Выбрать язык
Книги Ветхого Завета
Книги Нового Завета
с русским текстом1 Израильым суапландарымаш Господьлан келшымым ужын, Валаам ончычсо семын ырым*а палым кычалаш каен огыл, а ир мланде могырыш савырнен.2 Тушто Валаам тукымын-тукымын шке станыштым шогалтыше израиль калыкым ужын. Тунам Валаам ӱмбаке Юмын Шӱлыш волен,3 да тудо тыгай пророк шомакым увертарен:
«Валаам, Веор эрге, тыге ойла.
Ойла тудо, кӧн шинчаже почмо,
4 кӧ Юмын шомакшым колеш,
Чылакертше деч кончымашым ужеш,
кӧ камвозын, но шинчаже почмо.
5 Чапле улыт омашет-влак, Иаков,
тыйын илемет-влак, Израиль!
6 Ужаргыше лапвер да эҥер воктенысе сад-влак семын,
Господьын шындыме алой пушеҥге
да вӱд воктенысе кедр семын нуно шуйналтыт!
7 Нунын ведрашт гыч вӱд ташлен йогаш тӱҥалеш,
урлыкашыштлан вӱд эре ситышын лиеш!
Нунын кугыжашт Агаг деч кугурак лиеш,
кугыжанышышт пеш чаплана!
8 Юмо тиде калыкым Египет гыч луктын.
Вийже тудын – ир ӱшкыжын тӱкыж гай:
тушманле калык-влакым тудо нелеш,
луштым пудырта, пикшыж дене тушманым пытара.
9 Лев семын тудо возеш,
ава лев семын кия – кӧ тудым кынелташ тоштеш?
Тыйым суапландарыше суапландарыме лиеш,
тыйым каргыше каргыме лиеш!»
10 Тунам Валак Валаамлан сырен кудалтен, мушкындыжым чумыртен да каласен: «Мый тыйым тушман-влакем каргаш ӱжынам, а тый нуным теве кум гана суапландарет!11 Кай тышеч шке декет! Мый тылат сайын тӱлынем ыле, но Господь тыйым нимо деч посна кодыш».12 Валаам Валаклан каласен: «Мый декем колтымо еҥет-влаклан ойлен омыл мо –13 Валак мыланем пӧрт тич ший ден шӧртньыжым пӧлекла ыле гынат, мый Господьын кӱштымыж ваштареш нимат ыштен ом керт. Мый шке гыч осалымат, сайымат ыштен ом керт: мом Господь каласа – тудым гына ойлаш тӱҥалам.14 Кызыт мый шке калыкем деке пӧртылам. Но тиде калык тыйын калыкет дене ончыкшым мом ышта – мый тылат ойлен кодем».
15 Валаам тунам пророк шомакшым увертарен:
«Валаам, Веор эрге, тыге ойла.
Ойла тудо, кӧн шинчаже почмо,
16 кӧ Юмын шомакшым колеш,
кӧлан Чыла деч Кӱшылысӧ шинчымашым пуа,
кӧ Чылакертше деч кончымашым ужеш,
кӧ камвозын, но шинчаже почмо.
17 Ужам Тудым, но тиде кызыт огыл,
ончем Тудым, но тиде лишне огыл.
Иаков деч шӱдыр нӧлталтеш,
Израиль деч кугыжан тоя нӧлталтеш.
Тудо моав он-влакым шалата,
Сиф эрге-влакым пӱтынек пытара.
18 Едом лиеш руалтен налме,
Сеир лиеш тушман кид йымалне.
Израиль шке вийжым ончыкта,
19 Иаков деч лектеш вуйлатыше,
олаште илен кодшо-влакым тудо пытара».
20 Амалик-влакым ужмеке, Валаам тыгай пророк шомакым каласен: «Калык-влак кокла гыч Амалик икымше улеш, но мучашыже тудын – пытымаш!»
21 Вара Валаам кеней-влакым ужын да тыгай пророк шомакым увертарен:
«Илыме верет тыйын пеҥгыде,
пыжашет – кӱ курыкышто,
22 но Каин пытарыме лиеш –
Ассур тыйым вашке пленыш наҥгая!»
23 [Ог кугыжам ужмеке,] Валаам тыгай пророк шомакым каласен:
«Кунам Юмо тидым ышта, ойго, [ойго] толеш –
кӧ илыше кодеш?
24 Корабль-влак толыт киттей-влакын мландышт гыч,
Ассур ден Еверым темдаш тӱҥалыт,
но пытымаш вуча вара нунымат!»
25 Валаам кынелын да мӧҥгыжӧ каен, Валакат шке корныж дене ошкылын.
*а 24:1 Ырым – тыште: примета.
Глава 24