёртомадо мейле Инешкипазось кармавтызе покш калонть*а нилемс сонзэ. Ды ульнесь Иона те калонть потсо колмо чить ды колмо веть.2Калонть потсто Иона ознось Инешкипазонтень, эсензэ Пазонтень:
3«Покш майсема шкастон мон пшкадинь Инешкипазонтень
ды Сон маримим ды лездась тень.
Тоначинь отьмань потсто пижакадынь,
ды Тон, Инешкипаз, марик вайгелем.
4Тон ёртымик монь потмаксос, иневедень седейс,
ды чудиведтне чаразевсть перькан.
Тонь ведтне-толкунтнэ ды Тонь ведьвелявкстнэ
ютасть монь велькска.
5Сестэ мон меринь эстень:
мон панезян Тонь сельме икельде,
ялатеке таго неса
Тонь иневанькс озкудот ды сован эйзэнзэ.
6Кирьга видьс кутмордымизь ведтне,
отьмась ваявтымим монь.
Иневедень тикшесэ тапарязь монь прям.
7Пандтнэнь домка юрс мон валгинь,
модапотмонь масторось эсь тулосонзо
пингеде пингес монь пекстымим.
Ансяк Тон, Инешкипаз, монь Пазом,
идик оймем, таргимик тоначинь отьмасто.
8Зярдо эйсэнь маштсь оймевиесь,
мон ледстия Тонь леметь, Инешкипаз,
ды озномам пачкодсь Тонеть,
Тонь иневанькс озкудонтень.
9Стяконь ды аволь алкуксонь пазтнэнень сюконицятне
кадызь эсест Седеймарицяст.*б
10Мон вана шнамонь моразь
кандан Тонеть анокст.
Мезе алтынь, топавтса.
Идемась – Инешкипазонть эйсэ!».
11Сестэ Инешкипазось кармавтызе покш калонть, ды тонась гаркстызе Ионань мода лангс.
*а 2.1 покш калонть – истя евреень кельсэ. Синод. ютавтовкссонть "кит" валось саезь кезэрень грекень ютавтовксстонть, косо "кетос" валонть смустезэ – "иневедень тандавкс".
*б 2.9 Те тарканть ули лия чарькодемазояк: кадызь Тонеть эсест кемевиксчист.
Глава 2