Выбрать язык
Книги Ветхого Завета
Книги Нового Завета
с русским текстом1 Тыге ышталтыныт кава ден мланде да чыла, мо тушто уло.2 Кудымшо кечын Юмо чыла ыштышаш пашажым шуктен да шымше кечын шке пашаж деч канен.3 Юмо шымше кечым суапландарен да святитлен, вет тиде кечын Тудо Шке ыштыме чыла пашаж деч канен.
4 Теве тыгай лийын кава ден мландын шочмышт, нунын ышталтмышт. Господь Юмын мланде ден кавам ыштыме жапыште5 мландымбалне але нимогай вондерат лийын огыл, нимогай шудат кушкын огыл. Вет Господь Юмо мланде ӱмбаке йӱрым эше колтен огыл улмаш, мланде пашам ышташ айдемат лийын огыл.6 Но мланде гыч вӱдыжгӧ нӧлталалтын да мландымбалым вӱдыжтарен шоген.7 Господь Юмо мланде пурак гыч айдемым ыштен, шӱргышкыжӧ илыш шӱлышым пуалын, да айдеме илыше чон лийын.
8 Господь Юмо Эдемыште, эрвел могырышто, рай садым шынден да ыштыме айдемыжым тушко илаш пуртен.9 Господь Юмо сылнын койшо да кочкаш йӧрышӧ чапле саскан тӱрлӧ пушеҥгым мланде гыч шочыктен. Сад покшелне илыш пушеҥгым да поро ден осалым палдарыше пушеҥгым куштен.
10 Рай садым вӱдыжтараш Эдем гыч эҥер йоген лектын, умбалнырак тудо ныл эҥерлан шелалтын.11 Иктыжын лӱмжӧ Фисон, тудо пӱтынь Хавила мланде йыр йоген эрта, туштыжо шӧртньӧ уло.12 Тудо мландысе шӧртньӧ чапле. Тушто тыгак тамле пушан пушеҥге киш да оникс лӱман шергакан кӱ улыт.13 Кокымшо эҥерын лӱмжӧ Гихон [Геон], тудо пӱтынь Куш мланде йыр йоген эрта.14 Кумшо эҥерын лӱмжӧ Хиддекель [Тигр], тудо Ассирий воктеч йоген кая. Нылымшыже – Евфрат.
15 Эдем садым ончен куштыжо да аралыже манын, Господь Юмо тиде садыш [шке ыштыме] айдемыжым илаш пуртен.16 Господь Юмо айдемылан кӱштен каласен: «Тый садысе чыла пушеҥге гыч саскам кочкын кертат.17 Но поро ден осалым палдарыше пушеҥге гыч ит коч. Тиде пушеҥге гыч кочкат гын, тудо кечынак колет».
18 Господь Юмо каласен: «Айдемылан шкет лияш сай огыл, тудлан келшыше полышкалышым ыштена».19 Господь Юмо рок гыч чыла янлыкым, кавасе чыла кайыкым ыштен да, айдеме нунылан могай лӱмым пуа манын, тудын деке конден. Айдеме нуным кузе лӱмден, нуно тугаяк лӱман лийыныт.20 Тыге айдеме чыла вольыклан, кавасе кайыклан да янлыклан лӱмым пуэн. Но тудлан келшыше полышкалыше лийын огыл.
21 Господь Юмо айдемылан келге омым колтен. Айдемын малымыж годым Юмо тудын ик ӧрдыжлужым луктын налын да тиде верым шыл дене петырен.22 Пӧръеҥ деч налме ӧрдыжлу гыч Господь Юмо ӱдырамашым ыштен да пӧръеҥ деке конден.23 Пӧръеҥ каласен: «Теве, лу – мыйын луэм гыч, шыл – мыйын шылем гыч. Тудо ӱдырамаш маналташ тӱҥалеш: тудым вет пӧръеҥ деч налын ыштыме».*а24 Садлан пӧръеҥ шке ачаж ден аважым кода да ватыж дене ушна – нуно коктын ик кап да чон лийыт.
25 Адам*б ден ватыже коктынат чара лийыныт да икте-весышт деч вожылын огытыл.
*а 2:23 Еврей йылмыште ’пӧръеҥ’ ден ’ӱдырамаш’ мут-влак ик семынрак шоктат: иш – ’пӧръеҥ’, ишша – ’ӱдырамаш’.
*б 2:25 «Адам» лӱм еврей йылмыште ’айдеме, пӧръеҥ’ манмым ончыкта.
Глава 2