Выбрать язык
Книги Ветхого Завета
Книги Нового Завета
с русским текстом1 Египет мландыште Господь Моисей ден Ааронлан каласен:
2 «Тек тиде тылзе тыланда идалыкын икымше тылзыже лиеш, тылзе-влак коклаште тудо икымше лийже.3 Уло Израиль калыклан каласыза: тиде тылзын луымшо кечынже тек кажне еш оза ик пачам налеш, ик ешлан – ик пача.4 А еш изи да пачам пӱтынек кочкын ок пытаре гын, еҥ чотым да кӧн мыняр кочмыжым шотыш налын, тек тиде еш лишыл пошкудыжо-влак дене пырля ик пачам налыт.5 Пача экшык деч посна, ик ияш тага лийже. Тудо шорыкын але казан пачаже лийже.6 Пачам тиде тылзын латнылымше кечыж марте ашныза. А латнылымше кечын, кас шумеке, тудым шӱшкылза. Тек пӱтынь Израиль калык тыге ышта.7 Тек пача вӱрым налыт да, могай пӧртыштӧ шылжым кочкаш тӱҥалыт, тудо пӧрт омсан кок янакшым, кӱшыл каштажым тиде вӱр дене шӱралтат.8 Шылым тиде йӱдымак кочкын пытарыман. Тек тудым, тулеш кӱктен, шергинде да кочо шудо дене пырля кочкыт.9 Тудын шылжым кӱктен шуктыде але вӱдеш шолтен ида коч, пачам вуй-йолге, кӧргыжге тулеш кӱктыза.10 Эр марте тудын деч нимомат ида кодо. Мо кодеш – эр шумо деч ончыч тулеш йӱлалтыза. [Пачан лужым ида пудырто.]
11 Пачам кочмыда годым ӱштыда ӱшталме, йолыштыда йолчием да кидыштыда пондо лийышт, кочса вашкен. Тиде – Господьын Кугечыже.12 Тиде йӱдым Мый Египет мланде мучко эртем да тушто айдеме гыч тӱҥалын вольык марте пӧръеҥ тукымын чыла икымше шочшыштым пытарем. Египетысе чыла юмылан Мый судым ыштем. Мый Господь улам.13 Но пӧрт-влак, кушто те лийыда, вӱр дене палемдыме лийыт. Мый вӱрым ужамат, тендан воктеч эртен каем.*а Кунам Мый Египет мландым пытараш тӱҥалам, колымашым кондышо тиде орлык тендан коклаште ок лий.
14 Тек тиде кече тыланда шарныктыш кече семын лиеш. Тукым гыч тукымыш тудым Господьын пайремже семын палемдыза. Тиде тыланда курым-курымеш шуктен шогаш кӱлмӧ кӱштымаш.15 Шергиндым шым кече кочса. Икымше кечынак мӧҥгыда гыч чыла рум луктын шуыза. Кӧ нине шым кечылаште ру дене ыштымым кочкеш, тудо Израиль кокла гыч кораҥдыме лиеш.16 Икымше да шымше кечын тек тендан святой погынымаш лиеш. Нине кечылаште шкаланда кочкышым веле ямдылаш лиеш, а моло вес пашам ышташ ок лий.17 Шергинде пайремым шуктен шогыза, вет тиде кечын Мый тендам тӱшкан-тӱшкан Египет мланде гыч луктынам. Тиде кечым тукым гыч тукымыш палемден шогыза, тиде тыланда курым-курымеш шуктен шогаш кӱлмӧ кӱштымаш.
18 Икымше тылзын латнылымше кечын касше гыч тӱҥалын, тудо тылзынак коло икымше кечын касше марте шергиндым гына кочса.19 Шым кече тендан мӧҥгыштыда ру лийшаш огыл, вет кӧ шушо руаш гыч ыштымым кочкеш – кеч йотъеҥ але тендан калык кокла гыч лийже, – Израиль калык кокла гыч кораҥдыме лийшаш.20 Шушо руаш гыч ыштымым нимомат ида коч. Кеч-кушто лийыда гынат, тиде жапыште шергиндым веле кочса».
21 Моисей Израильын чыла кугуракыштым ӱжын да каласен: «Пачам ешын-ешын ойырен налза да Кугече надырлан шӱшкылза.22 Иссоп укшым налза да атыште улшо вӱрыш тушкалтыза, вӱр дене омсан каштажым да кок янакшым шӱралтыза. Тек нигӧат эр марте пӧртшӧ гыч огеш лек.23 Господь Египет мучко пуштеден кая, а кушто омса кашта ден кок янакыштыже вӱрым ужеш – тыгай омса воктеч эртен кая. Пуштедышылан пӧртышкыда пураш да тендам пытараш Тудо огеш пу.24 Тек тиде кӱштымаш тыланда да эрге-уныкада-влаклан курымешлан закон лиеш.25 Господьын тыланда пуаш сӧрымӧ мландыш мийымекыда, тиде пайрем йӱлам шуктен шогыза.26 Шочшыда-влак ”тиде пайрем йӱла мом ончыкта?” манын йодыт гын,27 нунылан каласыза: ”Тиде – Господьлан Кугече надыр. Египетыште египтян-влакым пытарен кайымыж годым Тудо Израиль эрге-влакын пӧрт воктечышт эртен каен, суртнам утарен коден”». Тунам калык Господь ончылно сукалтен шинчын да вуйжым савен.
