Выбрать язык
Книги Ветхого Завета
Книги Нового Завета
с русским текстом1 [Ик тылзе наре эртымеке,] аммон калык гыч улшо Наас толын да Галаадысе Иавис олам йыр авырен налын. Иависыште илыше-влак Нааслан каласеныт: «Мемнан дене ушемым ыште, тунам ме тыйын кид йымакет вончена».2 Аммон Наас нунылан вашештен: «Мый тендан дене ушемым ыштем, но тидын деч ончыч кажнын пурла шинчажым шӱтем да тыге уло Израильым намысыш пуртем».3 Иависын кугурак еҥже-влак каласеныт: «Мыланна шым кечым пу. Ме Израиль мучко уверзе-влакым колтена. Мыланна нигӧат ок полшо гын, ме тыйын кид йымакет вончена».
4 Уверзе-влак Саулын илыме Гива олашке толыныт да нине мутлам калык ончылно каласен пуэныт. Уло калык йӱкын шорташ тӱҥалын.5 Лач тиде жапыште Саул шке ӱшкыжшӧ-влак дене пасу гыч толеш улмаш. Тудо йодын: «Калык дене мо лийын? Молан тудо шортеш?» Тудлан Иависыште илыше-влакын мутыштым каласкален пуэныт.6 Тидым колмеке, Саул ӱмбаке Юмын Шӱлыш волен, да тудым кугу шыде авалтен.7 Тудо кок ӱшкыжым налын, ужашлен руэн да уверзе-влак дене Израильын чыла кундемышкыже тыге каласен колтен: «Кӧ Саул ден Самуил почеш ок кай гын, тудын ӱшкыжшӧ-влак дене тыге ыштат». Калыкым Господь деч лӱдмаш авалтен, да чыланат ик еҥ семын тарваненыт.8 Саул нуным Везекыште поген да шотлен лектын: Израильын эргыже-влак кумшӱдӧ тӱжем да Иудан пӧръеҥже-шамыч кумло тӱжем лийыныт.9 Толшо уверзе-влаклан каласеныт: «Галаадысе Иависыште илыше-влаклан ойлыза: эрла, кече ырыкташ тӱҥалмеке, тыланда полыш толеш». Уверзе-влак пӧртылыныт да тидым Иависыште илыше-шамычлан увертареныт. Нунышт пеш чот куаненыт.10 Иависыште илыше-влак [Нааслан] каласеныт: «Эрла тендан кид йымалныда лийына: мемнан дене мом шонеда, тудым ыштыза».
11 Вес кечын Саул калыкым кум отрядлан шелын. Нуно волгыжаш тӱҥалме деч ончыч стан покшеке керылт пуреныт да кечывал шумешке аммон-влакым кырен шалатеныт. Утлен кодшышт иктын-иктын куржын пытеныт.
12 Тунам калык Самуиллан каласен: «Кӧ ойлен: ”Сауллан мо мемнан кугыжана лияш?” Кондыза нине еҥ-влакым, ме нуным пуштына».13 Но Саул каласен: «Таче Господь Израильым утарен, сандене тиде кечын нигӧмат пушташ ок кӱл».14 Самуил калыклан каласен: «Айста Галгалыш каена да кугыжа вуйлаташ тӱҥалмым пеҥгыдемдена».15 Уло калык Галгалыш каен. Тушто Господь ончылно Саулым кугыжалан шогалтеныт да Господь ончылно татулык надырым конденыт. Саул да чыла израильтян-влак тушто куанен пайремленыт.
Глава 11