Выбрать язык
Книги Ветхого Завета
Книги Нового Завета
с русским текстом1 Аврам индешле индеш ияш улмаш, кунам тудлан Господь кончен да тыге каласен: «Мый Чылакертше Юмо улам, Мыйым колыштын иле да шылталаш амалым ит пу.2 Мемнан коклаштына Мый ойпидышым ыштем да тукыметым чот шукемдем».3 Аврам кумык возын. Юмо умбакыже ойлен:4 «Теве мемнан ойпидышна: тый шуко калыкын ачаже лият.5 Тетла тый Аврам лӱман от лий, тыйын лӱмет Авраам*а лиеш, вет Мый тыйым шуко калыкын ачажым ыштем.6 Тыйын тукыметым пеш чот шарем, тый дечет шуко калыкым ыштем, тый дечет кугыжа-влак лектыт.7 Тый денет да тый дечет варасе чыла тукымет дене Мый ойпидышым ыштем, тудо курымаш ойпидыш лиеш. Мый тыйынат, тый дечет варасе тукымет-влакынат Юмышт лиям.8 Чумыр Ханаан мландым, куштыжо тый кызыт йотъеҥ*б улат, Мый тыланет да тый дечет варасе тукыметлан пуэм. Тудо курымеш тендан лиеш, да Мый тендан Юмыда лиям».
9 Вара Юмо Авраамлан каласен: «Но тый да тыйын деч варасе чыла тукымет Мыйын ойпидышем шуктышаш улыда.10 Теве Мыйын да тый дечет варасе чыла тукымет коклаште ыштыме ойпидышем, те тудым шуктен шогышаш улыда: тендан чыла пӧръеҥ тукымда пӱчмӧ йӱлам эртышаш.11 Тарман мучашысе коваштыдам пӱчкын ойырыза. Тиде мемнан кокласе ойпидышын палыже лиеш.12 Тукым гыч тукымыш кажне эрге аза – суртыштыда шочшат, иктаж-могай вес калык гыч тӱлен налмат, кудыжо тыйын тукымет огыл, – кандаш кечаш лиймекыже, пӱчмӧ лийшаш.13 Тыйын суртыштет шочшат, ший дене тӱлен налмат пӱчмӧ лийшаш. Тыге Мыйын курымашлык ойпидышем капыштыда палемдыме лиеш.14 Пӧръеҥ тукым гыч кажне, кӧн тарман мучашысе коваштыже [кандашымше кечын] пӱчмӧ ок лий, шке калыкше деч кораҥдыме лийшаш, вет тудо Мыйын ойпидышем шуктен огыл».
15 Юмо Авраамлан каласен: «Сара ватетым ынде Сара ит ман, тудын лӱмжӧ тек Сарра*в лиеш.16 Мый тудым суапландарем да тыланет тудын деч эргым пуэм. Сарра деч тӱрлӧ калык шочеш, тыгак тудын деч калык-влакын кугыжашт лектыт».17 Авраам кумык возын да воштылалын, шке семынже манын: «Але вара шӱдӧ ияшын эргыже лиеш? Але вара индешле ияш Сарра азам ышта?»18 Авраам Юмылан каласен: «О, кеч Измаилже Тыйын ончылнет илыже ыле!»19 Юмо тудлан каласен: «Уке, тыйын Сарра ватет тыланет эргым ышта, да тудлан тый Исаак*г лӱмым пуэт. Мый ойпидышем тудын денат ыштем, тидыже тудлан да тудын деч варасе тукымжылан курымашлык ойпидыш лиеш. [Мый тудын да тукымжо-влакын Юмыжо улам.]20 Измаил шотыштат Мый тыйым кольым. Тудымат Мый суапландарем да тукымжым шукемдем, чотыштым кугемдем. Измаил деч латкок он шочеш. Туддеч Мый кугу калыкым луктам.21 Но ойпидышем Мый Исаак дене ыштем. Тудым тыланет Сарра вес ийын лач тыгаяк жапыште шочыкта».
22 Авраам дене мутланен чарнымек, Юмо тудын деч нӧлталт каен.
23 Авраам Измаил эргыжым, суртыштыжо шочшо чыла еҥым, тӱлен налме чыла еҥжым – суртыштыжо илыше чыла пӧръеҥ тукымым – иктыш чумырен да тудо кечынак Юмын кӱштымыж почеш нунын тарман мучашысе коваштыштым пӱчкын.24 Авраамын коваште мучашыжым пӱчмӧ годым тудлан индешле индеш ий улмаш.25 А Измаил эргыже коваште мучашыжым пӱчмӧ годым латкум ияш лийын.26 Авраам да тудын Измаил эргыже пӱчмӧ йӱлам ик кечынак эртеныт.27 Нунын дене пырля суртысо чыла пӧръеҥ тукым – суртышто шочшыжат, вес калык деч оксала тӱлен налмыжат – чыланат пӱчмӧ лийыныт.
*а 17:5 «Аврам» лӱм еврей йылмыште ’чапландарыме ача’ манмым, а «Авраам» ’шукын ачаже’ манмым ончыкта.
*б 17:8 Йотъеҥ – переселенец, пришелец.
*в 17:15 «Сарра» лӱм еврей йылмыште ’тӧра вате’ манмым ончыкта.
*г 17:19 «Исаак» лӱм еврей йылмыште ’тудо воштылеш’ манмым ончыкта.
Глава 17