Выбрать язык
Книги Ветхого Завета
Книги Нового Завета
с русским текстом1 Моисей ден Ааронын израиль калыкым Египет гыч тӱшка дене лукмышт годым теве нунын шогалме верлашт.2 Господьын кӱштымыж почеш Моисей чыла шогалме верым возен коден. Теве могай верлаште нуно шогалыныт.
3 Раамсес гыч израиль калык икымше тылзын латвизымше кечынже тарванен каен. Кугече эрлашыжын тудо пӱтынь Египет шинча ончылно Господьын виян кидше йымалне лектын.4 Египтян-влак тиде жапыште чыла кугэргыштым тоеныт. Нуныжым Господь пуштын – тыге Тудо египет юмо-влаклан судым ыштен.
5 Израиль эрге-влак Раамсес гыч каеныт да стан дене Сокхофеш шогалыныт.6 Сокхоф гыч нуно каеныт да ир мланде тӱрыштӧ улшо Ефамеш шогалыныт.7 Ефам гыч Ваал-Цефон воктенысе Пи-Гахироф могырыш савырненыт да Мигдол воктелан шогалыныт.8 Гахироф гыч кайымеке, нуно ир мландыш теҥыз гоч ошкыл эртеныт. Вара кум кече Ефам ир мланде дене каеныт да Мерра воктелан шогалыныт.9 Мерра гыч каеныт да Елимыш толыныт. Туштыжо латкок памаш да шымле финик пушеҥге лийын, да тушан шогалыныт.10 Елим гыч нуно каеныт да Йошкар теҥыз*а воктелан шогалыныт.11 Йошкар теҥыз деч каеныт да Син ир мландеш шогалыныт.12 Син ир мланде гыч каеныт да Дофкаш шогалыныт.13 Дофка гыч каеныт да Алушеш шогалыныт.14 Алуш гыч каеныт да Рефидимеш шогалыныт. Тушто калыклан йӱаш вӱд лийын огыл.15 Рефидим гыч каеныт да Синай ир мландеш шогалыныт.16 Синай ир мланде гыч каеныт да Киброт-Гаттааваш шогалыныт.17 Киброт-Гаттаава гыч каеныт да Асирофеш шогалыныт.18 Асироф гыч каеныт да Рифмаш шогалыныт.19 Рифма гыч каеныт да Римнон-Фарецеш шогалыныт.20 Римнон-Фарец гыч каеныт да Ливнаш шогалыныт.21 Ливна гыч каеныт да Риссаш шогалыныт.22 Рисса гыч каеныт да Кегелафаш шогалыныт.23 Кегелафа гыч каеныт да Шафер курык воктелан шогалыныт.24 Шафер курык деч каеныт да Харадаш шогалыныт.25 Харада гыч каеныт да Макелофеш шогалыныт.26 Макелоф гыч каеныт да Тахафеш шогалыныт.27 Тахаф гыч каеныт да Тарахеш шогалыныт.28 Тарах гыч каеныт да Мифкаш шогалыныт.29 Мифка гыч каеныт да Хашмонеш шогалыныт.30 Хашмон гыч каеныт да Мосерофеш шогалыныт.31 Мосероф гыч каеныт да Бене-Яаканеш шогалыныт.32 Бене-Яакан гыч каеныт да Хор-Агидгадеш шогалыныт.33 Хор-Агидгад гыч каеныт да Иотвафаш шогалыныт.34 Иотвафа гыч каеныт да Авронаш шогалыныт.35 Аврона гыч каеныт да Ецион-Гавереш шогалыныт.36 Ецион-Гавер гыч каеныт да Син ир мландеш шогалыныт. Вара [Син ир мланде гыч кайымеке, Фаран ир мландысе] Кадесеш шогалыныт.37 Кадес гыч каеныт да Едом мланде чек воктене улшо Ор курык воктелан шогалыныт.
38 Господьын кӱштымыж почеш иерей Аарон Ор курыкыш кӱзен да тушан колен. Тиде Израиль калыкын Египет гыч кайымекше ныллымше ийын визымше тылзын икымше кечынже лийын.39 Ор курыкеш колымыж годым Аарон шӱдӧ коло кум ияш лийын.
40 Арадын кугыжаже, хананей – тудо Ханаан мландын кечывалвелныже илен – тунам израиль эрге-влакын толмышт нерген колын.41 Нунышт Ор курык деч каеныт да Салмонаш шогалыныт.42 Салмона гыч каеныт да Пунонеш шогалыныт.43 Пунон гыч каеныт да Овофеш шогалыныт.44 Овоф гыч каеныт да Моав мланде чек воктенысе Ийе-Аваримеш шогалыныт.45 Ийе гыч каеныт да Дивон-Гадеш шогалыныт.46 Дивон-Гад гыч каеныт да Алмон-Дивлафаимеш шогалыныт.47 Алмон-Дивлафаим гыч каеныт да Нево ваштареш улшо Аварим курыклаш шогалыныт.48 Аварим курыкла гыч каеныт да Иордан воктенысе Моав тӧрверыште, Иерихон ваштареш, шогалыныт.49 Моав тӧрверыште нуно Иордан эҥер кутынь шогалыныт, станышт Беф-Иешимоф гыч Аве-Ситтим марте шуйнен.
50 Тушто, Иордан воктенысе Моав тӧрверыште, Иерихон ваштареш, Господь Моисейлан каласен:51 «Израиль эрге-влаклан ойло: кунам Иордан эҥерым вончеда да Ханаан мландыш пуреда,52 тушто илыше-влакым чылаштым шке ончычда поктен колтыза, пӱчкеден але велен ыштыме чыла шояк юмыштым пытарыза, кӱкшакасе кумалме верлаштым шалатыза.53 Тиде мландым поген налза да тушто илаш тӱҥалза, вет тиде мландым Мый тыланда пуэм.54 Мландым шерева дене тукым-влак коклаште пайлыза. Шуко еҥан тукымлан кугурак мланде ужашым, шагалрак еҥанлан изиракым пуыза. Кӧлан кушто мланде логалеш, тидым шерева ончыкта. Тек кажне тукым шке мланде ужашыжым налеш.55 Тиде мландыште илыше-влакым поктен огыда колто гын, нунын кокла гыч кодшо-влак шинчаштыда пелчан име семын, могырыштыда шуанвондо шу семын лийыт да илаш тӱҥалме мландыштыда тендам шыгыремдылаш тӱҥалыт.56 Тунам нунын дене мом ышташ шонымем Мый тендан дене ыштем».
*а 33:10 Йошкар теҥыз – але «Омыж теҥыз».
Глава 33