Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Ааронлан ойло: шым лампадым туге вераҥде – тек нуно светильник ончылно улшо кумдыкым волгалтарат».3 Аарон тыгак ыштен: Господьын Моисейлан кӱштымыж семынак, лампаде-влакым светильникыш туге вераҥден – нунышт ончыл кумдыкым волгалтареныт.4 Светильник гын вургыж гыч тӱҥалын пеледышыж марте шӧртньӧ дене таптен ыштыме лийын. Тудым Господьын Моисейлан ончыктымо гайымак ыштеныт.
5 Господь Моисейлан каласен:6 «Израиль эрге-влак кокла гыч левит-шамычым ойыро да нунын дене эрныктыме йӱлам эртаре.7 Нуным эрныкташ манын, теве мом ыште: ӱмбакышт эрныктыше вӱдым шыжыкте, да тек нуно уло капысе чыла ӱпым нӱжен налыт да вургемыштым мушкыт – тунам ару лийыт.8 Тек левит-влак самырык ӱшкыжым да тудын пелен кӱлшӧ кинде надырым – олив ӱй дене йӧрымӧ эн сай ложашым – налыт. Вес ӱшкыжшым сулык верч надырлан нал.
9 Левит-влакым Юмо дене вашлийме омаш деке кондо да пӱтынь израиль калыкым пого.10 Левит-влакым Господь ончыко шогалте, тек израиль эрге-шамыч нунын ӱмбаке кидыштым пыштат.11 Левит-влак Господьлан служитлышт манын, тек Аарон нуным Господьлан израиль эрге-влак деч пӧлек семын пуа.12 Тек левит-влак кидыштым ӱшкыж-шамычын вуйышкышт пыштат. Левит-влак дене касарыме йӱлам шукташ манын, ик ӱшкыжшым Господьлан сулык верч надырлан, а весыжым йӱлалтен пуымо надырлан кондо.13 Левит-влакым Аарон ден тудын эргыж-влак ончыко шогалте да нуным Господьлан пӧлекле.14 Левит-влак Мыйын лийышт манын, нуным моло израиль эрге деч ойыро.
15 Левит-влакым эрныктымет да Господьлан пӧлеклымет деч вара нуно Юмо дене вашлийме омаш пелен пашам ыштен кертыт. Израиль эрге-влак кокла гыч нуно Мыланем пуымо улыт.16 Нуным Мый Шкаланем израиль эрге-влакын чыла кугэргышт, авагудын икымше саскашт, олмеш налам.17 Израиль калык коклаште икымше шочшо-влак Мыйын улыт – айдемат, вольыкат. Кунам Мый Египетын чыла кугэргыштым пуштынам, Мый тендан икымше шочшыда-влакым Шкаланем ойырен святитленам.18 А кызыт израиль эрге-влакын чыла кугэргышт олмеш Мый левит-шамычым налам.19 Левит-влакым моло израиль эрге деч ойырен, Мый нуным Аарон ден тудын эргыж-влаклан пуэм. Левит-влак моло израиль эрге олмеш Юмо дене вашлийме омаш пелен пашам ыштышаш да израиль калык дене эрныктыме йӱлам шуктышаш улыт. Тунам Израиль эрге-влак, святой вер деке лишеммеке, пытарыме огыт лий».
20 Моисей, Аарон да уло израиль калык левит-влак дене чылажымат Господьын Моисейлан кӱштымыж семынак ыштеныт.21 Левит-влак шкеныштым эрныктеныт, вургемыштым мушкыныт. Вара Аарон нуным Господьлан пӧлек семын пуэн да, арум ышташ манын, нунын дене касарыме йӱлам шуктен.22 Тидын деч вара левит-влак Юмо дене вашлийме омаш пелен шке сомылыштым шукташ пуреныт. Аарон ден эргыже-влак нунын пашаштым вуйлатен шогеныт. Нуно левит-влак шотышто чылажымат Господьын Моисейлан кӱштымыж семынак ыштеныт.
23 Господь Моисейлан каласен:24 «Теве левит-влак шотышто закон: Юмо дене вашлийме омаш пелен нуно коло вич ийым темымеке пашам ышташ тӱҥалшаш улыт.25 Витле ияш лиймеке, сомылыштым кодышаш улыт да тетла пашам ыштышаш огытыл.26 Нуно Юмо дене вашлийме омаш пелен шке иза-шольыштлан сомылым шукташ полшен кертыт, но тӱҥ пашам ыштышаш огытыл. Левит-влакын шуктен шогымо сомылышт шотышто тый теве тыгай кӱштымашым пуышаш улат».
Глава 8