Выбрать язык
Книги Ветхого Завета
Книги Нового Завета
с русским текстом1 Самуил елей атым налын да Саулын вуйышкыжо йоктарен, тудым шупшалын да каласен: «Господь тыйым шке [Израиль] калыкшын вуйлатышыжлан шӱрен палемда. [Тый Господьын калыкше дене кугыжаланаш тӱҥалат да тудым йыр илыше тушманже-влак деч утарет. Господьын тыйым шке калыкшын кугыжажлан шӱрымыжым палашет теве тылат палдарыше пале:]2 таче, мый дечем кайымекет, Вениамин тукымын мландыштыже, Целцахыште, Рахильын шӱгарже лишне, тый кок еҥым вашлият. Нуныжо тылат каласат: ”Кычал коштмо ава осёлет-влакым мумо, но теве ачат, осёл-влак нерген монден, тендан верч тургыжлана. Тудо ’эргым муаш мом ыштыман?’ манын йодеш”.3 Тушечын умбакыла кает да Фавор тумо деке шуат. Тушто тыйым Вефильыш Юмо деке кайыше кум еҥ вашлиеш: иктыже кум казапачам нумал кая, весыже – кум киндым, а кумшо – виноград арака дене темыме шувышым.4 Нуно тый денет саламлалтыт да тыланет кок киндым пуат, тый тидым кидышт гыч налат.5 Тидын деч вара Юмын кӱкшакаш миет. Тушто филистим-влакын орол отрядышт, [филистим вуйлатыше-влак улыт]. Олаш пурымекет, кӱкшакасе святой вер гыч волышо пророк-влак тӱшкам вашлият, а ончылнышт арфе ден тимпаным, шиялтыш ден кӱслем шоктен каят. Нуно пророклен ойлаш тӱҥалыт.6 Ӱмбакет Господьын Шӱлышыжӧ вола, да тый нунын дене пырля пророклен ойлаш тӱҥалат – чылт вес еҥыш савырнет.7 Кунам тиде палдарыше пале-влак тый денет шукталтыт, мом кӱлешлан шотлет, тудым ыште – Юмо пеленет лиеш.8 Тый Галгалыш мый дечем ончыч кай. Тушко йӱлалтен пуымо надыр ден татулык*а надырым пуаш мыят мием. Мыйым шым кече вучо. Мийымекем, тылат мом ышташ кӱлмым каласем».
9 Самуил деч каяш манын, Саул савырнен веле шуктен, Юмо тудын шӱмжым вашталтен, да чыла тиде палдарыше пале тудо кечынак шукталтын.10 Кӱкшака дек толын шумеке, нуно пророк-влак тӱшкам вашлийыныт. Саул ӱмбак Юмын Шӱлыш волен, тудат молын коклаште пророклен кутырен.11 Саулым ондакат палыше-влак, тудын пророк-шамыч дене пырля пророклен ойлымыжым ужмеке, икте-весыштлан ойленыт: «Кисын эргыж дене мо лийын? Саулат пророк лийын мо?»12 Тушто илыше ик еҥ каласен: «А молыштын ачашт кӧ?» Тыге «Саулат пророк лийын мо?» манме ой калыкмутыш савырнен.
13 Пророклен ойлымыжым чарнымеке, Саул кӱкшакасе святой верыш кӱзен.14 Саулын чузайже тудын деч да тарзыж деч йодын: «Кушто лийында?» Саул каласен: «Ава осёл-влакым кычална, но нуным ышна муат, Самуил деке пурышна».15 Чузайже йодын: «Каласе, мом тыланда Самуил ойлен?»16 Саул вашештен: «Тудо мыланна осёл-влакым мумо нерген увертарыш». А кугыжаланаш тӱҥалмыж шотышто Самуилын мом ойлымыжым каласен огыл.
17 Самуил калыкым Господь ончыко Мицпаште поген18 да израиль эрге-влаклан каласен: «Господь, Израильын Юмыжо, тыге ойла: ”Мый Израильым Египет гыч луктынам, тендам египтян-влакын кидышт да шыгыремдыше чыла кугыжаныш деч утаренам.19 А таче те чыла туткар ден орлык деч утарыше шке Юмыдам ӧрдыжкӧ шӱкалында, Тудлан каласенда: ”Мыланна кугыжам шогалте”. Тыгеракын, Господь ончыко шке тукым да урлыкда дене лектын шогалза».
20 Самуил чыла израиль тукымлан лишемаш кӱштен, нунын кокла гыч Вениамин тукым ончыктымо лийын.21 Тунам тудо Вениамин тукымлан урлыкышт дене лишемаш кӱштен, нунын кокла гыч Матрий урлык ончыктымо лийын. Матрий урлык пӧръеҥ-влакым конден шогалтымеке, нунын коклаште Саул, Кис эрге, ончыктымо лийын. Тудым кычалыныт, но муын огытыл.22 Тунам Господь деч йодыныт: «Тиде айдеме тышке толеш мо?» Господь каласен: «Тудо арвер коклашке шылын».23 Нуно тушко куржын миеныт да тудым конденыт. Калык коклаш шогалмекше, Саулын моло еҥ деч ик вуйлан кӱкшырак улмыжым чылан ужыныт.24 Самуил калыклан каласен: «Ужыда мо, кӧм Господь ойырен налын? Пӱтынь калык коклаште тудын гае уке». Тунам уло калык кычкырал колтен: «Эсен лийже кугыжа!»
25 Самуил калыклан кугыжан чыла кертыжшым каласкален пуэн, тидым книгаш возен да Господь ончыко пыштен. Вара уло калыкым мӧҥгышкышт колтен.26 Саулат шке мӧҥгыжӧ, Гивашке, каен. Тудын дене пырля виян сарзе-влак тарваненыт, вет нунылан каяш кумылым Юмо пуэн.27 А южо йӧрдымӧ еҥже ойлен: «Тудлан мо мемнам утараш?» Нуно Саулым шотлен огытыл, тудлан пӧлек-влакым конден огытыл. Но Саул тидлан нимом каласен огыл.
*а 10:8 Татулык – мир, согласие.
Глава 10