Выбрать язык
Книги Ветхого Завета
Книги Нового Завета
с русским текстом1 Кечывал кечын лӱп шокшышто Мамре тумер воктене омаш ончылно шинчымыж годым Авраамлан Господь кончен.2 Авраам вуйжым нӧлталынат, ужын: ончылныжо кум пӧръеҥ шога. Нуным ужмекше, тудо омашыш пурымо вер деч ваштарешышт куржын миен да вуйжым мланде марте савен.3 Вара каласен: «Кугу Озам! Тыйын поро кумылетым суленам гын, тарзет воктеч эртен ит кай.4 Йолдам мушкаш тыланда вӱдым кондат. Тиде пушеҥге йымалне каналтыза.5 Те тарзыдан илыме верже воктеч каеда – вийым погыза манын, мый тыланда киндым кондем. А вара корныдам умбакыже шуеда». Нунышт каласеныт: «Ойлымет семынак ыште».
6 Авраам Сарра деке омашыш содор гына пурен да каласен: «Кум виса*а эн сай ложашым нал да, писынрак руашым луген, шергиндым кӱэшт».7 Вара кӱтӱшкӧ куржын, самырык чапле презым ойырен налын да тарзыжлан пуэн, тудыжо писын гына кочкышым ямдылаш пижын.8 Авраам ӱйым, шӧрым, кӱктымӧ презе шылым налын да уна-влак ончыко конден шынден. Нунын кочмышт годым шкеже пушеҥге йымалне воктенышт шоген.
9 Нунышт Авраам деч йодыныт: «Кушто Сарра, тыйын ватет?» Тудыжо вашештен: «Тыштак, омашыште».10 Иктыже каласен: «Мый тый декет [идалык гыч] адак тиде жапыштак толам. Тунам Сарран, тыйын ватетын, эргыже лиеш». А Сарра Авраам шеҥгелне, омашыш пурымаште, лийын да нуным колыштын.11 Авраам ден Сарраже шоҥго, кугу ийготан лийыныт, Сарран шкенжын толмыжат чарнен улмаш.12 Сарра шке семынже воштылалын да манын: «Тыгай куанлан мый ынде шоҥгемынам, мыйын озамжат шоҥго».13 Господь Авраамлан каласен: «Молан Сарра [шке семынже] воштылале да каласыш: ”Чынак мо, тынар шоҥгеммекем эше азам ыштен кертам?”14 Господьлан ыштен кертдыме иктаж-мо уло мо? Вес ийын палемдыме жапыште Мый тый декет толам, тунам Сарран эргыже лиеш».15 Сарра лӱдмыж дене ӱшандарен ойлен: «Мый воштылын омыл». Но Господь каласен: «Уке, тый воштыл колтенат».
16 Пӧръеҥ-влак кынелыныт да Содом [ден Гоморра] велкыла тарваненыт. Авраам ужатен каен.17 Господь семынже манын: «Мом ышташ шонымемым Авраам [тарзем] деч шылтем мо?18 Авраам деч чынак пеш кугу да патыр калык лектеш, да тудын гоч мландымбалысе чыла калык суапландаралтеш.19 Шке йочаж-влаклан да чыла ончыкылык тукымжылан тудо кӱштен кодышаш: тек нуно Господьын корныж дене коштыт, чыным ыштен илат. Тунам Мый, Господь, Авраамлан мом сӧрымем чыла шуктем. Теве молан Мый тудым ойырен налынам».20 Вара Господь каласен: «Содом ден Гоморраште илыше-влак ваштареш вуйшиймаш пеш кугу, нунын сулыкышт пеш неле.21 Волем да ончалам, Мый декем толын шушо вуйшиймаш дене келшыше осал пашам ыштат але уке? Пален налам».
22 Пӧръеҥ-влак тушечын Содомыш каеныт. А Авраам Господь ончылно шоген кодын.23 Авраам Тудын деке лишемын да йодын: «Але вара Тый чын ыштыше еҥымат языкан дене ик семын пытарет? [Чын ыштыше еҥ денат сулыкан еҥ семын лиеш мо?]24 Ала тиде олаште чын ыштыше витле еҥ лектеш? Тый нунымат пытарет мо вара? Тиде верым тушто илыше витле чын ыштыше еҥ верч, [нуно тушто улыт гын,] от чамане мо?25 Чын ыштыше еҥым языкан дене пырля Тый пытарен от керт, чын ыштыше еҥ ден языкан еҥлан ик мучаш – тыгай лийын ок керт! Чумыр мландын Судьяже чын судитла огыл мо?»26 Господь тидлан вашештен: «Содом олаште Мый чын ыштыше витле еҥым муам гын, нунылан верчын [уло олам,] тиде верым пӱтынек чаманен кодем».
27 Авраам вашештен: «Мый, пурак да ломыж, Тый денет, Господь, кутыраш тоштам.28 А витле марте вич еҥ ок сите гын, нине вич еҥлан кӧра Тый уло олам пытарет мо?» Господь каласен: «Тушто чын ыштыше нылле вич еҥым муам гын, ом пытаре».29 Авраам мутшым умбакыже шуен: «Тушто ала ныллым веле муаш лиеш?» Тудыжо манын: «Нылле еҥ верчынат тидым ом ыште».30 Авраам каласен: «Адакат ойлымемлан Господь ынже шыдешке. Ала тушто кумлым веле муаш лиеш?» Тудыжо каласен: «Тушто кумло тыгай еҥым муам гын, ом пытаре».31 Авраам адак манын: «Тоштам мо эше Господь деч йодаш: тушто коло еҥым веле муаш лиеш гын?» Тудыжо каласен: «Коло еҥлан кӧрат пытараш ом тӱҥал».32 Авраам манын: «Эше ик гана каласымемлан Господь ынже шыдешке. Тушто ала чын ыштыше лу еҥ веле лиеш?» Тудыжо вашештен: «Лу еҥлан кӧрат пытараш ом тӱҥал».
33 Господь Авраам дене мутланен пытарен да тушеч каен. Авраам мӧҥгыжӧ пӧртылын.
*а 18:6 Еврей йылмыште ’виса’ мут олмеш сате мут кучылталтеш, ик сатышке шым литр наре пурен.
Глава 18