Выбрать язык
Книги Ветхого Завета
Книги Нового Завета
с русским текстом1 Иктаж пӧръеҥ ӱдырым марлан налеш да тудын дене илаш тӱҥалеш, а вара, ватыжын иктаж-могай уто-ситыжым ужмеке, тудлан ватыже келшымым чарна гын, тек тудо ойырлымо нерген кагазым воза, кидышкыже кучыкта да пӧртшӧ гыч луктын колта.2 Тудын пӧртшӧ гыч кайымеке, тиде ӱдырамаш вес еҥын ватыже лиеш,3 вара вес марийжыланат келшымым чарна гын, да тудыжо ватыжлан ойырлымо нерген кагазым воза, кидышкыже кучыкта да пӧртшӧ гыч луктын колта, але тиде марийже кола гын,4 тунам тудын дене ойырлышо икымше марийже ты ӱдырамашым угыч марлан налын ок керт, вет тудо ынде икымше марийжылан ару огыл. Господь Юмыда ончылно тиде йырнык лиеш. Господь Юмыдан тыланда пуымо мландыжым тыгай сулык дене ида шакшыле.
5 Кӧ шукерте огыл ӱдырым марлан налын, тыгай еҥым сарыш колтыман огыл, моло вес пашашкат наҥгайыман огыл: тек тудо ик ий мӧҥгыштыжӧ ила да ватыжым куандара.
6 Нигӧ залог шотеш кидвакшын кӱжӧ-влакым, эсогыл кӱшылжым, налшаш огыл, вет тиде – айдеме чоным залог шотеш налме дене иктак.
7 Иктаж-кӧ шке иза-шольыжым, вес израиль еҥым, шолыштын, кул шотеш кучен да ужален гын, тыгай шолыштшо еҥым пуштман. Пытарыза шкендан кокла гыч осалым!
8 Проказе чер дене черланыме годым чыла [законым] левит иерей-влакын туныктен ойлымышт семынак шуктен шогыза. Мом мый нунылан кӱштенам, чыла шуктен шогыза.9 Мом Господь Юмыда Египет гыч кайымыда годым Мариам дене ыштен, тидым шарныза.
10 Лишылъеҥетлан иктаж-мом арымеш пуэт гын, залогым налаш пӧртышкыжӧ ит пуро.11 Шого омсаж воктене – тек арымеш налше еҥ тыланет залогым шке луктын пуа.12 Тудо йорло гын, залогым йӱдлан шке денет ит кодо,13 кече шичмешке озажлан пӧртылтӧ. Тунам тудо шке вургемже дене леведалт возын кертеш да тыйым суапландара. Тыге тый Господь Юмет ончылно чын ыштыше лият.
14 Пашаш тарлыме йорло, незер еҥым – тудо кеч шке израиль иза-шольыч але тыйын мландысе иктаж-кудо олаште илыше йот калык еҥ лийже – ит шыгыремдыл.15 Кажне кечын, кече шичме деч ончыч, пашадаржым тӱлӧ, вет тудо нужна да тиде оксалан ӱшана. Уке гын, тудо тыйын ӱмбакет Господьлан вуйым шиеш, тунам тыйын ӱмбалнет сулык лиеш.
16 Йоча-влакын титакыштлан ачаштым пушташ огеш лий. Йоча-влакат ачашт верч пуштмо лийшаш огытыл. Кеч-кӧат шке ыштыме сулыкшылан гына пуштмо лийшаш.
17 Йот калык еҥын, тулык йочан [да тулык ватын] пашаштым чын огыл ит судитле. Тулык вате деч залог шотеш вургемжым ит нал.18 Шарне: тый шкежат Египетыште кул лийынат, тыйым тушечын Господь Юмет утарен луктын, садлан мый тылат тыге ышташ кӱштем.
19 Шке пасуштет шурным тӱредме годым кылтам монден кодет гын, тудым налаш ит пӧртыл – тек тудо йот калык еҥлан, [йорлылан,] тулык йоча ден тулык ватылан кодеш. Тунам Господь Юмет тыйым кидет дене ыштыме чыла пашаштет суапландара.
20 Кунам олив пушеҥгет гыч саскам рӱзен йоктарет, укшлаште мо кодшым ит кычал – тек тудо йот калык еҥлан, тулык йоча ден тулык ватылан кодеш. [Шарне: тый шкежат Египетыште кул лийынат, садлан мый тылат тыге ышташ кӱштем.]21 Кунам виноград аҥаштет виноградым погет, погыде кодшо саскам ит кычал – тек тудо йот калык еҥлан, тулык йоча ден тулык ватылан кодеш.22 Шарне: тый шкежат Египет мландыште кул лийынат, садлан мый тылат тыге ышташ кӱштем.
Глава 24