Выбрать язык
Книги Ветхого Завета
Книги Нового Завета
с русским текстом1 Давид иерей Ахимелех деке Новыш толын. Давидым ужмеке, тудо лӱдын колтен да йодын: «Молан тый шкетын улат? Молан тый денет пырля нигӧ уке?»2 Давид иерей Ахимелехлан манын: «Кугыжа мыланем ик пашам ӱшанен пуэн да каласен: ”Молан тыйым колтенам да мом тыланет ӱшаненам, нигӧ ынже пале”. Сандене шке еҥем-влакым мый кутырен келшыме вереш коденам.3 Мо тыйын уло? Пу мылам вич киндым але иктаж-мом весым».4 Иерей Давидлан вашештен: «Мыйын тыглай кинде уке, святой кинде веле уло. Еҥет-влак ӱдырамаш деке тӱкнен огытыл гын, [тек кочкыт]».5 Давид иерейлан вашештен: «Ӱдырамаш-влак теҥгечат, ончыгечат, корныш лекме жап гычак мемнан дене лийын огытыл. Ме тыглай паша дене каена гынат, еҥем-влак эре ару улыт. А кызыт гын нуно, мутат уке, ару лийшаш улыт».6 Иерей Давидлан святой киндым пуэн, вет тудын Господь чурий ончыч налме надыр кинде деч моло киндыже лийын огыл. Тудын олмеш ӱстембаке у надыр киндым пыштеныт.7 Тудо кечын тушто Господь ончылно Саулын Доик лӱман ик идумей тарзыже лийын. Тудо Саулын кӱтӱчыжӧ-влакын вуйлатышышт улмаш.
8 Давид Ахимелех деч йодын: «Тыйын тыште умдет але кердет уло мо? Кугыжан ӱшанен пуымо пашажым шукташ вашкымем годым пеленем кердымат, вес саргуралымат налын омыл».9 Иерей каласен: «Теве филистим Голиафын кердыже, тудыжым тый Тумо лапверыште пуштынат. Кердым вургем дене вӱдылмӧ, тудо ефод шеҥгелне. Кӱлеш гын, нал тудым. Тидын деч моло саргурал тыште уке». Давид каласен: «Тидын деч сайракше укеат. Пу мылам тудым». [Авимелех тудлан кердым пуэн.]
10 Давид тудо кечынак тушеч Саул деч шылын куржын да Гефын Анхус кугыжаже деке толын.11 Анхуслан тарзыже-влак каласеныт: «Тиде Давид огыл мо, саде элын кугыжаже? Тудлан огыл мо мурен-куштымышт годым ойленыт: ”Саул тӱжемым пытарен, а Давид – лу тӱжемым?”»12 Нунын тыге ойлымыштым колмеке, Давид Анхус деч, Гефын кугыжаж деч, чот лӱдын.13 Нунын ончылно ушдымо еҥла койын, тудо капка омсалам удырен-коркален, [нылйола коштын да] пондашыже мучко шӱвылым йоктарен.14 Анхус шке тарзыж-влаклан каласен: «Ужыда, тиде еҥ ушдымо. Молан тудым мый декем вӱден конденда?15 Мый денем ушдымо-шамыч шагалын улыт мо? Ончылнем окмакланыже манын, молан эше тидымат вӱден конденда? Мый тудым пӧртышкем пуртышаш улам мо?»
Глава 21