Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Кӧ проказе черан, кӧ йоген лекмаш дене орлана, кӧ колышо дек тӱкнымӧ дене ару огыл лийын – Израиль калыклан нуным стан гычын поктен колташ кӱштӧ.3 Тыгай пӧръеҥымат, ӱдырамашымат стан деч ӧрдыжкӧ поктен колтыза: тек нуно станым, кушто Мый тендан коклаште илем, огыт амырте».4 Израиль эрге-влак тыгак ыштеныт – тыгай еҥ-шамычым стан деч ӧрдыжкӧ поктен колтеныт. Кузе Господь Моисейлан кӱштен, Израиль эрге-влак тугак ыштеныт.
5 Господь Моисейлан каласен:6 «Израиль эрге-влаклан ойло: иктаж пӧръеҥ але ӱдырамаш, вес еҥлан осал пашам ыштен, Господь ончылно сулыкыш пура да титакан лиеш гын,7 тек тудо ыштыме сулыкшо нерген почын каласа, а эҥгекшылан тӱрыснек пӧртылта. Тек тышке эше визымше ужашым ешара да эҥгекым чытыше еҥлан пуа.8 Тиде еҥже колен да тудын тукымым аралыше родыжо уке гын, тиде ак Господьлан лиеш, тудым иерейлан пуыман. Эҥгекым ыштыше еҥ дене касарыме йӱлам шуктымо тага тыгак иерейлан лиеш.
9 Израиль эрге-влакын иерей дек кондымо нӧлтал пуымо*а чыла святой пӧлекышт иерейланак лиеш.10 Нине кондымо пӧлек-влак иерейлан лийыт, иерейлан кӧ мом пуа – чылажат тудын лиеш».
11 Господь Моисейлан каласен:12 «Израиль эрге-влаклан ойло: лийын кертеш – иктаж-кӧн ватыже шке марийжым ондала,13 тудын дене вес пӧръеҥ мала да шке нӧшмыжым йоктара, а марийже тидын нерген ок пале. Ӱдырамаш шкенжым шолып амырта, тудын ӱмбак таныклыше нигӧ ок лий, нигӧ тудым ок кучо.14 Тунам марийжым ушкалымаш шӱлыш авалтен кертеш, да тудо амыргыше ватыжым ушкалаш тӱҥалеш. Тыгеат лийын кертеш: вате марийжым ок ондале, но марийжым ушкалымаш шӱлыш авалта, да тудо шке ватыжым ушкалаш тӱҥалеш.15 Тек тунам тиде марий шке ватыжым иерей деке намия, ватыж верч надырлан ефан ик луымшо ужашыже шож ложашым конда. Тиде – ушкалымаш верч кондымо, осал пашам шарныктыше надыр, сандене тудо ложашыш олив ӱй ден ладыным ынже пыште.
16 Тек иерей тиде ӱдырамашым Господь ончыко конден шогалта,17 шун атыш святой вӱдым тема, скиний кӱвар гыч изишак мландым налеш да вӱдыш пышта.18 Ӱдырамашым Господь ончыко шогалтымеке, тек иерей тудын ӱпшым шала колта, кидышкыже осал пашам шарныктыше – ушкалымаш верч кондымо – надырым кучыкта. А иерейын кидыштыже каргымашым кондышо кочо вӱд лиеш.19 Вара иерей ӱдырамашлан тыге товатлыктен каласа: ”Тый денет нигӧ мален огыл да тый, мариетым ондален, шкендым амыртен отыл гын, каргымашым кондышо тиде кочо вӱд тек тылат эҥгекым ок ыште.20 Но мариетым ондален шкендым амыртенат, мариет деч посна тый денет вес пӧръеҥ мален гын...” –21 тунам иерей ӱдырамаш ӱмбак тыгай каргымаш мутлам каласышаш: ”Тек шке калыкет коклаште тыйын ӱмбакет Господь каргымашым колта, тек Господь тыйын авагудетым тӱлыжгышым да мӱшкыретым пуалшым ышта.22 Тек каргымашым кондышо тиде вӱд тыйын кӧргышкет пура, да мӱшкырет пуалеш, авагудет тӱлыжга!” Ӱдырамаш ”аминь, тыгак лийже!” манын йӱкын каласышаш.
23 Тек иерей тиде каргыме шомакым вӱдылка книгаш воза, вара мом возымым кочо вӱдыш мушкын колта24 да каргымашым кондышо кочо вӱдым ӱдырамашлан йӱкта. Тиде вӱд ӱдырамашын кӧргышкыжӧ пура да тудлан орлыкым конда.25 Тек иерей ӱдырамаш кид гыч кинде надырым – ушкалымаш верч кондымо надырым – налеш да, Господь ончылно нӧлталын, жертвенник деке наҥгая.26 Тек иерей кормыжшо дене кинде надыр гыч шарныктыше ужашым*б налеш да жертвенникеш йӱлалтен тӱргыкта, тидын деч вара ӱдырамашлан вӱдым йӱкта.27 Ӱдырамаш чынжымак марийжым ондален да шкенжым амыртен гын, каргымашым кондышо кочо вӱд, йӱктымеке, кӧргышкыжӧ пурен, тудлан орлыкым конда – мӱшкыржӧ пуалеш, авагудыжо тӱлыжга. Шке калыкше коклаште тиде ӱдырамаш каргыме лиеш.28 А ӱдырамаш ару, шкенжым амыртен огыл гын, тудын дене нимат ок лий, тудо йочам ыштен кертеш.
29 Ушкалымаш шотышто теве тыгай закон. Кунам вате марийжым ондала да шкенжым амырта,30 але кунам марийым ушкалымаш шӱлыш авалта да тудо ватыжым ушкалаш тӱҥалеш, тек тунам тудо ватыжым Господь ончыко шогалта, а иерей ӱдырамаш дене чылажымат тиде закон почеш ышта.31 Тыге марийже сулык дечын ару лиеш, а ватыже шке сулыкшылан мутым кучаш тӱҥалеш».
*а 5:9 Тиде надырым, кидым кӱш нӧлталын, конденыт.
*б 5:26 Шарныктыше ужаш – надырын тиде ужашыже пӱтынь надыр Господьын улмыжым шарныктарен.
Глава 5