Выбрать язык
Книги Ветхого Завета
Книги Нового Завета
с русским текстом1 Теве калыклан увертарышаш закон-влак:2 Еврей кулым оксала налат гын, тек тудо [тыланет] куд ий пашам ышта, а шымше ийын тудо, оксам тӱлыде, эрыкан лийшаш.3 Тудо тый декет шкетын толын гын, тек шкетынак эрыкыш лектеш. А ватыж дене пырля толын гын, тудын дене пырля тек ватыжат эрыкан лиеш.4 Тудлан ватым оза пуэн да ватыже тудлан эрге але ӱдыр-влакым ыштен гын, ватыж ден шочшыжо-влак тек озаж денак кодыт – эрыкыш тудо шкетын лекшаш.5 Но кул «мый озамым, ватем да шочшем-влакым йӧратем, эрыкыш ынем лек» манеш гын,6 тек озаже тудым Юмо ончыко*а конда, кулжым омса але омса янак воктеке шогалта да пылышыжым вӱрж дене шӱта. Тыге тудо курымешлан озажын кулжо лиеш.
7 Кӧ шке ӱдыржым кул шотеш ужала гын, тудыжо пӧръеҥ кул семын эрыкан лийын ок керт.8 Ӱдыр озалан ок келше гын, – кеч тудо ӱдырым шкаланже ватылыкеш налаш палемден улмаш – тек оза тудым мӧҥгеш тӱлен налаш эрыкым пуа. Марлан налме шотышто оза ӱдырым ондален гын, тудым йот калыклан ужален ок керт.9 Ӱдырым оза шке эргыжлан марлан налаш палемден гын, тек тудым шке ӱдыржӧ дене тӧр шотла.10 Оза эше весым марлан налеш гын, тудо кулватыжым кочкыш, вургем да вате-марий семын илыме деч посна кодышаш огыл.11 Нине кумытым оза ок шукто гын, тек кулвате, оксам тӱлыде, эрыкан лиеш.
12 Кӧ вес еҥым пера да тудыжо кола – шкежат пуштмо лийшаш.13 Но кӧ тидым шоныде ыштен колтен, да тыге лияш Юмо чаракым шынден огыл – Мый [тыгай пуштшо еҥлан] куржашыже тый денет верым ончыктем.14 А кӧ лишылъеҥжым лӱмынак да чоян, тудлан шыдым кучен пуштеш, [вара жертвенник деке куржын толеш] – пушташ манын, тудым Мыйын жертвенникем дечат поген нал.15 Кӧ ачажым але аважым пера гын, тудо пуштмо лийшаш.16 Кӧ [Израиль тукым] еҥым шолыштеш да [тудым, кулыш савырен,] ужала але шолыштмо еҥым тудын дене муыт – тыгай еҥ пуштмо лийшаш.17 Кӧ ачаже але аваж нерген шӱктарен ойла, тудо пуштмо лийшаш.
18 Каргашыме годым ик еҥ весым кӱ дене але мушкындыж дене пера, а тудыжо ок коло, но эмганен возеш,19 вара кынелеш да пӧртшӧ гыч тояш эҥертен лектеш гын, перыше еҥ титакше верч мутым кучышаш огыл. Но тудо саде еҥын пашам ыштыде кийыме жапшылан да эмлалташыже оксам пуышаш.20 Кӧ шке пӧръеҥ але ӱдырамаш кулжым тоя дене пера да тудыжо тушанак кола гын, оза тидлан мутым кучышаш.21 Но кул тидын деч вара ик але кок кече ила гын, озаже мутым кучышаш огыл, вет кулжо шкенжынак погыжо.22 Кунам еҥ-влак кредалмышт годым мӱшкыран ӱдырамашым перат, да тудын азаже лугыч лиеш, но моло эҥгек ок лий гын, ӱдырамашын марийже могай акым каласа, титакан еҥ тиде акым судитлыше-влак ончылно тӱлышаш.23 Но моло эҥгек лиеш гын, чонлан чоным пу,24 шинчалан – шинчам, пӱйлан – пӱйым, кидлан – кидым, йоллан – йолым,25 йӱлалтмашлан – йӱлалтмашым, сусырлан – сусырым, эмганымашлан – эмганымашым.26 Кӧ шкенжын пӧръеҥ але ӱдырамаш кулжым шинчаж гыч пера, да тудыжын шинчаже эмгана гын, шинча верч тек тудлан эрыкым пуа.27 Кӧ шкенжын пӧръеҥ але ӱдырамаш кулжын пӱйжым перен луктеш гын, пӱй верч тек тудлан эрыкым пуа.
28 Ӱшкыж пӧръеҥым але ӱдырамашым ӧрген пуштеш гын, ты вольыкым кӱм кышкен пушташ кӱлеш, а шылжым кочман огыл. Ӱшкыжын озаже титакан огыл.29 Но ӱшкыж тидын деч ончычат ӧргедыл коштын да тидын нерген озажлан шижтарен каласыме улмаш, но тудо вольыкшым эскерен огыл, а ӱшкыжшӧ пӧръеҥым але ӱдырамашым пуштын гын, ӱшкыжым кӱм кышкен пуштман, тыгак озажымат пушташ кӱлеш.30 Но озажлан сулен налаш акым шындат гын, тек тудо, палемдыме акым тӱлен, шке чонжым сулен налеш.31 А ӱшкыж иктаж-кӧн эргыжым але ӱдыржым ӧрген пуштеш гын, кӱшнӧ каласыме закон семынак ыштыман.32 Ӱшкыж пӧръеҥ але ӱдырамаш кулым ӧрген пуштеш гын, кулын озажлан кумло сикль шийым тӱлыман, а ӱшкыжшым кӱм кышкен пушташ кӱлеш.
33 Кӧ вӱдлан кӱнчымӧ вынемжым почын кода але вынемым кӱнча да тудым ок петыре, да тушко ӱшкыж але осёл пурен кая гын,34 вынемын озаже вольыкын озажлан тӱлышаш, а вольыкын колышо капше вынем озалан лийшаш.
35 Иктаж-кӧн ӱшкыжшӧ вес еҥын ӱшкыжшым ӧрген пуштеш гын, илыше ӱшкыжым тек ужалат да акшым пелыгыч шелыт, колышо вольыкымат тек пелыгыч шелыт.36 Ӱшкыжын ӧргедылше улмыжым тылеч ончычат паленыт да озажлан [тидын нерген шижтарен каласыме улмаш,] но тудо ӱшкыжшым эскерен огыл гын, тудо ӱшкыж олмеш ӱшкыжым пуышаш, а колышо вольыкым тек шкаланже налеш.
*а 21:6 «Юмо ончыко»: тидым «Судья-влак ончыко» манынат кусараш лиеш.
Глава 21