Выбрать язык
Книги Ветхого Завета
Книги Нового Завета
с русским текстом1 Авраам эше вес ватым, Хеттурам, налын.2 Тудо Авраамлан Зимраным, Иокшаным, Меданым, Мадианым, Ишбакым да Шуахым ыштен.3 Иокшан деч Шева, [Феман] да Дедан шочыныт. Деданын тукымжо: [Рагуил, Навдеил,] тыгак ашурей, летушей да леюмей калык-влак.4 Мадианын эргыж-влак: Ефа, Ефер, Ханох, Авида да Елдага. Нуно чыланат Хеттура деч шочшо улыт.5 Авраамын мо погыжо улмаш, чылажымат Исаак [эргыжлан] пуэн.6 А кулватыж-влак деч шочшо эргыштлан пӧлекым пуэн да эше илымыж годымак нуным, Исаак эргыж деч ойырен, эрвел мландыш колтен.
7 Авраамын илыме ӱмыржӧ шӱдӧ шымле вич ий лийын.8 Вара тудо чот шоҥгеммекше колен. Кужу да тӱвыргӧ ӱмырым илымеке, тудо шке ача-кочаж-влак деке каен.9 Исаак ден Измаил эргыже-влак тудым Мамре тумер воктене, хеттей Цохарын Ефрон эргыжын нурыштыжо улшо Махпела курыкпомышеш тоеныт –10 тудо нурешак [да курыкпомышешак], кудым Авраам хеттей-влак деч оксала налын. Тушто Авраам ден тудын Сарра ватыжым тоеныт.11 Авраамын колымыж деч вара Юмо тудын Исаак эргыжым суапландарен. Исаак Беэр-лахай-рои воктене илен.
12 Теве Авраамын Измаил эргыжын – тудым Авраамлан Сарран кулжо, египтянке Агарь, ыштен – тукымвожшо,13 теве Измаил эрге-влакын лӱмышт: кугэргыже Наваиоф, тудын почеш Кедар, Адбеел, Мивсам,14 Мишма, Дума, Масса,15 Хадад, Фема, Иетур, Нафиш да Кедма.16 Тиде Измаилын эргыже-влак. Илаш шогалме верышт нунын лӱмышт дене лӱмдалтыныт. Нине латкок эрге шке тукымыштын онышт лийыныт.
17 Измаилын илыме ӱмыржӧ шӱдӧ кумло шым ий лийын. Вара тудо колен да кугезыже-влак деке ушнен.18 Измаил тукым еҥ-влак Хавила деч Египет чек воктенысе Сур марте, Ассирий могырыш кайымаште, иленыт. Нуно шке тукым изашт-влак воктене верланеныт.
19 Теве Авраамын Исаак эргыжын тукымжо. Авраам деч Исаак шочын.20 Нылле ияш улмыж годым Исаак Ревеккам марлан налын. Ревекка Месопотамий гыч арамей Вафуилын ӱдыржӧ да арамей Лаванын шӱжарже лийын.21 Ватыже азам ыштен кертдыме лийынат, Исаак [тудын верч] Господьлан кумалын. Господь сӧрвалымыжым колын, да тудын Ревекка ватыже мӱшкыраҥын.22 Мӱшкыран улмыж годым эргыже-влак мӱшкырыштыжӧ икте-весыштым чуменыт. Ревеккан йодыш лектын: «Тыге лиеш гын, молан мылам тиде?» Тудо Господь деч пален налаш каен.23 Господь тудлан каласен: «Тыйын кӧргыштет – кок тукым, мӱшкырет гыч кок тӱрлӧ калык лектеш. Иктыже весыж деч виянрак лиеш, да кугуракше изиракшылан тарзе лиеш».
24 Жап шумеке, Ревекка йыгыр азам ыштен.25 Ончыч янлык коваште гай пунан йошкар аза шочын, тудым Исав*бманын лӱмденыт.26 Вара, кидше дене Исавын йолтаганжым кучен, шольыжо лектын. Тудлан Иаков*в лӱмым пуэныт. Нунын [Ревекка деч] шочмышт годым Исаак кудло ияш лийын.
27 Эрге-влак кушкын шуыныт. Исав тале сонарзе, пӱртӱсыштӧ кошташ йӧратыше лийын. А Иаков тыматле койышан лийын, тудлан мӧҥгыштӧ лияш келшен.28 Исаак Исавым йӧратен, тудын сонарлен кондымо шылжым йӧратен кочкын. Ревекка гын Иаковым йӧратен.
29 Икана Иаков кочкаш шолтен, а Исав сонар гыч нойышо да шужышо пӧртылын.30 Исав Иаковлан манын: «Пу мыланем тиде йошкар-йошкар кочкышетым, мый пеш ноенам». Тыге манмыжлан тудлан Едом*г лӱмдылтышым пуэныт.31 Но Иаков тудлан манын: «Ончыч мылам кугэрге улметым ужале».32 Исав вашештен: «Теве мый шужен колем. Молан кӱлеш мыланем кугэрге улмем?»33 «Тугеже кызытак товатле», – манын Иаков. Исав товатлыме мутым пуэн да кугэргылыкшым Иаковлан ужален.34 Тудыжо Исавлан киндым да яшмыкпурса шӱрым пуэн. Исав кочкын, йӱын, вара кынел каен. Тыге тудо кугэрге улмыжым оккӱлыш луктын.
*а 25 Яшмыкпурса – чечевица.
*б 25:25 «Исав» лӱм еврей йылмыште ’пунан’ манмым ончыкта.
*в 25:26 «Иаков» лӱм еврей йылмыште ’йолтаган’ да ’тудо ондала’ манме дене ик семынрак йоҥга.
*г 25:30 «Едом» лӱм ’йошкарге’ манмым ончыкта.
Глава 25