Выбрать язык
Книги Ветхого Завета
Книги Нового Завета
с русским текстом1 Израиль эрге-влак Господьын шинча ончылныжо осал пашам угыч ышташ тӱҥалыныт. Господь нуным нылле ийлан филистим-влакын кидышкышт пуэн.
2 Тудо жапыште Цораште Дан тукым гыч Маной лӱман ик еҥ илен. Тудын ватыже йочам ыштен кертдыме улмаш, сандене нунын икшывышт лийын огыл.3 Манойын ватыжлан Господьын Суксыжо кончен. Тудо каласен: «Тый йочам ыштен кертдыме улат, тыйын икшывет уке. Но тый мӱшкыран лият да эрге азам ыштет.4 Шеклане, йошкар аракам да моло руштыктарышым ит йӱ, тыгак нимогай ару огыл кочкышым ит коч.*а5 Теве тый мӱшкыраҥат да эргым ыштет. Тудын ӱпшӧ нигунам тӱредме лийшаш огыл: тиде йоча шочынак Юмын назорейже*б лиеш. Тудо Израильым филистим-влакын кидышт деч утараш тӱҥалеш».6 Ӱдырамаш марийже деке каен да каласен: «Мый декем Юмын еҥже толын. Тудо Юмын Суксыж гай койо, сынже лӱдмашым лукто. Мый тудын кушеч улмыжым шым йод, тудат мылам шке лӱмжым ыш ойло.7 Но тудо мылам теве мом каласыш: ”Тый мӱшкыран лият да эрге азам ыштет. Йошкар аракам да моло руштыктарышым ит йӱ, тыгак нимогай ару огыл кочкышым ит коч, вет тиде йоча шочмыж гыч колымо кечыже марте Юмын назорейже лиеш”».
8 Маной Господьлан тыге кумалын ойлен: «Господь! Тек саде Юмын еҥет, кудым Тый колтенат, мемнан дек угыч толеш да шочшаш йоча дене мыланна мом ышташ кӱлмым каласа».9 Юмо Манойым колын, да Юмын Суксыжо ӱдырамаш деке угыч толын. Тудыжо тунам пасушто улмаш, Маной марийже воктеныже лийын огыл.10 Ӱдырамаш тунамак марийже дек куржын да тудлан каласен: «Тунам толшо еҥет мый декем угыч толын!»11 Маной тунамак кынелын да ватыж почеш каен, саде еҥ деке толын да йодын: «Мыйын ватем дене кутырышо еҥ тый улат мо?» [Суксо] вашештен: «Мый улам».12 Маной каласен: «Кунам тыйын каласымет шукталтеш, тиде эрге дене кузе лийман, мыланна мом ыштыман?»13 Господьын Суксыжо Манойлан вашештен: «Мом мый каласенам, ватет чылажымат шуктен шогыжо.14 Виноград вондышто мо шочмым нимом ынже коч, йошкар аракам да моло руштыктарышым ынже йӱ, тыгак нимом ару огылым ынже коч. Тек тудо мыйын чыла кӱштымем шукта».
15 Маной Господьын Суксыжлан каласен: «Поро лий, тылат казапача гыч кочкышым ямдылымешке, мемнан дене код».16 Господьын Суксыжо тудлан вашештен: «Мый тый денет кодам гынат, кочкышетым ом коч. Но казапачам тый Господьлан йӱлалтен пуымо надыр шотеш конден кертат». Тиде Господьын Суксыжо улмым Маной пален огыл.17 Тудо йодын: «Кузе тыйын лӱмет? Кунам каласымет шукталтеш, ме тыйым чапландарена ыле».18 Господьын Суксыжо тудлан вашештен: «Молан тый лӱмем йодат? Тудо кӱдыратле».
19 Маной казапача ден кинде надырым налын да Господьлан кӱ ӱмбалан надыр шотеш конден. Маной ден ватыжын шинча ончылнышт Господь ӧрыктарыше пашам ыштен.20 Кунам жертвенник гыч тулйылме кӱшкӧ нӧлталташ тӱҥалын, Господьын Суксыжо тудын дене пырля нӧлталтын. Тидым ужмеке, Маной ден ватыже мланде ӱмбак кумык возыныт.21 Господьын Суксыжо Маной ден ватыжлан кончымыжым чарнен, да тиде Господьын Суксыжо лиймым Маной умылен.22 Тудо шке ватыжлан каласен: «Очыни, ме колена, вет ме Юмым ужынна».23 Ватыже тудлан вашештен: «Господь мемнам пушташ шона ыле гын, кидна гыч йӱлалтен пуымо надыр ден кинде надырым ок нал ыле. Тудо мыланна чыла тидым ок ончыкто да нимомат ок поч ыле».
24 Манойын ватыже эргым ыштен, тудлан Самсон лӱмым пуэн. Йоча кушкын, Господь тудым суапландарен шоген.25 Кунам Самсон Дан тукым станыште, Цора ден Ештаол коклаште лийын, тудым Господьын Шӱлышыжӧ виктараш тӱҥалын.
*а 13:4 Ару огыл кочкыш – Ончо, мутлан, Лев 11 гл.
*а 13:5 Назорей – Ончо: Шотл 6:1-21.
Глава 13