28 Вара Израиль эрге-влак тарваненыт да чылажымат Господьын Моисей ден Ааронлан кӱштымыж семынак ыштеныт.
29 Пелйӱдым Господь Египет мландыште кугэрге-влакым чылаштымат пытарен – престолышто шинчыше фараонын икымше шочшыж гыч тӱҥалын, казаматыште шинчышын икымше шочшыж марте. Тыгак вольыкынат икымше презе-пачаштым пытарен.
30 Йӱдым фараон шкежат, тарзыже-влакат да уло Египет кынелыныт. Египет мландыште магырен шортмаш тӱҥалын, вет кажне пӧртыштӧ колышо лийын.31 Йӱдым фараон Моисей ден Аароным ӱжыктен да каласен: «Кынелза да мыйын калыкем кокла гыч лекса, теат да моло Израиль эрге-влакат. Шке йодмыда семынак кайыза да Господь [Юмыланда] кумалза.32 Тыгыде да шолдыра вольыкдамат йодмыда семынак пырля налза. Кайыза да мыламат суапландарымашым кумал йодса».
33 Израиль калык тиде мландым писынрак коден кайыже манын, египтян-влак нуным вашкыкташ тӱҥалыныт. «Уке гын, ме чыланат колена», – нуно маныныт.34 Израильтян-влак пырля руашыштым налыныт, тудыжо эше шуын огыл улмаш. Руашвочкым нуно, вургемыш вӱдылын, вачӱмбалнышт наҥгаеныт.
35 Израиль эрге-влак, Моисейын ойлымыж семынак, египтян-влак деч ший да шӧртньӧ ӱзгар-влакым, тыгак вургемым йодын налыныт.36 Египтян-влак Израиль калык деке поро кумылан лийыныт – нуно израильтян-влаклан шке ӱзгарыштым пуэныт. Тыште Господьын кидше лийын, да Израиль эрге-влак Египет калыкын шуко поянлыкшым наҥгаеныт.
37 Израиль эрге-влак Раамсес гыч Сокхофыш каяш лектыныт – ӱдырамаш ден йоча-влакым шотлаш огыл гын, йолешке пӧръеҥ-влак кудшӱдӧ тӱжем наре лийыныт.38 Нунын дене пырля тыгак вес калык гыч шуко еҥ лектын, а тыгыде ден шолдыра вольык пеш кугу кӱтӱ лийын.39 Египет гыч лукмо руаш гыч лепошкам кӱэштыныт. Руашыже эше шуын огыл улмаш, вет Египет гыч поктен лукмылан кӧра вашкашышт логалын, да нуно корнылан кочкышымат ямдылен шуктен огытыл.
40 Израиль эрге-влак [да нунын ача-кочашт] Египетыште [да Ханаан мландыште] нылшӱдӧ кумло ий иленыт.41 Нылшӱдӧ кумло ий эртымеке, тиде кечынак Господьын уло калыкше тукым дене тӱшкан-тӱшкан Египет гыч йӱдым каяш лектын.42 Тиде йӱд Господьын ончен-эскерен шогымо йӱдшӧ лийын: Тудо Израиль калыкым Египет мланде гыч луктын. Тиде йӱд – чыла Израиль эрге-влакын тукым гыч тукымыш Господь лӱмеш малыде эртарыме пайрем йӱдышт.
43 Господь Моисей ден Ааронлан каласен: «Теве Кугече пача шотышто кӱштымаш: йот калык гыч тудым нигӧат кочшаш огыл.44 Оксала налме кеч-могай кул пӱчмӧ йӱлам эртыме деч вара тудым кочкын кертеш.45 Кӱчык жаплан илаш толшо але тарлалтше еҥ тудым кочшаш огыл.46 Пачам ты пӧртыштак кочман. [Эр марте тудын деч нимомат ида кодо,] шылым пӧрт гыч ида лук, лужым ида пудырто.47 Уло Израиль калык Кугечым эртарышаш.48 Тый денет йотъеҥ илаш тӱҥалеш, да тудо Господьын Кугече пайремжым ыштынеже гын, тый ончыч ешыштыже чыла пӧръеҥ дене пӱчмӧ йӱлам эртаре. Тунам тудо шке калыкетын еҥже гаяк лиеш да Кугече пайремым ыштен кертеш. Но пӱчдымӧ еҥ Кугече пачам кочшаш огыл.49 Шкендан еҥлан да тыйын калыкет коклаште илыше йотъеҥлан ик закон лиеш».
50 Израиль эрге-влак чылажымат Господьын Моисей ден Ааронлан кӱштымыж семынак ыштеныт.51 Лач тиде кечын Господь Израиль эрге-влакым тукымышт дене тӱшкан-тӱшкан Египет мланде гыч луктын.
*а12:13 Еврей шомак песах ’Кугече’ вес еврей шомак пасах ’воктеч эртен каяш’ дене ик семынрак йоҥга.
Глава 12