Выбрать язык
Книги Ветхого Завета
Книги Нового Завета
с русским текстом1 Чыла тиде шомакым Юмо [Моисейлан] каласен:
2 «Мый Господь, тыйын Юмет, улам. Мый тыйым Египет мланде гыч, кул лийме вер гыч, луктынам.
3 Мый дечем моло вес юмет ынже лий.
4 Шкаланет шояк юмым ит ыште – мо кӱшнӧ каваште, мо ӱлнӧ мландыште, мо мланде деч ӱлнӧ вӱдыштӧ уло, нунын тӱсан нимогай полганым ит ыште.5 Нунылан ит кумал, ит служитле. Вет Мый Господь, тыйын Юмет улам, вес юмылан кумалмым Мый чыташ ом тӱҥал. Мыйым ужмышудымо-влакын йочаштлан ачаштын титакышт верч кумшо да нылымше тукым марте мутым кучыктем.6 А Мыйым йӧратыше да Мыйын кӱштымем шуктышо-влаклан тӱжемше тукымышт марте порылыкым ыштем.
7 Господьын, тыйын Юметын, лӱмжым арам ит пелеште. Вет Тудын лӱмжым арам пелештыше еҥым Господь мут кучыктыде ок кодо.
8 Шуматкечым шарне, тудым святой кечылан шотло.9 Куд кече пашам ыште, тӱрлӧ сомылетым шукто,10 а шымше кече, шуматкече, Господь Юметлан лийже. Тиде кечын тый шкежат, эргыч ден ӱдыретат, пӧръеҥ ден ӱдырамаш кулетат, [ӱшкыж ден осёлетат, нимогай] вольыкетат, тыйын олаштет илыше йотъеҥат нимогай пашам ида ыште.11 Вет куд кече жапыште Господь кавам, мландым, теҥызым да чылажымат, мо тушто уло, ыштен, а шымше кечын канен. Сандене Господь шуматкечым суапландарен да святитлен.
12 Шке ачат ден аватым пагале, тунам [тыланет сай лиеш да] Господь Юметын пуышаш мландыштыже кужу ӱмырым илет.
13 Ит пушт.
14 Ит яжарлане.
15 Ит шолышт.
16 Лишылъеҥет*а ӱмбак шойыштын ит таныкле.
17 Лишылъеҥетын пӧртшылан ит сутлане. Тудын ватыжлан, [пасужлан,] пӧръеҥ але ӱдырамаш кулжылан, ӱшкыжшылан, осёлжылан, [нимогай вольыкшылан,] – нимоланат, мо тудын уло, ит сутлане».
18 Кӱдырчӧ да пуч йӱкым колмеке, волгенче тул да шикшештше курыкым ужмеке, уло калык лӱдын да умбакырак каен шогалын.19 Нуно Моисейлан каласеныт: «Тый мыланна ойло, а ме колышташ тӱҥалына. Юмо мыланна ынже ойло, уке гын ме колена».20 Моисей калыклан каласен: «Ида лӱд. Тендам тергаш да ончыкыжым, Тудын деч лӱдын, сулыкым ида ыште манын, Юмо [тендан деке] толын».
21 Калык тораште шоген, Моисей гын Юмо улмо пычкемыш дек лишемын.
22 Господь Моисейлан каласен: «[Иаков тукымлан,] Израиль эрге-влаклан увертаре: те Мыйын пылпомыш гыч ойлымем ужда.23 Шкаланда ший але шӧртньӧ юмым ида ыште, нуным Мый денем иктӧр ида шынде.24 А тый Мыланем рок гыч жертвенникым ыште да тушто йӱлалтен пуымо да татулык надыретым,*б шорык ден казатым, ушкал ден ӱшкыжетым кондо. Мыйын лӱмемлан кумалаш ойырымо кажне верыш Мый тый декет толам да тыйым суапландарем.25 Мылам жертвенникым кӱ гыч ышташ тӱҥалат гын, тудым руымо кӱ гыч ит ыште. Вет кӱ дек ӱзгар тӱкна гын, тый тудым шакшылет.26 Жертвенникыш тошкалтыш дене ит кӱзӧ, уке гын ӱлычын тыйын чара могырет кояш тӱҥалеш.
*а 20:16 Лишылъеҥ – тиде вершӧрыштак илыше еҥ, общинын членже, тиде калыкынак еҥже.
*б 20:24 Татулык надыр – мирная жертва.
Глава 20