Выбрать язык
Книги Ветхого Завета
Книги Нового Завета
с русским текстом1 Зифей-влак [кечывалвелым] Гивашке Саул деке толыныт да каласеныт: «Давид Гахил чоҥгаште, Иесимон воктене, шылын ила».2 Саул тарванен да Зиф ир мландыш волен. Давидым тушто кычалаш манын, Саул дене пырля Израильын кум тӱжем виян сарзыже лийын.3 Саул Иесимон лишне улшо Гахил чоҥгаште корно воктене стан дене шогалын. Давид тунам ир мландыште лийын да Саулын тудын почеш толмыжым ужын.4 Давид шолып ончышо-влакым колтен да Саулын [Кеила гыч] чынжымак толмыж нерген пален налын.5 Тунам Давид Саулын стан дене шогалме верже деке [шолып] каен. Тудо Саулын да тудын сарзывуйжо Авенирын, Нир эргын, малыме верыштым ужын. Саул стан покшелне мален, а йырже сарзыже-влак верланеныт улмаш.
6 Давид хеттей Ахимелех ден Авесса деч йодын: «Кӧ мый денем Саул деке станыш кая?» Авесса – Саруян эргыже, Иоавын изаже – тудлан вашештен: «Мый тый денет каем».7 Йӱдым Давид ден Авесса Саулын еҥже-влак деке толыныт. Саул стан покшелне мален киен, умдыжо вуйжо воктене мландышке керме лийын. Авенир ден сарзе-влак тудын йыр киеныт.8 Авесса Давидлан каласен: «Юмо тушманетым кызыт тыйын кидышкет пуэн. Лиеш мо, мый тудым умдо дене иканаштак мландыш кералын шындем? Кокымшо гана кералме огешат кӱл».9 Но Давид Авессалан вашештен: «Тудым ит тӱкӧ! Кӧ Господьын шӱрен палемдыме еҥже ӱмбак кидым нӧлталеш гын, мут кучыде кодеш мо?»10 Давид каласен: «Господь дене товатлем: Господь тудым шке пытара – жап шумеке, тудо шке кола але сарыш кая да вуйжым кошарта. Господьын шӱрымӧ еҥже ӱмбак кидым нӧлталме деч Господь мыйым аралыже.11 Вуйжо воктене улшо умдыж ден вӱд атыжым нал, да ме шкенан деке каена».12 Давид Саулын вуйжо воктеч умдым да вӱдан атым налын, вара нуно шкешт деке каеныт. Нигӧ ужын огыл, нигӧ пален огыл, нигӧ помыжалтын огыл – чылан маленыт: нуным Господьын колтымо омо темдалын улмаш.
13 Давид лапверын вес велышкыже куснен да мӱндырнӧ курык вуйыш шогалын. Нунын кокла пеш тора лийын.14 Давид сарзе-влак ден Нир эрге Авенирлан кычкыралын: «Авенир, вашеште мыланем!» Авенир йодын: «Кӧ тый улат? Мом кугыжалан кычкырет?»15 Давид Авенирлан вашештен: «Тый пӧръеҥ отыл мо? Кӧ Израильыште тый денет иктӧр? Молан тый шке кугыжа озатым от арале? Вет кугыжам, тыйын озатым, пушташ манын, калык гыч ала-кӧ толын каен.16 Тыге ыштымет сай огыл. Господь дене товатлен ойлем: те шке озадам, Господьын шӱрымӧ еҥжым, огыда арале, садлан те колымашым суленда. Ончал, кушто кугыжан вуйжо воктене лийше умдыжо да вӱд атыже?»
17 Саул Давидын йӱкшым пален да йодын: «Тиде тыйын йӱкет мо, Давид эргым?» Давид вашештен: «Тиде мыйын йӱкем, кугыжа озам».18 Эше каласен: «Молан мыйын озам шке тарзыжым поктылеш? Мом мый ыштенам? Могай осал пашалан титакан улам?19 Тек кызыт кугыжа озам шке тарзыжын мутшым колышт налеш. Мыйын ваштарешем тыйым Господь таратен гын, тек Тудын шыдыжым надырын тамлыпушыжо луштара. А айдеме эрге-влак гын, тек нуно Господь ончылно каргыме лийыт. Вет Господьын мландыж гыч нуно мыйым поктен колтеныт да каласеныт: ”Кай, вес юмо-влаклан кумал”.20 Тек мыйын вӱрем Господь деч тораште йоктарыме ок лий. Израиль кугыжа курыклаште ирмузым поктылмо семын ик шуршым кычалаш лектын».
21 Саул каласен: «Мый сулыкыш пуренам. Пӧртыл, Давид эргым. Мый тыланет осалым тетла ом ыште, вет таче мыйын чонем тыйын шинчаштет шерге лийын. Мый ушдымо семын ыштылынам да кугу титакыш пуренам».22 Давид вашештен: «Теве кугыжан умдыжо. Тек тарзет-влак кокла гыч иктажше толеш да тудым налеш.23 Тек Господь кажныжлан тудын чын ыштымыже да ӱшанле улмыжо почеш тӱла. Таче тыйым Господь мыйын кидышкем пуэн, но мый Юмын шӱрымӧ еҥ ӱмбаке кидем нӧлталаш тореш лийым.24 Кузе таче тыйын илышет мыйын шинча ончылнем шерге ыле, тугак мыйын илышемат тек Господьын шинчаштыже шерге лиеш, тек Тудо мыйым [шке аралтышыж дене леведеш да] кеч-могай азап деч утарен кода!»25 Тунам Саул Давидлан каласен: «Суапландарыме улат тый, Давид эргым: тый кугу пашам ыштет, чыла пашаштет сеҥымашыш шуат». Давид шке корныж дене каен, а Саул мӧҥгыжӧ пӧртылын.
Глава 26