Выбрать язык
Книги Ветхого Завета
Книги Нового Завета
с русским текстом1 Израиль чыла мо улыж дене корныш тарванен, Вирсавийыш толын шуын да Исаак ачажын Юмыжлан вольык надырым конден.2 Израильлан йӱдым Юмо кончен, Тудо каласен: «Иаков! Иаков!» Тудыжо вашештен: «Мый тыште улам».3 Юмо каласен: «Мый Юмо, тыйын ачатын Юмыжо, улам. Египетыш каяш ит лӱд: тушто Мый тый дечет пеш кугу калыкым ыштем.4 Тый денет пырля Египетыш Мыят каем, Мыяк тыйым тушеч мӧҥгеш луктам. Колымет годым шинчагомдышетым Иосиф эргыч петыра».
5 Иаков Вирсавий гыч тарванен лектын. Израильын эргыж-влак Иаков ачаштым, шке йочашт ден ватышт-влакым фараонын нуным кондаш колтымо чапле орвалашке шынден наҥгаеныт.6 Иаков да тудын чыла тукымжо Ханаан мландыште чумырымо погыштым, вольыкыштым налыныт да Египетыш миен шуыныт.7 Шке эрге ден эрге уныкаж-влакым, ӱдыр ден ӱдыр уныкаж-влакым – чыла шке тукымжым Иаков пеленже Египетыш конден.
8 Теве Египетыш толшо Израиль эрге-влакын лӱмышт: Иаков да тудын эргыже-влак. Иаковын кугурак эргыже – Рувим.9 Рувимын эргыже-влак: Ханох ден Фаллу, Хецрон ден Харми.10 Симеонын эргыже-влак: Иемуил, Иамин, Огад, Яхин да Цохар, эше Саул, хананей ӱдырамашын эргыже.11 Левийын эргыже-влак: Гирсон, Кааф да Мерари.12 Иудан эргыже-влак: Ир, Онан, Шела, Фарес да Зерах. Но Ир ден Онан Ханаан мландеш коленыт. Фаресын Есром ден Хамул эргыже-влак лийыныт.13 Иссахарын эргыже-влак: Фола, Фува, Иов да Шимрон.14 Завулонын эргыже-влак: Серед, Елон да Иахлеил.15 Чыла нине Лиян эргыже-влак лийыныт, нуным Лия Иаковлан Месопотамийыште ыштен, да эше Динам, Иаковын ӱдыржым, ыштен. Иаковын эрге-ӱдыржӧ-влак чылаже кумло кумытын лийыныт.
16 Гадын эргыже-влак: Цифион, Хагги, Шуни, Эцбон, Ери, Ароди да Арели.17 Асирын эргыже-влак: Имна, Ишва, Ишви, Берий, да нунын шӱжарышт Серах. Берийын эргыж-влак: Хевер да Малхиил.18 Нинышт Зелфан эргыж-влак лийыныт, тудыжым Лаван Лия ӱдыржылан пуэн улмаш. Зелфа Иаковлан чылаже латкуд шочшо ден уныка-влакым пӧлеклен.
19 Иаковын Рахиль ватыж деч эргыже-влак: Иосиф ден Вениамин.20 Египет мландыште Иосифын Манассий ден Ефрем эргыже-влак шочыныт, нуным Илиополь гыч улшо Потифер онаеҥын Асенефа ӱдыржӧ ыштен.21 Вениаминын эргыже-влак: Бела, Бехер, Ашбел; [Белан эргыже-влак:] Гера, Нааман, Эхи, Рош, Муппим, Хупим да Ард.22 Нине Рахильын Иаковлан ыштыме эрге ден уныкаже-влак, чылаже латныл еҥ.
23 Данын эргыже: Хушим.24 Неффалимын эргыже-влак: Иахцеил, Гуни, Иецер да Шиллем.25 Нине Валлан эргыже-влак, тудым Лаван Рахиль ӱдыржылан пуэн улмаш. Валла Иаковлан чылаже шым эрге ден уныка-влакым пӧлеклен.
26 Иаков дене пырля Египетыш толшо тудын тукымжо, – эргыже-влакын ватыштым шотлаш огыл гын, – чылаже кудло куд еҥ лийын.27 Иосифын кок эргыже лийын, нуно Египетыште шочыныт. Иаковын Египетыш куснышо тукымжо чылаже шымле [вич] еҥ лийын.
28 Гесемыш корным ончыктыжо манын, Иаков шкеж деч ончыч Иосиф деке Иудам колтен. Тыге нуно Гесем мландыш толын шуыныт.29 Иосиф шкенжын чапле орважым кычкен да ачажым, Израильым, вашлияш Гесемыш кудалын. Ачажым ужмекше, тудым чот ӧндалын, кужу жап шортын.30 Израиль Иосифлан каласен: «Тыйым илышым ужмеке, мылам ынде колашат лиеш».
31 Иосиф иза-шольыж-влаклан, ачажын уло тукымжылан каласен: «Мый фараон дек каем да тудлан ойлем: ”Иза-шольо-влакем да ачамын уло тукымжо Ханаан мланде гыч мый декем толыныт.32 Нуно кӱтӱчӧ улыт, вольыкым ашнат. Тыгыде да шолдыра вольыкым, чыла погыштым пеленышт конденыт”.33 Тендам фараон шкеж деке ӱжеш да могай пашам ыштымыдам йодеш гын,34 тендам Гесем мландеш илаш кодышт манын, тыге каласыза: ”Ме, тыйын кулет-влак, ачана-кочана семынак, изи годсек тӱҥалын кызыт мартеат вольык ончышо улына”. Вет египет калык шорык кӱтӱчым йырнык еҥ семын онча».
Глава 46