Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Израиль калыклан теве мом ойло: иктаж пӧръеҥ але ӱдырамаш, шкенжым Господьлан святитлен, назорей лияш сӧра гын,3 тиде еҥ йошкар арака ден руштыктарыше моло йӱышым, нунын гыч ыштыме сыркам,*б виноград гыч ыштыме йӱышым йӱшаш огыл. Тыгак виноград ден изюмымат кочшаш огыл.4 Назорей лийме жапыште тудо нимом виноград гыч ямдылымым, эсогыл кичке ден шӱмжымат кочшаш [да йӱшаш] огыл.
5 Назорей лияш сӧрымӧ жап мучко тиде еҥ ӱпшӧ ден пондашыжым тӱредшаш огыл. Шкенжым Господьлан пуымо жап мучаш марте тудо святой улеш, сандене тек тудо ӱпшым кушта.
6 Шкенжым Господьын назорейжылан сӧрымӧ чыла кечылаште тудо колышо кап деке лишемшаш огыл.7 Юмылан шкенжым пуымо пале – тудын вуйыштыжо, сандене кеч ачаже але аваже, изаже але шольыжо, акаже але шӱжарже кола гынат, нунын деке тӱкнымӧ дене шкенжым тудо амыртышаш огыл.8 Назорей лийме кечылаште тудо Господьлан святой улеш.
9 Иктаж-кӧ кенета назорей воктене колен колта, да тудыжо тидын дене назорей улмо ӱпшым амырта гын, эрналтме кечын – шымше кечын – тудлан ӱпшым нӱжыман.10 Кандашымше кечын тудо тек Юмо дене вашлийме омашыш пурымо вер деке иерейлан кок кедым але кок самырык кӧгӧрченым конда.11 Ик кайыкшым иерей сулык верч надырлан, а весыжым йӱлалтен пуымо надырлан конда. Тыге иерей назорейым колышо кап дене амыргымыж деч эрныкта, да тиде кечын тудын вуйжо угыч святитлыме лиеш.12 Господьын назорейже лийме кече-влакым тудо угыч тӱҥалшаш да титак верч надырлан ик ияш пачам кондышаш. Ондак назорей лийме кечыже-влак тыгодым шотыш огыт налалт, вет тудын назорей улмыжо амырген улмаш.
13 Назорей лийме шотышто теве тыгай закон. Назорей лийме жап эртымеке, тек тиде еҥым Юмо дене вашлийме омашыш пурымо вер деке кондат.14 Тушто тудо Господьлан надырым кондышаш: экшыкдыме идалыкаш тагапачам – йӱлалтен пуаш, экшыкдыме идалыкаш шорыкпачам – сулык верч надырлан, экшыкдыме тагам – татулык надырлан,15 тыгак ик комдо эн сай ложаш гыч ыштыме шергиндым – олив ӱй дене лугымо шергиндым да олив ӱй дене шӱрымӧ шере лепошкам, йӱла дене келшышын нунын дене пырля кинде надыр да йошкар арака надыр лийшаш улыт.16 Тек иерей чыла тидым Господь ончыко намия да тиде еҥын сулык верч надыр ден йӱлалтен пуымо надыржым конда.17 Вара тек Господьлан шергиндан комдо дене пырля татулык надыр тагам конда, тыгак кинде надыр ден арака надырым конда.18 Тек тиде еҥ Юмо дене вашлийме омашыш пурымо вер воктене назорей улмыж годымсо ӱпшым тӱредеш да татулык надыр йымалне йӱлышӧ тулыш пышта.
19 Кунам назорей шке ӱпшым тӱредеш, иерей тек таган шолтымо ончыл эрдыжым, комдо гыч ик шере лепошка ден ик шергиндым налеш да назорейын кидышкыже пышта.20 Вара тек иерей чыла тидым, Господь ончылно рӱзалтен, кӱшкӧ нӧлтал конда. Тиде святой надыр, Господь ончылно рӱзалтен пуымо оҥ ден нӧлтал пуымо эрде семынак, иерейлан лиеш. Тидын деч вара назорей йошкар аракам йӱын кертеш.
21 Назорей лияш сӧрышӧ еҥ шотышто теве тыгай закон. Назорей улмыжлан тудо Господьлан тыгай надырым кондышаш. Тидын деч посна тудо пуэн кертме моло надырымат кондышаш. Шке сӧрымыжым тудо назорей закон дене келшышын шуктен шогышаш».
22 Господь Моисейлан каласен:23 «Аарон ден эргыж-влаклан ойло: израиль эрге-влакым тыге ойлен суапландарыза:
24 ”Тек Господь тыйым суапландара да арален шога!
25 Тек Господь тыйым шке чурийжын волгыдыж дене волгалтара
2 да тыйым серлага!
26 Тек Господь шке чурийжым тый декет савыра
2 да тыланет тынысым пуа!”
27 Тек нуно тыге Мыйын лӱмем израиль эрге-влак ӱмбаке ӱжын кумалыт, да Мый, [Господь,] нуным суапландарем».
*а 6 Назорей – Шкенжым Господьлан пуаш сӧрышӧ еҥ. Мутерым ончо.
*б 6:3 Сырка – уксус.
Глава 6