Выбрать язык
Книги Ветхого Завета
Книги Нового Завета
с русским текстом1 Пӧръеҥ, кӧн муныжо лаштыртыме але тарманже пӱчкын шуымо, Господьын калыкше лийын ок керт.
2 Нигӧ, яжарланымаш деч шочшо, Господьын калыкше лийын ок керт. Тудын шочшыж-влак кокла гыч нигӧ, эсогыл луымшо тукымышто, Господьын калыкше лийын ок керт.
3 Аммон але моав калык гыч нигӧ Господьын калыкше деке ушнен ок керт. Нунын эсогыл луымшо тукымышт Господьын калыкше деке ушнен огыт керт.4 Вет нуно Египет гыч толмыда годым тыланда кинде ден вӱдым пуэн огытыл. Тендам каргаш манын, нуно Месопотамийысе Пефор гыч Веор эрге Валаамым тарленыт.5 Но Господь Юмет тыйым йӧрата, сандене Тудо Валаамым колышташат тӱҥалын огыл да тудын каргымыжым суапландарымашке савырен.6 Ӱмырет мучко, нунылан тыныс ден суапым кондаш манын, нимом ит ыште.
7 Идумей ӱмбаке шӧрын ит ончо: тудо тыйын иза-шольыч лиеш. Египтян ӱмбаке шӧрын ит ончо: тудын мландыштыже тый йотъеҥ семын иленат.8 Нунын йочашт кумшо тукымышто Господьын калыкше лийын кертыт.
9 Кунам тушман дене кредалаш кает, шкендым чыла ару огыл деч переге.10 Иктаж-кӧ йӱдым нӧшмыжӧ йоген кайымылан кӧра ару огыл лиеш гын, тек стан гыч ӧрдыжкӧ лектеш да тушан кодеш.11 Кас шумеке, тудо вӱд дене мушкылтшаш. Кече шичмеке, тудо станыш пӧртыл кертеш.
12 Стан деч ӧрдыжтӧ тӱгӧ кошташлан тек посна верда лиеш.13 Тек кажныже пеленже изи кольмо гайым коштыкта. Стан деч ӧрдыжтӧ шинчын, те тудын дене лакым кӱнчышаш да лекше лавырадам урен кодышаш улыда.14 Вет тендам арален шогаш да тушман-влакым тендан кидыш пуаш манын, Господь Юмыда стан кӧргыштыда коштеш. Тудо тендан дене нимом йӧрдымым ынже уж да тендан деч ынже кораҥ манын, станда святой лийшаш.
15 Тендан деке шке озаж деч кул куржын толеш гын, тудым озажлан ида пӧртылтӧ.16 Тек тиде кул тендан коклаште иктаж олаштыда ила, кудым шке ойырен налеш, кушто тудлан келша. Тудым ида шыгыремдыл.
17 Израиль калыкын ӱдыржӧ-влак кокла гыч нигӧ кумалме вер пелен яжарланышаш огыл, израиль эрге-влак коклаштат яжарланыше тыгай пӧръеҥ ынже лий.*а18 Яжарланыше ӱдырамашын але пӧръеҥын ыштен налме оксаштым, иктаж-могай сӧрымашым шукташ манын, Господь Юметын пӧртышкыжӧ ит пурто. Нуно коктынат Господь Юметлан йырнык улыт.
19 Ашламым налаш шонен, шке израиль иза-шольычлан шийымат, киндымат але иктаж-мом весым – мом кӱсын пуэн, ашламым налаш лиеш – ит пу.20 Вес калык еҥ деч ашламым налын кертат, но шке израиль иза-шольыч деч ит нал. Тунам Господь, тыйын Юмет, сеҥен налаш кайыме мландыштет тыйым чыла пашаштет суапландара.
21 Кунам Господьлан, шке Юметлан, сӧрымашым пуэт, сӧрыметым шукташ вашке. Уке гын Господь Юмет тый дечет пеҥгыдын йодеш, да тыйын ӱмбакет титак возеш.22 А сӧрымашым от пу гын, тыйын ӱмбалнет титак ок лий.23 Мом каласенат, тидым шуктышаш улат, вет Господь Юметлан сӧрымашым тый шке кумылын, шке умшат дене пуэнат.
24 Кунам лишылъеҥетын виноград аҥашкыже пурет – виноградым теммешкет, кунар шонет, тунар кочкын кертат, но комдышкет ит пого.25 Кунам тый еҥын шурнывечышкыже толат, шурно парчам кидет дене кӱрлын налын кертат, но сорла дене ит тӱред.
*а 23:17 Ханаан калык-влакын йӱлашт почеш, шуко шочшан, кинде ден вольык перкеан лияш манын, нунын кумалме верышт пелен яжар ӱдырамаш ден пӧръеҥ-влак лийыныт.
Глава 23