Выбрать язык
Книги Ветхого Завета
Книги Нового Завета
с русским текстом1 Тӱҥалтыште Юмо кава ден мландым ыштен.2 Мландыже тӱсдымӧ да яра улмаш, пундашдыме келгыт ӱмбалне пычкемыш шоген, да Юмын Шӱлыш вӱд ӱмбалне коштын.
3 Юмо каласен: «Тек волгыдо лиеш». Волгыдо лийын.4 Волгыдо сай улмым Юмо ужын, да Юмо тудым пычкемыш деч ойырен.5 Волгыдым Юмо кече манын, пычкемышым – йӱд. Кас лийын, эр лийын – ик кече эртен.
6 Юмо каласен: «Вӱд коклаште тек пеҥгыде ойыртыш*а лиеш, да тек тудо вӱдым вӱд деч ойыра». [Тыгак лийын.]7 Юмо пеҥгыде ойыртышым ыштен, ойыртыш йымалысе вӱдым ӱмбалысе вӱд деч ойырен. Тыгак лийын.8 Ты ойыртышым Юмо кава манын. [Юмо ужын: тиде сай.] Кас лийын, эр лийын – кокымшо кече эртен.
9 Юмо каласен: «Кава йымалысе вӱд тек ик верыш погына да кукшо вер лектеш». Тыгак лийын. [Кава йымалысе вӱд шке верышкыже погынен да кукшо вер лектын.]10 Кукшо верым Юмо мланде манын, а вӱд погынымо верым теҥыз манын лӱмден. Юмо ужын: тиде сай.
11 Юмо каласен: «Мланде тек тӱрлӧ кушкылым шочыкта: [шке урлыкшо дене] нӧшмым пуышо шудым, шке урлыкшо дене мландымбалне нӧшмым пуышо саскан пушеҥгым». Тыгак лийын.12 Мланде тӱрлӧ кушкылым шочыктен: [мландымбалне] шке урлыкшо дене нӧшмым пуышо шудым да шке урлыкшо дене нӧшмым пуышо саскан пушеҥгым. Юмо ужын: тиде сай.13 Кас лийын, эр лийын – кумшо кече эртен.
14 Юмо каласен: «Кече деч йӱдым ойыраш [да мландым волгалтараш] манын, пагытым, кечым да идалыкым ончыктышо пале семын каваште тек тӱняволгалтыш-влак*б лийыт.15 Нуно тушто тек тӱняволгалтыш лийыт да мландым волгалтарат». Тыгак лийын.16 Юмо кок кугу тӱняволгалтышым ыштен: кугурак тӱняволгалтышым – кечывалым виктараш, а изиракшым – йӱдым виктараш, да шӱдыр-влакым ыштен.17-18 Мландым волгалтарышт, кечывал ден йӱдым виктарышт да волгыдым пычкемыш деч ойырышт манын, Юмо нуным каваш вераҥден. Юмо ужын: тиде сай.19 Кас лийын, эр лийын – нылымше кече эртен.
20 Юмо каласен: «Тек вӱд чонан-влакым шочыкта, тек мландымбалне – каваште – кайык-влак чоҥештылыт». [Тыгак лийын.]21 Юмо теҥызысе кугу янлык-влакым, вӱдыштӧ ийын коштшо тӱрлӧ чонан-шамычым да шулдыран чыла кайыкым шке урлыкышт шот дене ыштен. Юмо ужын: тиде сай.22 Юмо нуным суапландарен каласен: «Тӱлаҥза*в да шукемза, теҥыз вӱдым темыза, кайык-влакат мландымбалне тек шукемыт».23 Кас лийын, эр лийын – визымше кече эртен.
24 Юмо каласен: «Мланде тек чонан илыше-влакым, кажныштым шке урлыкышт дене, шочыкта: вольыкым, мландымбалысе янлык ден тӱрлӧ тыгыде чонан-влакым, кажныштым шке урлыкышт шот дене». Тыгак лийын.25 Юмо мландымбалысе янлык-влакым шке урлыкышт шот дене, тӱрлӧ вольыкым шке урлыкышт шот дене да чыла тыгыде чонаным шке урлыкышт шот дене ыштен. Юмо ужын: тиде сай.
26 Юмо каласен: «Айдемым Шке тӱсна почеш, Шкенан гайым ыштена. Тек тудо теҥыз коллан, кавасе кайыклан, [янлыклан,] вольыклан, пӱтынь мландылан, мландымбалне чыла тыгыде чонанлан оза лиеш».27 Юмо айдемым Шке тӱсшӧ почеш, Шкеж гайым ыштен, нуным пӧръеҥ ден ӱдырамашым ыштен.28 Юмо нуным суапландарен да нунылан каласен: «Тӱлаҥза да шукемза, мландым темыза да озаланыза. Теҥыз коллан, [янлыклан,] кавасе кайыклан, [чыла вольыклан, уло мландылан,] мландымбалне чыла тыгыде чонанлан оза лийза».29 Юмо каласен: «Мландымбалне нӧшман чыла шудым, нӧшман саскам пуышо чыла пушеҥгым Мый тыланда пуэм. Чыла тиде тендан кочкышда лиеш.30 А мландымбалысе чыла янлыклан, кавасе кайыклан, мландымбалне тарваныл коштшо чыла тыгыде чонанлан кочкашышт Мый ужар кушкылым пуэм». Тыгак лийын.31 Юмо пӱтынь ыштымыжым ончалын да ужын: чылажат пеш сай. Кас лийын, эр лийын – кудымшо кече эртен.
*а 1:6 Пеҥгыде ойыртыш – твердь (небесная).
*б 1:14 Тӱняволгалтыш – светило.
*в 1:22 Тӱлаҥаш – плодиться.
Глава 1