Выбрать язык
Книги Ветхого Завета
Книги Нового Завета
с русским текстом1 Исаак шоҥгемын, шинчажат ужмым чарнен. Тудо кугурак эргыже Исавым шкеж деке ӱжын да манын: «Эргым!» Тудыжо вашештен: «Мый тыште улам».2 Исаак каласен: «Мый ынде шоҥгемынам, мылам илаш мыняр кодын – ом пале.3 Нал сонарлык куралетым – пикшлодак ден йоҥежетым*а – да кай сонарыш, мыланем янлыкым лӱен тол.4 Вара йӧратыме кочкышем ямдыле да, колымем деч ончыч тыйым суапландарен кодаш манын, мыланем кондо».
5 Исаакын Исав эргыжлан тыге ойлымыжым Ревекка колын. Исав сонарыш лектын каен.6 Ревекка [изирак] Иаков эргыжлан каласен: «Ачатын Исав изат дене мутланымыжым кольым. Тудо тыге мане:7 ”Мыланем янлыкым лӱен кондо да йӧратыме кочкышем ямдыле. Мый кочкамат, колымем деч ончыч Господь ончылно тыйым суапландарен кодем”.8 Ынде тый, эргым, мыйын мутем колышт да мом мый тыланет кӱштем, тудым ыште.9 Кай кӱтӱшкӧ да мыланем кок сай казапачам кондо. Мый ачатлан йӧратыме кочкышыжым ямдылем.10 А тый тудлан намиен пуэт, тудо кочкешат, колымыж деч ончыч тыйым суапландарен кода».
11 Но Иаков аважлан, Ревеккалан, манын: «Исав изам пунан еҥ, а мый чара коваштан улам.12 Ачам ала мыйым ниялтен онча? Тунам мый тудын ончылныжо шоячыш лектам да мыйым суапландарымаш олмеш каргымаш вуча».13 Аваже тудлан вашештен: «Эргым, тиде каргымаш тек мыланем лиеш. Мыйын мутем гына колышт, миен тол да кондо».14 Иаков каен да казапача-влакым конден, да аваже Исаакын йӧратыме кочкышыжым ямдылен.15 Ревеккан омашыштыже кугурак эргыжын, Исавын, эн сай вургемже лийын. Ревекка тудым налын да изирак Иаков эргыжлан чиктен.16 А кидше ден шӱйжым казапача коваште дене пӱтырен шынден.17 Вара Ревекка ямдылыме кочкыш ден киндыжым Иаков эргыжлан кидышкыже кучыктен.
18 Тудыжо ачаж деке пурен да манын: «Ачай!» Ачаже вашештен: «Мый тыште улам. Тый кӧжӧ улат, эргым?»19 Иаков ачажлан каласен: «Мый Исав улам, тыйын кугу эргыч. Кузе шӱденат, тугак ыштенам. Кынел, шич да шылетым коч, вара мыйым суапландаре».20 Исаак эргыж деч йодын: «Мо пеш вашке кученат, эргым?» Тудыжо вашештен: «Тыйын Господь Юмет янлыкым ваштарешемак колтен».21 Исаак ачаже каласен: «Тол лишкырак, эргым, тыйым ниялтен ончем: Исав эргымак улат але уке?»22 Иаков ачаж деке лишемын. Ачаже эргыжым ниялткален ончен да тыге манын: «Йӱкшӧ, йӱкшӧ Иаковын, а кидше, кидше Исавын».23 Исаак Иаковым пален огыл, вет тудын кидше Исав изажын гаяк пунан лийын. Да ачаже Иаковым суапландарен.24 Вара адак йодын: «Тыяк мо Исав эргым улат?» Тудыжо вашештен: «Мыяк».25 Тунам Исаак каласен: «Кондо кочкышетым, эргымын кучен кондымо шылжым кочкын ончем, вара тыйым суапландарем». Иаков тудлан кочкышым пуэн, ачаже кочкын. Йошкар аракамат конден, ачаже подылын.26 Исаак ачаже каласен: «Тол, эргым, мыйым шупшал».27 Иаков лишемын да ачажым шупшалын. Исаак тудын вургем пушыжым шижын да тудым суапландарен каласен: «Тиде эргымын пушыжо, Господьын суапландарыме нурын пушыжо гаяк.28 Тек Юмо тылат кава гыч лупсым, мландын чапле саскажым, шуко киндым да йошкар аракам пуа.29 Тек тыланет калык-влак тарзыланат да тукым-влак вуйыштым сават. Иза-шольыч-влаклан кугурак лий. Аватын эргыже-влак тек тыланет вуйыштым сават. Тек тыйым каргыше-влак каргыме да тыйым суапландарыше-влак суапландарыме лийыт!»
