Выбрать язык
Книги Ветхого Завета
Книги Нового Завета
с русским текстом1 Рувим ден Гад тукымын вольыкышт пеш шуко лийын. Нуно ужыныт: Иазер мланде ден Галаад мланде вольыкым кӱташ сай улыт.2 Сандене Гад ден Рувим тукым эрге-влак Моисей, иерей Елеазар да калык он-влак деке толыныт да каласеныт:3-4 «Господьын Израиль калыклан сеҥен налме Атароф, Дивон, Иазер, Нимра, Есевон, Елеал, Севам, Нево да Веон вольыкым кӱташ сай мланде улыт. А тыйын тарзет-влакын кӱтӱшт уло.5 Ме тыйын поро кумылетым суленна гын, тиде мландым мыланна пу. Мемнам Иордан эҥер вес велке ит наҥгай».
6 Моисей Рувим ден Гад тукым эрге-влаклан вашештен: «Кузе тыге? Тендан иза-шольыда сарыш каят, а те тышан кодыда?7 Молан те Господьын пуымо мландышкыже эҥерым вончен каяш израиль калыкын кумылжым волтеда?8 Лач тыгак тендан ачада-влакат ыштеныт, кунам мый нуным Кадес-Варни гыч тиде мландым ончаш колтенам!9 Нуно Есхол лапвер марте миен шуыныт, тиде мландым ужыныт. А вара, израиль эрге-влак Господьын пуымо мландышкыже ынышт кай манын, нунын кумылыштым волтеныт.10 Тудо кечын Господьын шыдыже ылыжын, да Тудо товатлен каласен:11 ”Египет гыч лекше, [поро ден осалым ойырен моштышо] коло ияш деч кугурак ийготан-влак тиде мландым огыт уж, вет нуно Мыйым колыштын огытыл. Мый тиде мландым Авраамлан, Исааклан да Иаковлан пуаш товатлен сӧренам.12 Кенезей Иефоннийын Халев эргыж ден Навын Иисус эргыж деч моло нигӧ ты мландым огыт уж, вет нуно гына Господьым колыштыныт”.13 Тунам Господь израиль калыклан пеш чот шыдешкен да тудым ир мландыште нылле ий коштыктен – тудо жап марте, кунам Господь ончылно осал пашам ыштыше тиде тукым пӱтынек колен пытен.14 Теве ынде ача-кочада олмеш те, сулыкан-влакын шочшышт, кынелында да Израиль ӱмбак Господьын шыдыжым эшеат чот лукнеда!15 Те Господь деч кораҥыда гын, Тудо Израиль калыкым адакат ир мландеш кода. Тыге те уло калыкым пытареда!»
16 Нунышт Моисей деке лишемыныт да каласеныт: «Ме тыште шке шорык кӱтӱланна кудывечым, вате ден йочаланна ола-влакым чоҥена,17 а шкеже саргуралым кидыш налына да, моло израиль эрге-влакым мландышкышт намиен шуктымешке, нунын ончыч каена. А вате ден йочана-влак тек чоткыдемдыме олалаште кодыт, тыште нуно тысе калык деч лӱдде илаш тӱҥалыт.18 Израиль эрге-влак кажныже шке мландыжым налмешкышт, ме мӧҥгӧ огына пӧртыл.19 Мыланна мланде тыште, Иордан эрвел могырышто логалеш гын, эҥер вес велне ме мландым моло-влак дене пырля огына нал».
20 Тунам Моисей нунылан каласен: «Ойлымыда семынак, саргуралым кидыш налын, Господь ончылно сарыш каеда гын –21 те кажныже Господь ончылно Иорданым вончеда да, Господьын шке тушманже-влакым сеҥымешкыже, кредалаш тӱҥалыда –22 да Господь ончылно мланде сеҥен налме лиеш гын, те мӧҥгеш пӧртыл кертыда. Тунам те Господь ончылно да Израиль ончылно титакан огыда лий, да Господьын шинчаж ончылно тиде мланде тендан лиеш.23 Но тидым огыда ыште гын, те Господь ончылно сулыкыш пуреда. Пален лийза: шке сулыкланда те мутым кучаш тӱҥалыда!24 Чоҥыза тугеже шке вате ден шочшыланда ола-влакым, шорыкланда – кудывечым, но мом сӧрымыдам шуктыза».
25 Гад ден Рувим тукым эрге-влак Моисейлан каласеныт: «Ме, тыйын тарзет-влак, каласымет семынак ыштена.26 Мемнан шочшына ден ватына, мемнан кӱтӱна да чыла вольыкна тыште, Галаадысе олалаште, кодыт.27 А ме, тыйын тарзет-влак, кӱштымет семынак, саргуралым кидыш налын, Господь ончылно сарыш каена».
28 Тунам Моисей нунын шотышто иерей Елеазарлан, Нав эрге Иисуслан да израиль тукымвуй-влаклан кӱштымашым пуэн.29 Моисей нунылан каласен: «Гад тукым ден Рувим тукым эрге-влак тендан дене пырля Иорданым вончат гын, чыланат саргурал дене Господь ончылно сарыш каят да тендан ончылно мланде сеҥен налме лиеш гын, тунам нунылан Галаад мландым пуыза.30 А тендан дене пырля, саргуралым налын, [Господь ончылно сарыш] огыт кай гын, нуно тендан дене пырля мланде ужашым Ханаан мландыште налыт. [Тыге лиеш гын, Ханаан мландыш шкендан деч ончыч нунын погыштым, ватыштым да вольыкыштым колтыза]».
31 «Ме тыйын тарзет улына. Кузе Господь каласен, ме тугак ыштена, – маныныт Гад ден Рувим тукым эрге-влак. –32 Саргуралым налын, ме Господь ончылно Ханаан мландыш каена, а мланде ужашна тек Иорданын ты велныже лиеш».
33 Моисей нунылан, Гад тукым ден Рувим тукым эрге-влаклан да Иосиф эрге Манассийын пел тукымжылан, аморрей кугыжа Сигонын да Васан кугыжа Огын кугыжанышыштым, нине кундемыш пурышо чыла ола ден мландым пуэн.34 Гад эрге-влак тыгай ола-влакым чоҥеныт: тиде – Дивон, Атароф, Ароер,35 Атароф-Шофан, Иазер, Иогбега,36 Беф-Нимра да Беф-Гаран. Тиде чоткыдемдыме ола-влак лийыныт. Нуно тыгак шорык кудывече-влакым чоҥеныт.37 Рувим эрге-влак гын угыч Есевон, Елеал, Кириафаим,38 Нево, Ваал-Меон ола-влакым чоҥеныт, нунын лӱмышт ондак весе улмаш. Тыгак Сивма олам чоҥеныт. Угыч чоҥымо ола-влаклан нуно тыгай лӱмым пуэныт.
39 Манассийын Махир эргыжын тукымысо еҥ-влак Галаадыш каеныт да тиде кундемым руалтен налыныт, тушто илыше аморрей-влакым поктен колтеныт.40 Моисей Галаадым Манассий эрге Махир тукымлан пуэн, нуно тушто илаш тӱҥалыныт.41 Манассий эрге Иаир тыште икмыняр ялым сеҥен налын да нуным «Иаир ял-влак» манын лӱмден.42 Новах гын Кенафым да тудын йыр улшо илем-влакым сеҥен налын, тудым шке лӱмжӧ дене лӱмден – Новах.
Глава 32