Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен: «Фараонлан да египет калыклан Мый эше ик орлыкым колтем, тидын деч вара тудо тендам тышечын колта. Колташ келшымекше, тудо тендам колта гына огыл, а поктен луктеш.2 Тый Израиль калыклан [шолып] каласе: кажне пӧръеҥ ден ӱдырамаш шке палыме еҥышт деч ший ден шӧртньӧ ӱзгарым [да вургемымат] йодын налже».3 Египтян-влак Израиль эрге-влак деке поро кумылан лийыныт, [сандене нуно ты калыклан мом йодмыштым пуэныт]. Тыште Господьын кидше лийын. Моисеят Египет мландыште [фараон,] тудын тарзыж-влак да уло калык коклаште кугун пагалыме еҥ лийын.
4 Моисей фараонлан каласен: «Господь тыге ойла: Мый пелйӱдым Египет мланде мучко эртем.5 Египет мландыште икымше эрге-влак чыланат колат: престолышто шинчыше фараонын кугэргыж гыч тӱҥалын, кидвакш дене пашам ыштыше кул ӱдырамашын кугэргыже марте. Тыгак вольыкын икымше презе ден пачашт колат.6 Египет мланде мучко пеш кугу магырымаш тӱҥалеш, тыгайже нигунамат лийын огыл да тетла огешат лий.7 Но Израиль эрге-влак ӱмбак, нунын вольыкышт ӱмбак эсогыл пий огеш опталте. Те ужыда: могай ойыртемым Господь Египет ден Израиль калык-влак коклаште ышта.8 Тыйын чыла тарзет мый декем толыт, ончылнем сукен шинчыт да маныт: ”Тый шкежат, тыйын вуйлатыме пӱтынь калыкетат тышеч кайыза”. Тиддеч вара мый тендан деч каем». Тидым каласымек, Моисей фараон деч шыдешкыше лектын каен.
9 Господь Моисейлан каласен: «Египет мландыште Мыйын [палдарыше пале ден] ӧрыктарыше пашам шукырак лийышт манын, фараон тендам колыштын огыл».10 Моисей ден Аарон чыла тиде [палдарыше пале ден] ӧрыктарыше пашам фараон ончылно ыштеныт. Но Господь фараонын шӱм-чонжым ӱскыртымак коден: тудо Израиль эрге-влакым шке мландыж гыч колтен огыл.
Глава 11