30 Исаак Иаков [эргыжым] суапландарен, да тудыжо ачаж деч лектын гына шуктен, Исав изаже сонар гыч пӧртылын.31 Тудат кочкышым ямдылен, ачажлан конден да каласен: «Кынел, ачай, коч эргычын кучен кондымо шылжым, вара мыйым суапландаре».32 Ачаже, Исаак, йодын: «Тый кӧ улат?» Тудыжо вашештен: «Мый тыйын эргыч, кугурак эргыч Исав улам».33 Исаак лӱдмыж дене чытырналт каен да йодын: «А тый дечет ончыч мыланем янлык шылым кондышыжо кӧ улмаш? Толмет деч ончыч мый кондымо кочкышыжым кочкынам да тудым суапландаренам. Суапландарымашем тудын денак кодеш».
34 Исав, ачажын мутшым колын, кочын шорташ да йӧсын кычкыраш тӱҥалын, вара ачажлан каласен: «Ачай! Мыйымат суапландаре».35 Но тудыжо вашештен: «Шольыч чоялык дене толын да тыйын налшаш суапландарымашетым налын».36 Исав каласен: «Тудо мыйым кок гана ондален, тидланак огыл мо тудлан Иаков лӱмым пуымо. Тудо ончыч мыйын кугэргылыкем, а ынде теве мыйын налшаш суапландарымашымат шкаланже налын». Вара [Исав ачаж деч] йодын: «Тыйын мыланем нимогай суапландарымашет кодын огыл мо?»37 Исаак эргыжлан вашештен: «Мый тудым тый дечет кугуракым ыштенам, чыла иза-шольыжым тудлан тарзым ыштенам, тудлан кинде ден йошкар аракам пуэнам. Мом мый тыланет ыштен кертам, эргым?»38 Но Исав ачажлан каласен: «Суапландарымашетше, ачай, икте веле мо? Мыйымат суапландаре, ачай!» [Исаак нимомат пелештен огылат,] Исав йӱкын шортын колтен.39 Тунам Исаак, тудын ачаже, тудлан вашештен каласен: «Тыйым чапле саскан мланде да кавасе лупс пукшаш тӱҥалыт.*б40 Тый шке кердет дене илаш тӱҥалат, шольычын тарзыже лият. Но жап толеш, тый тудын ваштареш шогалат, кидше йымач лектат».
41 Ачаж деч суапландарымашым налмыжлан Исав Иаковлан шыдым кучен илен да шке семынже каласен: «Ачам шотышто ойгырен-шортмо кече-влак шуыт, да мый Иаков шольым пуштам».42 Исав кугу эргыжын мутшо Ревекка деке миен шуын. Ревекка изирак эргыжым, Иаковым, ӱжын конден да тыге каласен: «Исав изат тыйым пушташ сӧрен.43 Колышт кызыт мыйын мутем, эргым. Тарване, [Месопотамийыш,] Лаван изам деке Харраныш курж.44 Изатын шыдыже лушкымешке, икмыняр жап Лаван дене иле.45 Изатын сырымыже пыта, да тудлан тыге ыштыметым монда. Тунам мый тарземым тыйым тушеч кондаш колтем. Уке гын, мый когыньдамат ик кечыште йомдарем».
46 А Исааклан Ревекка каласен: «Хеттей ӱдыр-влак верч илышын куанжым йомдаренам. Нинын гай тысе хеттей ӱдырым эше Иаков марлан налеш гын, молан мыланем илашыже?»
*а 27:3 Йоҥеж – лук.
*б 27:39 Тидым «Тыйын илыме верет чапле саскан мланде ден кавасе лупс деч тораште лиеш» манынат кусараш лиеш.
Глава 27